Ŵanthu ŵakumangwa mamiliyoni ŵakukhala ku Indonesia, charu icho chikumanyikwaso na zina lakuti ‘Emerald of the Equator.’ Pakukhumba kovwira ŵanthu aŵa, Ŵakaboni ŵa Yehova ŵakupanga mabuku na mapulogiramu ghakulongosora Baibolo mu Chiyowoyero cha Mawoko cha ku Indonesia. Ivyo ŵakuchita vyawa pawaka yayi.

Mu 2016, ku Medan, North Sumatra, Ŵakaboni ŵa Yehova ŵakaŵa na ungano wa chigaŵa mu Chiyowoyero cha Mawoko cha ku Indonesia. Mulara wakuwona vya chivikiliro mu chigaŵa ichi wakafika pa ungano uwu ndipo wakalumba Ŵakaboni chifukwa cha kunozga pulogiramu yakusambizga ŵanthu kwa ulere. Wakatoleka mtima chomene na ivyo wakawona mwakuti nayo wakimbako sumu pakuyezgelera umo ŵabali ŵithu ŵakachitiranga.

Uyo wakulaŵilira malo agho pakachitikira ungano wakati, ungano uwu “wenda makora ndipo wanozga chomene. Nkhugomezga kuti Ŵakaboni ŵalutilirenge kuŵa na maungano ghanthena agha kuti ŵawovwire ŵanyithu ŵakumangwa.” Wakayowoyaso kuti mweneko wa malo agha wati wamanya kuti ungano uwu ŵakanozgera ŵanthu ŵakumangwa, wakayowoya kuti “wakukhumba kuŵachitira chinthu chinyake chiwemi Ŵakaboni. Ntheura wanituma kuti nipeleke chakurya cha muhanya ku ŵanthu wose [300] awo ŵali pa ungano uwu.”

Ŵakaboni ŵa Yehova ŵakwenderaso ŵanthu ŵakumangwa kuti ŵaŵaphalireko uthenga wa mu Baibolo. Kanandi Ŵakaboni aŵa ŵakuwoneska mavidiyo gha mu Chiyowoyero cha Mawoko cha ku Indonesia agho ghali kupangika kuti ghawovwire ŵanthu kuŵa na umoyo uwemi kweniso wakukhorweska.

Mahendra Teguh Priswanto, wachiŵiri kwa mulara wa wupu wa Indonesian Association for the Welfare of the Deaf mu msumba wa Semarang, Central Java, wakati: “Mukwenera kulumbika chomene chifukwa cha ntchito iyo mukuchita ya kovwira ŵakumangwa. Mwachiyelezgero, vidiyo yakuti Mungaŵa Ŵakukondwa mu Mbumba Yinu njakovwira chomene. Tingawonga usange ntchito iyi yingalutilira.”

Yanti, uyo ni mwanakazi wakumangwa, wali kukhwaskika chomene na ivyo Ŵakaboni ŵakuchita. Iyo wakulongosora kuti: “Kanandi ŵanthu ŵakutiseka, kweni Ŵakaboni ŵa Yehova ŵakutilongora chitemwa. Ŵakaboni ŵanandi awo mbambura kumangwa, ŵakusambira chiyowoyero cha mawoko kuti ŵawovwire ŵakumangwa kumanya Mlengi kweniso kusintha umoyo wawo. Nkhakhwaskika chomene chifukwa cha kujipeleka kwawo.”

Pasono Yanti njumoza wa Ŵakaboni ŵa Yehova ndipo wakuchitako ntchito ya kung’anamura mavidiyo mu Chiyowoyero cha Mawoko cha ku Indonesia. Iyo wakuti: “Vinthu ivyo tikung’anamura vikovwira ŵanyake awo ŵakuchimanya makora yayi chiyowoyero cha mawoko kusazgirako maluso ghawo. Kweniso vikovwira ŵanthu kumanya ivyo ŵangachita kuti ŵaŵenge ŵakukondwa na umoyo.”