Abantu abamu bekaguza obutumwa obuli omu Kigambo kya Ruhanga obuburaaba bwahindwirwe. Nabbi Isaya akagamba ngu Ekigambo kya Ruhanga “kirigumaho ebiro nebiro.” (Isaya 40:8) Nitusobora tuta kukigumya ngu emirago ya Ruhanga etahindurwe?

Ruhanga aine obusobozi obw’okulinda Ekigambo kye kikaikara kitafurungwirwe. Ekyokurorraho, omu busumi obwakara, abahandiiki bakozesaaga engaro kukopa Ebyahandiikirwe Ebirukwera. Bayegenderezaaga muno kandi babaraga buli nyuguta kugumya ngu busaho kintu kyona ekibongiiremu, ekibahindwire, rundi ekibaihiremu. Baitu nk’oku abantu batahikiriire, abamu bakakora ensobi entaito baitu ezitarahindwire obutumwa obw’okubanza.

Haroho enkumi n’enkumi ez’ebihandiiko eby’Ebyahandiikirwe Ebirukwera ebya ira muno. Kakuba kimu ha bihandiiko binu kibamu ekintu ekirukwahukana n’ebindi, nikisobora kulengesanizibwa n’ebihandiiko ebindi kuzoora amananu gonyini. Kumanya ebirukukiraho, rora ekicweka ekiine omutwe “Baibuli Ekafurungurwa?” ekiri ha jw.org.

Ekyokurorraho, katubazeeho ebihandiiko ebya ira muno ebirukwetwa Dead Sea Scrolls, eby’asangirwe omu bwingira haihi n’enyanja eya Dead Sea omu 1947. Ebihandiiko binu ebya ira birumu ebicweka eby’Ebyahandiikirwe Ebirukwera ebimazire emyaka erukuhingura omu nkumi ibiri. Abakugu bakalengesaniza ebihandiiko binu n’Ebyahandiikirwe Ebirukwera ebitwine kasumi kanu. Kiki ekibazoire?

Abakugu bakakizoora ngu ebigambo ebiri omu Kigambo kya Ruhanga ekitwine kasumi kanu nibisisanira kimu n’ebiri omu bihandiiko eky’okubanza. * Kwekebiija kurungi ebihandiiko ebya kara nikigumya ngu Ebyahandiikirwe Ebirukwera ebiturukusoma omu kasumi kanu birumu obutumwa bwa Ruhanga obw’okubanza bwonyini. Nitukigumya ngu Ruhanga aikaire n’alinda Ebyahandiikirwe bye Ebirukwera bitafurungurwa n’okuhika omu kasumi kanu.

Nahabweki nitusobora kusoma Ekigambo kya Ruhanga nitukigumiza kimu ngu ebigambo ebirumu bihikiire kimu. Kusigikirra habitwabazaaho, leka hati tubazeeho ekitusobora kwega hali Ruhanga kuraba omu banabbi be.