Kusalirirwa abandi nikimanyisa “kwesisaniriza ngu oli omu nyikara y’omuntu anyakwine obujune kandi n’ohurra obusaasi bwe.” Dakitaali Rick Hanson omukugu omu ndwaire ez’omutwe akagamba ngu: “Okusalirirwa abandi tuzaarwa nakwo.”

TEKEREZAAHO KINU: Habwaki twazairwe n’omulingo ogw’okusalirirwa abandi, omulingo ogu tali omu bihangwa ebindi? Baibuli n’etusoborra ngu abantu bakahangwa omu kisisani kya Ruhanga. (Okubanza 1:26) Kuhangwa omu kisisani kya Ruhanga nikimanyisa ngu twine emiringo nk’eya Ruhanga kandi nitusobora n’okwoleka emiringo enu enungi. Nahabweki, abantu obu basalirirwa abandi bakabakonyera, baba nibooleka omulingo ogw’embabazi ogwa Yahwe Ruhanga.​—Enfumo 14:31.

Ruhanga atusalirirwa muno kandi ayehurra kubi obwarora nitubonabona. Baibuli obw’ebazaaho okubonabona abantu ba Isareri eya kara okubarabiremu, obubakaba bali bairu omu ihanga lya Misiri, n’emyaka 40 ei bamazire omu irungu, egamba eti: “Omu muhito gwabu gwona uwe yasalirwaga.” (Isaya 63:9) Wetegereze ngu, Ruhanga akaba atarukumanya emihito yabo kwonka, baitu nauwe akaba nasalirwa. Nauwe akaba nahurra obusaasi bwabo. Akagamba ati: “Manyire obujune bwabu.” (Okuruga 3:7) Ruhanga akongera yagagamba ati: ‘Wena akora hali iwe buli akozere hamboni y’eriiso lyange.’ (Zakaliya 2:8) Abantu abandi obu batusaaliza, omutima gwe gusalirwa hamu n’ogwaitu.

N’obukiraaba ngu obwire obumu twejunaana kandi twehurra nk’abatasemeriire embabazi za Ruhanga, Baibuli etugumya ngu: “Ruhanga nakira obukuru omutima gwaitu, kandi amanyire byona.” (1 Yohana 3:19, 20) Ruhanga atumanyire kukira nk’oku turukwemanya. Amanyire enyikara yaitu, ebitekerezo, hamu n’enyehurra zaitu kandi atusalirirwa.

Ebyahandiikirwe nibitugumya ngu

• “Olikunga, Mukama alyetabuka; olyamirra, uwe aligamba ati Ndi hanu.”​—ISAYA 58:9.

• “Baitu ‘manyire ebitekerezo ebindukutekereza namberemuli, agambire Mukama, bitekerezo ebyobusinge, kunu tibiri byakabi, okubaha okunihira ha mpero yanyu eyahanyuma. Kandi mulinkunga, kandi muligenda nimunsaba, nanyowe ndibahurra.”​—YEREMIYA 29:11, 12.

• “Amaizi omu maiso gange ogate omu [nsaho] yawe; tigahandikirwe omu kitabu kyawe?”​—ZABULI 56:8.

Kukimanya ngu Ruhanga natusalirirwa, nikisobora kutukonyera kugumira ebizibu? Tekerezaaho ekyokurorraho kya Maria:

“Hanyuma y’okufeerwa mutabani wange ow’emyaka 18, ayali arwaire ekookoro kumara emyaka ebiri, nkahurra obwomeezi bwangumira kandi butarumu bwinganiza. Nkabihirirwa Yahwe habw’okutakiza omwana wange!

“Hanyuma y’emyaka mukaaga, omunywani ow’okugonza kandi ow’embabazi omu kitebe, akampuliiriza obu nkaba nimusobororra nk’oku Yahwe atarukungonza. Hanyuma y’okumara esaaha nyingi ampuliirize kandi atakabalize kigambo kyona, akanyoleka ekyahandiikirwe ekyankwasireho muno. Ekya 1 Yohana 3:19, 20, ekirukugamba ngu: “Ruhanga nakira obukuru omutima gwaitu kandi amanyire byona.” Akansobororra ngu Yahwe nayetegereza obujune bwaitu.

“Kinu n’obukiraaba ky’abaireho, kikangumira kweyihaho ekiniga! Hanyuma nka soma Zabuli 94:19, erukugamba ngu: “Omu bitekerezo byange ebingi ebiri omuli nyowe, okuhumuza kwawe [kusemeza] obwomeezi bwange.” Nkahurra oti rundi ekyahandiikirwe eki kikaba kihandikiirwe nyowe! Hanyuma, nkakyetegereza ngu kimpumuuza obungambira Yahwe ebizibu byange, habw’okuba ampuliiriza kandi anyetegereza.”

Kanikihumuza kumanya ngu Ruhanga natwetegereza kandi natusalirirwa! Baitu habwaki, haroho okubonabona kwingi muno? Tugambe ngu, Ruhanga natufubira habw’ebibi byaitu? Haroho ekintu kyona Ruhanga ekyarukwija kukora kumaraho okubonabona? Ensonga zinu niziija kubazibwaho omu kicweka ekirukuhonderaho.