Чыгыш 20:1—26
20 Аннары Аллаһы мондый әмерләр бирде:+
2 «Мин — Йәһвә, сезне Мисырдан, коллык җиреннән алып чыккан Аллаһыгыз.+
3 Миннән башка һичнинди илаһларыгыз булмасын.*+
4 Үзеңә күктә, җирдә я суда булган нәрсәләрнең потын яки сурәтен ясама.+
5 Аларга сәҗдә кылма һәм хезмәт итмә,+ чөнки мин, синең Аллаһың Йәһвә, җан-тән белән бирелгәнлекне таләп итүче Аллаһы.+ Мине нәфрәт иткән аталарның кылган гөнаһларының нәтиҗәләрен мин улларына өченче һәм дүртенче буынга кадәр татырга бирәм.
6 Ә мине яратучыларга һәм әмерләремне үтәүчеләргә меңенче буынга кадәр тугры мәхәббәт күрсәтәм.+
7 Аллаһың Йәһвәнең исемен тиешсез рәвештә кулланма,+ чөнки Йәһвә Үз исемен тиешсез рәвештә кулланган кешене җәзасыз калдырмас.+
8 Шимбә көннең изге икәнлеген онытма.+
9 Бөтен эшләреңне алты көн дәвамында эшлә,+
10 ә җиденче көн — Аллаһың Йәһвәгә багышланган Шимбә ул. Үзең дә, улың да, кызың да, колың һәм кол кызың да, малың да, шәһәреңдәге килмешәк тә һичнинди эш башкармасын.+
11 Чөнки Йәһвә алты көндә күкне, җирне, диңгезне һәм андагы бар нәрсәне барлыкка китерде, ә җиденче көнне ул ял итә башлады.+ Шунлыктан Йәһвә Шимбә көнен фатихалады һәм аны изге итте.
12 Әти-әниеңне хөрмәт ит,+ шулчак Аллаһың Йәһвә сиңа бирәчәк җирдә озак яшәрсең.+
13 Кеше үтермә.+
14 Зина кылма.+
15 Урлама.+
16 Якыныңа каршы ялган шаһитлек бирмә.+
17 Якыныңның йортына кызыкма. Якыныңның хатынына,+ аның колына һәм кол кызына, аның үгезенә, ишәгенә, якыныңның һичнәрсәсенә кызыкма».+
18 Күк күкрәвен һәм мөгез быргы тавышын ишетеп, яшен яшьнәвен һәм тауның төтенләп торганын күреп, бөтен халык тетрәнеп китте һәм читтә басып торырга мәҗбүр булды.+
19 Шуңа күрә алар Мусага: «Безнең белән син сөйләш, ә без тыңларбыз. Аллаһы безнең белән сөйләшмәсен, юкса без үләрбез»+,— дип әйтте.
20 Шунда Муса халыкка: «Курыкмагыз,— диде,— чөнки Аллаһы сезне сынар өчен,+ һәрвакыт аңа карата курку-хөрмәтегез булсын өчен һәм сез гөнаһ кылмасын өчен иңде».+
21 Халык читтә торды, ә Муса Аллаһы иңгән кара болытка якын килде.+
22 Шунда Йәһвә Мусага болай диде: «Исраиллеләргә менә нәрсә әйт: „Минем сезнең белән күктән сөйләшкәнемне сез үзегез күрдегез.+
23 Берьюлы миңа да, башка илаһларга да гыйбадәт кылыр өчен көмеш илаһлар ясамагыз һәм шулай ук үзегезгә алтын илаһлар да ясамагыз.+
24 Миңа туфрактан мәзбәх корыгыз һәм анда яндыру корбаннары, татулык корбаннары китерерсез, вак һәм эре малыгызны корбанга чалырсыз. Мин исемемне телгә алсыннар өчен сайлаган һәр урында+ сезгә килермен һәм сезгә хәер-фатихамны бирермен.
25 Әгәр миңа таштан мәзбәх корасыз икән, кораллар ярдәмендә киселгән* ташлар кулланмагыз.+ Кискеч* кулланып, сез аны нәҗесләрсез.
26 Минем мәзбәхемә баскыч ясамагыз, югыйсә менгәндә шәрәлегегез* күренер“.
Искәрмәләр
^ Яки «Мине санламыйча [сүзгә-сүз «Йөземә каршы»], бүтән һичнинди илаһка табынмагыз».
^ Яки «юнылган».
^ Ягъни зубило.
^ Яки «җенси әгъзаларыгыз».