16  Аннары Исһа́р+ улы Кора́х+ (Исһар Коһатның+ улы, ә Коһа́т Ле́винең+ улы иде) һәм Илиабның+ уллары Дата́н белән Абира́м, Фәлитнең улы Өнә́ (Илиа́б белән Фәли́т Рубин+ кабиләсеннән иде) бергә җыелдылар. ²  Алар 250 исраилле — җәмгыятьнең башлыклары, җыелышның сайланган абруйлы ир-атлары белән бергә Мусага каршы күтәрелде. ³  Алар Муса белән Һарунга каршы җыелып,+ аларга болай диде: «Җитте, туйдырдыгыз! Бөтен җәмгыять изге,+ һәм Йәһвә алар арасында.+ Ни өчен сез үзегезне Йәһвәнең җыелышыннан өстен куясыз?» ⁴  Моны ишетү белән Муса йөзтүбән капланды. ⁵  Аннары ул Корахка һәм аның яклы кешеләргә болай диде: «Иртән Йәһвә кемнең үзенеке,+ кемнең изге һәм кем Аллаһыга якынлаша ала+ икәнен күрсәтәчәк. Ул кемне сайласа,+ шул аңа якынлаша алыр. ⁶  Менә нәрсә эшләгез: Корах һәм аның яклы кешеләр,+ ут савытларын алыгыз да+ ⁷  иртәгә Йәһвә алдында аларга ут һәм фимиам салыгыз. Йәһвә кемне сайласа,+ шул изге. Сез, Ле́ви уллары,+ арттырып җибәрдегез!» ⁸  Аннары Муса Корахка болай диде: «Ле́ви уллары, тыңлагызчы. ⁹  Йәһвә чатырындагы хезмәтне үтәр өчен һәм җәмгыять алдында халыкка хезмәт итеп торыр өчен, Исраи́л Аллаһысы сезне Исраил җәмгыятеннән аерып,+ үзенә якынлашырга рөхсәт итте.+ Бу сезгә аз булып тоеламы? ¹⁰  Ул бит сезне бөтен кардәшләрегез — Ле́ви уллары белән бергә үзенә якынлаштырды. Сез тагын руханилыкны да алырга тиешме?+ ¹¹  Син һәм синең яклы кешеләр, җыелып, Йәһвәгә каршы чыгасыз. Ә Һарун, аңардан зарланырга, кем соң ул?»+ ¹²  Соңрак Муса Илиабның уллары Датан белән Абирам+ артыннан кеше җибәрде, ләкин алар әйтте: «Без килмибез! ¹³  Безне, чүлдә үтерер өчен, сөт белән бал аккан җирдән чыгарганың азмыни?+ Җитмәсә, безнең өстән тулы хаким дә булырга телисеңме? ¹⁴  Син бит безне сөт белән бал аккан җиргә+ китермәдең һәм безгә мираска кырлар һәм йөзем бакчалары бирмәдең. Әллә син ул кешеләрнең күзләрен чыгармакчы буласыңмы? Без килмибез!» ¹⁵  Шунда Муса бик нык ачуланды һәм Йәһвәгә болай диде: «Аларның икмәк бүләген кабул итмә. Мин алардан бер ишәк тә алмадым һәм аларның берсенә дә зыян китермәдем».+ ¹⁶  Аннары Муса Корахка болай диде: «Иртәгә син һәм синең яклы кешеләр Йәһвә алдына килегез. Син, алар һәм Һарун килсен. ¹⁷  Аларның һәрберсе үзенең ут савытын алып, анда фимиам салсын һәм һәрберсе Йәһвә алдына үзенең ут савытын китерсен, барлыгы 250 ут савыты. Син дә, Һарун да — һәрберегез үзегезнең ут савыты белән килегез». ¹⁸  Шулай итеп, аларның һәрберсе үзенең ут савытын алып, анда ут һәм фимиам салды да Муса һәм Һарун белән бергә очрашу чатырының керү урыны янына килеп басты. ¹⁹  Корах үзе яклы кешеләрне очрашу чатырының керү урыны янына аларга каршы җыйгач,+ бөтен җәмгыятькә Йәһвәнең даны күренде.+ ²⁰  Йәһвә Муса белән Һарунга болай диде: ²¹  «Бу төркемнән аерылыгыз, һәм мин аларны бер мизгелдә юк итәрмен».+ ²²  Шунда алар җиргә йөзтүбән капланды һәм: «И Аллаһы, бөтен кешеләргә тормыш бирүче Аллаһы,+ бер кешенең гөнаһы аркасында бөтен җәмгыятькә ачуың кабарырмы?»+ — диделәр. ²³  Йәһвә Мусага болай диде: ²⁴  «Җәмгыятькә әйт: „Корах, Датан һәм Абирам+ чатырларыннан читкә китегез!“» ²⁵  Шунда Муса торып, Датан һәм Абирам янына китте, аның белән Исраил өлкәннәре+ дә барды. ²⁶  Ул җәмгыятькә болай диде: «Бу явыз кешеләрнең бөтен гөнаһлары аркасында юк ителмәс өчен, аларның чатырларыннан читкә китегез һәм аларның бернәрсәсенә дә кагылмагыз». ²⁷  Алар Корах, Датан һәм Абирам чатырларыннан шунда ук читкә китте, ә Датан белән Абирам үз чатырларының керү урыны янына үз хатыннары, уллары һәм кечкенә балалары белән чыгып бастылар. ²⁸  Аннары Муса болай диде: «Бөтен бу нәрсәләрне мин үз белдегемнән түгел, ә Йәһвә җибәргәнгә башкарганымны шуннан белерсез: ²⁹  әгәр бу кешеләр бөтен кеше үлгәндәй гадәти үлем белән үлсә һәм җәзалары бөтен кешенеке сыман булса, Йәһвә мине җибәрмәгән булып чыга.+ ³⁰  Әмма Йәһвә алар белән гадәти булмаганны эшләсә һәм җир ачылып, аларны һәм аларның бар нәрсәсен йотса һәм алар Кабергә* тере килеш төшсә, сез бу кешеләрнең Йәһвәне ихтирам итмәгәннәрен, һичшиксез, аңларсыз». ³¹  Аның бу сүзләрне әйтеп бетерүе булды, алар астындагы җир ярылып китте.+ ³²  Һәм җир, ачылып, аларны, аларның бөтен өйдәгеләрен, Корахның+ кешеләрен һәм аларның бөтен мал-мөлкәтен йотты. ³³  Шулай итеп алар һәм аларның бөтен кешеләре Кабергә тере килеш керделәр, җир аларны каплады, һәм алар җыелыш арасыннан юк булды.+ ³⁴  Алар тирәли булган бөтен исраиллеләр аларның кычкыруларын ишетеп: «Җир безне дә йотмасын!» — диеп куркып качты. ³⁵  Аннары Йәһвәдән ут чыкты+ һәм фимиам китергән 250 кешене йотты.+ ³⁶  Йәһвә Мусага болай диде: ³⁷  «Һарун руханиның улы Илгазарга ут савытларын+ ут төшкән җирдән җыярга куш, чөнки алар изге. Шулай ук аңа көлне читтәрәк таратырга боер. ³⁸  Гөнаһ кылып, һәлак булган* кешеләрнең ут савытларыннан мәзбәхне+ тышлау өчен юка калайлар ясагыз, чөнки ут савытлары Йәһвә алдына китерелде, һәм алар изге булып китте. Алар исраиллеләр өчен билге булып торсын».+ ³⁹  Шунда Илгаза́р рухани теге яндырылган кешеләр китергән бакыр ут савытларын алды да, аларны чүкеп, мәзбәхне тышлады. ⁴⁰  Ул нәкъ Йәһвә үзенә Муса аша әйткәнчә эшләде. Бу исраиллеләрнең исләренә шуны төшереп торды: фимиам яндыру хокукы булмаган* — Һарун токымыннан булмаган бер кеше дә фимиамны Йәһвә алдында яндырырга дип якынлашырга тиеш түгел,+ һәм беркем дә Корах белән аның яклы кешеләр кебек эш итәргә тиеш түгел.+ ⁴¹  Икенче көнне үк исраиллеләрнең бөтен җәмгыяте: «Сез икегез Йәһвәнең халкын үлемгә дучар иттегез»,— диеп, Муса белән Һарунны гаепли башлады.+ ⁴²  Җәмгыять Муса белән Һарунга каршы җыелгач, алар очрашу чатырына таба борылды, һәм, менә, аны болыт каплады, һәм Йәһвәнең даны күренде.+ ⁴³  Муса белән Һарун очрашу чатыры алдына килде,+ ⁴⁴  һәм Йәһвә Мусага болай диде: ⁴⁵  «Бу җәмгыятьтән читкәрәк басыгыз, һәм мин аларны бер мизгелдә юк итәрмен».+ Шунда алар җиргә йөзтүбән капланды.+ ⁴⁶  Аннары Муса Һарунга болай диде: «Ут савытын ал да, аңа мәзбәхтән ут салып,+ өстенә фимиам сал һәм тизрәк халык янына барып, аларны йолып ал,+ чөнки Йәһвәнең ачуы кабынды. Халык кырыла башлады!» ⁴⁷  Һарун шунда ук, Муса әйткәнчә, ут савытын алды да халык арасына йөгерде. Халыкның кырыла башлаганын күреп, ул ут савытына фимиам салды да халыкны йолып ала башлады. ⁴⁸  Ул үлеләр һәм тереләр арасында басып торды. Ахыр чиктә, халыкның кырылуы тукталды. ⁴⁹  Корах аркасында үлүчеләрдән башка, бу җәзадан үлгән кешеләрнең саны 14 700 булды. ⁵⁰  Халыкның кырылуы тукталгач, Һарун очрашу чатырының керү урыны янына, Муса янына килде.