Muprofeta Moxe a vule swaku lava yingisaka minawu ya Xikwembu va ta katekisiwa. (Deteronoma 10:13; 11:27) A hi fanelenga hi yingisa Xikwembu hi mhaka ku chava ku khatisiwa. Lirhandzu la Xikwembu li hi yentxa hi lava ku xi yingisa hi tlhela hi nga yentxi leswi xi kalaka xi nga swi tsakeli. Bibele li li: ‘Hikuva leswi i lirhandzu la Xikwembu, xileswo ahihlayiseni Minawu ya xona’. — 1 Yohane 5:3.

Vona minkateko leyi hi nga ta yi kuma, loko hi yingisa Xikwembu.

“Mina Yehovha, ni Xikwembu xa wena, ni Lweyi a ku djondzisaka ku ku pfuna, . . . a ku fambisaka andleleni leyi u faneleke u famba hi yona.” — ESAYA 48:17.

Leswi inga Yehovha a nga hi yentxa, a hi nyika minawu leyi hi yi lavaka. Se loko hi lava ku pfuniwa hi Yehovha ku yentxa swiboho swa swinene hi fanele hi djondza leswi a swi lavaka ka Bibele hi tlhela hi hanya hi swona.

‘Kukatekile kumbe va tsaka ngopfu lavayingisaka Rito la Xikwembu, vava valihlayisa!’ — LUKA 11:28.

Swoswi vanhu lava yingisaka Xikwembu va tsakile. Hi xikombiso, wanuna mun’wana wa Espanha a a nga hlweli ku kwata naswona a a hlupha nsati wa yena ni vanhu van’wana. Se siku lin’wana a lerhe marito ya muprofeta Moxe, lawa a ma vulavula hi leswi nga humelela Yosefa n’wana wa Yakobe. Yosefa a xavisiwile swaku a va xikarhawa a tlhela a petiwa djele na a nga na nandzu kambe a tame a va munhu wa ku rhula a tlhela a rivalela. (Genesa, ndzima 37-45) Wanuna lweyi a te: “Ni pimise hi xikombiso xa Yosefa, xi ni pfune swaku ni va munhu wa ku rhula, wa timpsalu naswona ni ti khoma. Leswo swi ni yentxe ni tsaka.”

Bibele li ni minawu leyi hi yi pfunaka ku hanyisana kahle ni van’wana. Vona minawu yoleyo ka nhlokomhaka leyi landzelaka.