Ina, hikuva Xikwembu xi lava leswaku vanhu va hlangana va xi gandzela. Bibele yi ri: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina.”—Vaheveru 10:24, 25.

 Yesu u vule leswaku valandzeri vakwe a va ta sungula ntlawa lowu hlelekeke loko a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Ndlela leyikulu leyi valandzeri va Kreste a va ta kombisa rirhandzu ha yona, a ku ta va ku tihlanganisa ni vapfumerikulorhi. A va ta hlangana emavandlheni nkarhi ni nkarhi leswaku va gandzela. (1 Vakorinto 16:19) Hi ku angarhela, a va ta va nhlengeletano ya vamakwenu emisaveni hinkwayo.—1 Petro 2:17.

Ku ni swo tala leswi lavekaka ku tlula ku va eka vukhongeri

 Hambileswi Bibele yi vulaka leswaku vanhu va fanele va hlangana leswaku va gandzela Xikwembu, a yi vuli leswaku munhu a nga xi tsakisa ntsena hi ku va xirho xa vukhongeri. Leswaku munhu a amukeleka eka xona, vukhongeri byakwe byi fanele byi khumba vutomi byakwe. Hi xikombiso, Bibele yi ri: “Muxaka wa vugandzeri lebyi baseke ni lebyi nga nyamangiki hi ku ya hi langutelo ra Xikwembu tlhelo Tata wa hina hi lowu: ku khathalela lava nga riki na vatswari ni tinoni enhlomulweni wa tona, ni ku va munhu a tihlayisa a nga ri na xivati xa misava.”—Yakobo 1:27.