JULY 21, 2014
AUSTRIA
Timbhoni Ta Yehovha Ti Fundziwile Eka Muako Wa Xitsundzuxo eKampeni Ya Nxaniso Ya Gusen
ESELTERS, le Jarimani—Hi Sonto, April 13, 2014, eka Muako wa Xitsundzuxo eKampeni ya Nxaniso ya Gusen le Austria, ku pfuriwe nsimbi ya xiphepherhele ya xitsundzuxo leswaku ku fundzhiwa Timbhoni ta Yehovha ta kwalomu ka 450 leti a ti khotsiwile hi Manazi ekampeni ya nxaniso ya Mauthausen ni leyi nga ehansi ka yona ya Gusen. Vaendzi vo tlula 130 a va ri kona eka xiendlakalo lexi.
Nsimbi ya xiphepherhele ya xitsundzuxo leyi pfuriweke eka xiendlakalo lexi a xi khomeriwe eka Muako wa Xitsundzuxo eKampeni ya Nxaniso ya Gusen hi April 13, 2014.
Loko Timbhoni ti fika ekampeni ya nxaniso ya Mauthausen, mufambisi wa yona u ti xungete a ku: “Ku hava Xichudeni xa Bibele lexi nga ta huma laha xi hanya.” Martin Poetzinger, loyi a heteke malembe ya kaye ekampeni ya Dachau, Mauthausen na Gusen, naswona endzhaku ka nkarhi a veke xirho xa Huvo leyi Fumaka ya Timbhoni ta Yehovha eBrooklyn, le New York, u vule leswi hi nkarhi lowu a a pfaleriwe ha wona eMauthausen: “Maphorisa ya Magestapo ma ringete tindlela hinkwato leswaku hi landzula ripfumelo ra hina.”
Hi May 1945: EKampeni ya Nxaniso ya Gusen. Martin Poetzinger (loyi a tshameke elayinini yo sungula, wa vumbirhi ku suka eximatsini) a ri ni vabohiwa van’wana va 23 endzhakunyana ka loko va ntshunxiwile.
Hi ku famba ka nkarhi Timbhoni tin’wana ekampeni ya Mauthausen ti yisiwe ekampeni leyi nga ehansi ka yona ya Gusen. Gusen a ku ri “kampa yo dlaya,” laha ku dlayiwa ka vanhu loku hleriweke a ku ri ntshamelo-maxelo. Leswaku Timbhoni ti tshama ti ri ni ripfumelo leri tiyeke, a ti hlangana hi mintlawa leyitsongo nivusiku leswaku ti bula hi matsalwa ya Bibele lawa a ta ha ma tsundzuka. Siku rin’wana ti kume Bibele. Hiloko ti yi ava hi swiphemu kutani Timbhoni a ti cincisana hi swiphemu sweswo. A ti hlaya ti tumbele ehansi ka mibedo ya tona loko ti kuma xinkarhana.
Nakambe hi vutlhari Timbhoni a ti vulavula ni van’wana hi rungula ra Bibele. Vakhotsiwa va ntlhanu lava humaka ePoland va dyondze Bibele ni Timbhoni naswona va khuvuriwe exihundleni exidyelweni xa mapulanga lexi a xi endleriwe ku khuvula vanhu. Mbhoni yin’wana leyi vuriwaka Franz Desch yi vulavule ni phorisa ra SS hi rungula ra Bibele, leri endzhaku ka nkarhi ri veke Mbhoni ya Yehovha.
Wolfram Slupina, muvulavuleri wa Timbhoni ta Yehovha le Austria, u te: “Ha tsaka leswi Timbhoni ti tsundzukiwaka hikwalaho ka ripfumelo ni xivindzi leswi ti swi kombiseke loko ta ha ri ekampeni ya Mauthausen ni ya Gusen. Ku tiyimisela ka tona ku khoma vanhu hinkwavo hi musa ni ntwela-vusiwana wa Vukreste a ku ri ndlela leyinene yo hlula swo biha, leyi faneleke ku tlangeriwa ni ku tekeleriwa.”
Media Contact(s):
International: J. R. Brown, Office of Public Information, tel. +1 718 560 5000
Austria: Wolfram Slupina, tel. +49 6483 41 3110
Afrika-Dzonga: Mzamo Goloda, +27 11-761-1000
U Nga Ha Tsakela
MAHUNGU YA SWESWINYANA
Timbhoni Ta Yehovha Ti Tsundzukiwa Eka Xitsundzuxo Xa Lembe Ra Vu-70 Xa Lava Poneke eAuschwitz
Hi January 27, 2015, lava poneke eAuschwitz, ku katsa ni lava rhumeriweke hi matiko ni vaendzi vo tala, va ta tsundzuka lembe ra vu-70 ya ku ntshunxiwa ekampeni ya Manazi ni kampa ya rifu.
MAHUNGU YA SWESWINYANA
Ku Pfuriwa Ka Ribye Ro Xixima Mbhoni Leyi Poneke Hi Nkarhi Wa Ku Dlayeteriwa Ka Vayuda eJarimani
I yini lexi pfuneke Max Liebster leswaku a pona etikampeni ta ntlhanu ta Manazi?
MAHUNGU YA SWESWINYANA
Richard Rudolph, Wanuna Loyi A Poneke eTikampeni Ta Nxaniso, U File eJarimani A Ri Ni Malembe Ya 102
Richard Rudolph u tiyiselele ku khotsiwa malembe yo tlula 19 ehansi ka mfumo wa Manazi ni wa Makhomunisi hikwalaho ka tidyondzo ta vukhongeri byakwe.
MAHUNGU YA SWESWINYANA
Muako Wa Xitsundzuxo Wa Sachsenhausen Wu Ta Fundzha Mbhoni Ya Yehovha Leyi Dlayiweke Hi Manazi
Hi September 16, 2014, Nhlangano wa Brandenburg Memorials wu ta tsundzuka lembe ra vu-75 ra rifu ra August Dickmann ekampeni ya nxaniso ya Sachsenhausen. A ku ri yena wo sungula ku dlayiwa erivaleni hi Manazi enkarhini wa Nyimpi ya Vumbirhi ya Misava hileswi a aleke ku ya enyimpini hikwalaho ka ripfalo rakwe