SOO-JEONG loyi a nga mudyondzisi exikolweni xa le henhla eSouth Korea, u tirhise tivhidiyo ta le ka jw.org leswaku a dyondzisa swichudeni swakwe. U ri: “Swichudeni swi yi tsakerile swinene vhidiyo leyi nge Munghana Wa Xiviri U Njhani? Loko swi heta ku yi hlalela swi te, ‘A hi nga si tshama hi anakanya hi mhaka leyi loko swi ta emhakeni ya ku endla vanghana. Hi dyondze mhaka leyintshwa!’ Swin’wana swi vule leswaku swi ta nghena eka website leyi loko swi lava switsundzuxo swo karhi.” Soo-jeong u tlhele a ku: “Ndzi yi kombe ni vadyondzisikulorhi. Va yi tsakerile swinene naswona va yi tirhisa loko va dyondzisa swichudeni swa vona.”

Vhidiyo yin’wana leyi swichudeni swa le South Korea swi yi tsakeleke, hi leyi nge Hlula Munhu Wa Tinyimpi U Nga Kalanga U Lwa Na Yena. Mudyondzisi un’wana loyi a tirhaka ni nhlangano wo pfuna vantshwa leswaku va papalata madzolonga, u kombe swichudeni vhidiyo leyi. U te: “Vana va yi tsakele ngopfu vhidiyo leyi! Yi kombisa ndlela leyi va nga tisirhelelaka ha yona eka madzolonga ni leswi va nga swi endlaka loko va xanisiwa.” Nhlangano wolowo, wu kombele ku tirhisa vhidiyo leyi leswaku wu dyondzisa swichudeni leswi nga eswikolweni swa le hansi. Wu pfumeleriwile ku endla tano. Hambi ku ri maphorisa, ma dyondzisa vana hi ku tirhisa tivhidiyo leti kumekaka eka jw.org.

Tinyike nkarhi wo nghena eka website leyi. Swa olova ku lava swo karhi eka yona, ku kopa tivhidiyo, Bibele, mikandziyiso yin’wana ni rungula leri ngo yingiseriwa kunene. Hinkwaswo leswi u swi kuma mahala.