LESWI VANHU VAN’WANA VA SWI VULAKA

Varhoma va dlaye Yesu hi ku n’wi hayeka exihambanweni lexi a xi endliwe hi timhandzi timbirhi.

LESWI BIBELE YI SWI VULAKA

Yesu va n’wi dlaye “hi ku n’wi hayeka emhandzeni.” (Mintirho 5:30, Bibele ya Mahungu Lamanene) Vatsari va Bibele va tirhise marito lama kombisaka leswaku Yesu u fele eka mhandzi yin’we ku nga ri timbirhi. Hi ku ya hi buku leyi nge Crucifixion in Antiquity yi vula leswaku rito ra Xigriki leri nge stau·rosʹ, ri vula “mhandzi, ku nga ri nchumu lowu fanaka ni ‘xihambano.’” Rito xyʹlon, leri tirhisiweke eka Mintirho 5:30, ri vula “mhandzi leyi nga lo thwii, leyi Varhoma a va belela swigevenga leswi gweveriweke rifu.” *

Nakambe Bibele yi vula leswaku ndlela leyi Yesu a dlayiweke ha yona a yi fana ni ndlela leyi Vaisrayele a va dlaya vadyohi ha yona. Nawu a wu ku: “Loko ko tshuka ku va ni munhu la nga ni xidyoho lexi faneriwaka hi xigwevo xa rifu, kutani u n’wi dlayile naswona u n’wi hayeke emhandzini, . . . loyi a hayekiweke u rhukaniwe hi Xikwembu.” (Deteronoma 21:22, 23) Hi ku ya hi nawu lowu, muapostola Pawulo la nga Mukreste u tsale leswaku Yesu u ve “ndzhukano ematshan’weni ya hina, hikuva ku tsariwile: ‘A ku rhukaniwe munhu un’wana ni un’wana la hayekiweke emhandzini [xyʹlon].’” (Vagalatiya 3:13) Pawulo u kombise leswaku Yesu u fele emhandzini.

“Hi yena loyi va n’wi dlayeke hi ku n’wi hayeka emhandzeni.”—Mintirho 10:39, Bibele ya Mahungu Lamanene.

LESWI BIBELE YI SWI VULAKA

A ku kona laha Bibele yi vulaka leswaku Vakreste vo sungula a va tirhisa xihambano tanihi mfungho wa vukhongeri. Ematshan’weni ya sweswo, i Varhoma lava a va tirhisa xihambano lexi a xi fanekisela swikwembu swa vona. Kutani endzhaku ka malembe ya 300 Yesu a file, Constantine Mufumi wa Rhoma u tirhise xihambano tanihi mfungho wa mavuthu yakwe, ivi endzhaku ka sweswo xi sungule ku tirhisiwa eKerekeni ya Rhoma tanihi mfungho wa “Vukreste.”

Leswi vahedeni a va tirhisa xihambano leswaku va gandzela swikwembu swa vona, xana vadyondzisiwa va Yesu a va ta va va xi tirhisile loko va gandzela Xikwembu xa ntiyiso? Doo! A va swi tiva leswaku Xikwembu xi venga vanhu lava tirhisaka “xivumbeko xa xifanekiselo xin’wana ni xin’wana” leswaku va xi gandzela naswona Vakreste a va fanele va “[balekela] ku gandzela swifaniso swa hava.” (Deteronoma 4:15-19; 1 Vakorinto 10:14) “Xikwembu i Moya” naswona vanhu a va nge swi koti ku xi vona. Hikwalaho, Vakreste va le nkarhini wa vaapostola a va nga tirhisi swilo leswi khomekaka ni mimfungho leswaku va kota ku tshinela eka Xikwembu. Ku ri na sweswo, a va xi gandzela “hi moya,” va kongomisiwa hi moya lowo kwetsima ni hi “ntiyiso,” hi ku pfumelelana ni ku rhandza ka Xikwembu hilaha swi kombisiweke hakona eMatsalweni.—Yohane 4:24.

“Vagandzeri va ntiyiso va . . . ta gandzela Tatana hi moya ni ntiyiso.”—Yohane 4:23.

LESWI VANHU VA SWI VULAKA

“Swa twala ku vula leswaku nchumu lowu tirhisiweke leswaku hi ponisiwa wu fanele wu xiximiwa swinene naswona wu tekiwa wu ri wa nkoka. . . . Loyi a xiximaka xifaniso xexo, u xixima munhu la yimeriwaka hi xona.”—New Catholic Encyclopedia.

LESWI BIBELE YI SWI VULAKA

Vakreste va boheka ku tlangela leswi Yesu a swi endleke, hikuva rifu rakwe ri endla swi koteka leswaku va rivaleriwa swidyoho, va va ni vuxaka ni Xikwembu ni ku va va kuma vutomi lebyi nga heriki. (Yohane 3:16; Vaheveru 10:19-22) Bibele a yi vuli leswaku va fanele va kombisa ndlela leyi va n’wi xiximaka ha yona Yesu hi ku va ni swifaniso swa yena kumbe ku vula ntsena leswaku va pfumela eka yena. Phela “ripfumelo, loko ri nga ri na mintirho, ri file hi vurona.” (Yakobo 2:17) Vakreste va fanele va kombisa ripfumelo eka Yesu. Njhani?

Bibele yi ri: “Rirhandzu leri Kreste a nga na rona ra hi susumeta, hikuva leswi hi swona leswi hi swi avanyiseke, leswaku munhu un’we u fele hinkwavo . . . Lava va hanyaka va nga ha tihanyeli, kambe va hanyela loyi a va feleke a tlhela a pfuxiwa.” (2 Vakorinto 5:14, 15) Vakreste va susumeteleka ku tekelela xikombiso lexinene xa rirhandzu leri Kreste a ri kombiseke hi ku va va cinca mahanyelo ya vona. Hi ndlela yoleyo va kombisa leswaku va xixima Yesu hi ndlela leyinene ngopfu ku tlula ku va va tirhisa mfungho wa vukhongeri.

“Loku hi kona ku rhandza ka Tata wa mina, leswaku un’wana ni un’wana loyi a vonaka N’wana ivi a kombisa ripfumelo eka yena u fanele ku va ni vutomi lebyi nga heriki.”—Yohane 6:40.