Ndlela Leyi Vakreste Va Lembe-xidzana Ro Sungula A Va Hanya Ha Yona

Va Fambe Va Ya Fika eNdhawini Ya Le Kule Swinene Ya Misava

“Esikwini leri tlhandlamaka a famba na Barnaba va ya eDerbe. Kutani endzhaku ko vula mahungu lamanene emutini wolowo ni ku endla vadyondzisiwa vo hlayanyana, va tlhelele eListra ni le Ikoniya ni le Antiyoka.”—MINTIRHO 14:20, 21.

RI XE kahle eka murhumiwa wa mahungu lamanene. Hambileswi a nga karhala, u ambala maphaxani yakwe leswaku a lunghekela ntirho wa siku rero.

Loko masana ma huma, u nghena endleleni leyi nga ni ritshuri, leyi nga etlhelo ka nsimu ya vhinya naswona yi nga exikarhi ka nsimu ya mutlhwari a gonya ni switsunga. Loko a ri karhi a famba u hlangana ni varimi lava yaka emasin’wini, van’wamabindzu lava fambaka ni swifuwo swa vona leswi rhwaleke nhundzu yo tala ni vapfhumba lava yaka eYerusalema. Murhumiwa ni vanghana vakwe va chumayela un’wana ni un’wana loyi va hlanganaka na yena. Xikongomelo xa vona hi xihi? I ku hetisisa xileriso xa Yesu xo va timbhoni ta yena “ku ya fika endhawini ya le kule swinene ya misava.”—Mintirho 1:8.

Murhumiwa loyi ku nga ha va ku ri muapostola Pawulo kumbe Barnaba kumbe un’wana wa varhumiwa va lembe-xidzana ro sungula. (Mintirho 14:19-26; 15:22) A va ri ni matimba naswona a va tiyimiserile. Ku teka riendzo hi xikepe a swi nga olovi. Loko muapostola Pawulo a hlamusela swiphiqo leswi a hlangavetaneke na swona  elwandle, u te: “Ndzi tshovekeriwe hi xikepe kanharhu, vusiku byin’we ni siku rin’we ndzi swi hete endzeni-ndzeni ka lwandle.” Ku famba hi milenge na swona a swi tika. Pawulo u vule leswaku a a tala ku hlangavetana ni ‘makhombo emilambyeni ni tinsulavoya.’—2 Vakorinto 11:25-27.

Xana u vona onge a swi ri njhani ku famba ni varhumiwa volavo? Xana a wu ta famba mpfhuka wo tanihi kwihi hi siku? Xana a wu ta lava ku famba na yini naswona hi kwihi laha a wu ta lava ku tshama kona loko u ri eriendzweni rero?

Ku Famba Hi Milenge Hi lembe-xidzana ro sungula Varhoma a va ake magondzo lama kotaka ku hlanganisa mimfumo leyikulu ya le Rhoma. Magondzo wolawo a ma endliwe kahle. Yo tala ya wona a ma aname timitara ta 4, 5 naswona a ma khavisiwe hi maribye kasi man’wana ya wona a ma komba vanhu laha va yaka kona. Emagondzweni yo tano, murhumiwa wo fana na Pawulo a a famba tikhilomitara ta kwalomu ka 32 hi siku.

Hambiswiritano, magondzo yo tala ya le Palestina a ma nga fambeki naswona vanhu vo tala lava a va famba eka wona a va ya emasin’wini ni le milambyeni. Minkarhi yin’wana murhumiwa a a hlangana ni swivandzana kumbe swigevenga; naswona minkarhi yin’wana a kuma magondzo ma pfariwile.

I yini leswi murhumiwa a a famba na swona? A a rhwala swilo swo tisirhelela (1), sangu (2) xipachi xa mali (3), maphaxani yo cinca ha wona (4), nkwama wa swakudya (5), swiambalo swo cinca ha swona (6), bakiti ro ka mati exihlobyeni leri a ri endliwe hi dzovo (7), bodlela ro chela mati yo hisa (8) ni nkwama lowu a wu ta kota ku chela swilo sweswo hinkwaswo (9).

Varhumiwa a va tiyiseka leswaku va hlangana ni van’wamabindzu lava a va heleketa swilo etimakete ta kwalaho. Van’wamabindzu volavo a va tiyiseka leswaku timbhongolo ta vona a ti wi tanihi leswi magondzo ya kona a ma ri ni switsunga ni maribye. Ku vuriwa leswaku mbhongolo leyi tiyeke naswona yi rhwaleke nhundzu yo tala yi nga famba tikhilomitara ta kwalomu ka 80 hi siku. Loko yi koka xileyi kumbe kalichi ya nonoka naswona yi nga famba tikhilomitara ta nhungu ku ya eka 20 ntsena. Tinkuzi a ti kota ku rhwala nhundzu yo tala, kambe a ti nga teki maendzo yo leha. Kun’wana ni kun’wana laha murhumiwa a a famba kona a a hlangana ni tigolonyi leti kokiwaka hi tikamela kumbe  timbhongolo leti rhwaleke swilo leswi humaka ematikweni yo hambana-hambana. Munhu loyi a a fambisa mapapila ni milawu leyi humaka evuhosini, mbhongolo yakwe a yi tsutsuma swinene tanihi leswi a yi nga koki nchumu.

Loko ri pela, varhumiwa volavo a va etlela etlhelo ka gondzo endzeni ka matende. Van’wana a va etlela emarhumbini. Tindhawu teto a ti thyakile naswona a ti nga tsakisi. Hi hala tlhelo, a ti nga va sirheleli eka maxelo lama nga riki manene kumbe eka swigevenga. Kambe minkarhi yin’wana a va tshama ni maxaka ya vona kumbe vapfumeri-kulobye.—Mintirho 17:7; Varhoma 12:13.

Ku Famba eLwandle Mabyatso lamatsongo a ma rhwala nhundzu ni vanhu eribuweni ra lwandle kutani ma va tsemakanyisa Lwandle ra Galeliya. (Yohane 6:1, 2, 16, 17, 22-24) Swikepe leswikulu a swi tsemakanya lwandle ra Mediteraniya swi yisa nhundzu ematikweni man’wana ni ku yi landza. Swikepe leswi a swi yisa swakudya eRhoma ni ku tleketla vatirhela-mfumo naswona hi swona leswi a swi endla leswaku vanhu va kota ku vulavurisana ni vanhu lava tshamaka ematikweni man’wana.

Vatluti lava a va tluta ninhlikanhi a va tirhisa mepe, kasi lava a va tluta nivusiku a va tirhisa tinyeleti. Elwandle a ku fambeka kahle ku sukela hi May ku ya fika exikarhi ka September hikuva maxelo ya kona a ma ri manene. Hi minkarhi leyin’wana swikepe a swi tala ku tshoveka.—Mintirho 27:39-44; 2 Vakorinto 11:25.

Vanhu a va nga hlawuli ku famba hi xikepe hikwalaho ko ehleketa leswaku xi hlayisekile ku tlula ku famba hi milenge. Vanhu lava a va ri ni mindzhwalo hi vona lava a va famba hi swikepe naswona lava nga riki na mindzhwalo a va nga swi tirhisi ngopfu. Varhumiwa a va tshama eswikepeni ni ku etlela eka swona ku nga khathariseki maxelo ya kona. Ndhawu leyin’wana leyi a yi sala a va veka mindzhwalo ya vona yo hlawuleka. Vakhandziyi a va dya swakudya leswi va titeleke na swona. A va nyikiwa mati yo nwa ntsena. Minkarhi yin’wana, maxelo a ma nga ri manene. Swidzedze ni ku hlundzuka ka lwandle a swi endla leswaku vanhu va heta masiku va ri karhi va vabya.

Ku nga khathariseki swiphiqo leswi a va langutana na swona loko va famba hi milenge kumbe hi swikepe, varhumiwa vo tanihi Pawulo va chumayele “mahungu lamanene lawa ya mfumo” etindhawini hinkwato leti a ti ri kona hi nkarhi wolowo. (Matewu 24:14) Endzhaku ka malembe ya 30 Yesu a byele vadyondzisiwa vakwe leswaku va va timbhoni takwe, Pawulo u vule leswaku mahungu lamanene ma chumayeriwile “eka ntumbuluko hinkwawo lowu nga ehansi ka tilo.”—Vakolosa 1:23.