RIVONI ra muxaka wo karhi wa xitsayitsayi lexi vuriwaka Photuris lexi tsayitelaka ri funengetiwe hi mahakatimba yo tontswa lama engetelaka ku vangama ka ku vonakala loku humaka emirini wa xona. *

Xiya: Valavisisi va kume leswaku mahakatimba lamatsongo lama kumekaka eka switsayitsayi swin’wana ma yime ku fana ni mazenge, kumbe mahakatimba ya nhlampfi. Mahakatimba lawa ma tlakukela ehenhla hi kwalomu ka ti-micrometer tinharhu—nhlayo leyi nga ehansi ka milimitara ya ku tsindziyela ka nsisi wa munhu. Kambe ku tlakuka loku kutsongo ka mahakatimba ku endla leswaku rivoni leri ri voninga ngopfu ku tlula ndlela leyi a ri ta voninga ha yona loko mahakatimba lawa a ma nga tlakukanga!

Xana endlelo rero ri nga antswisa ndlela leyi mavoni lama vuriwaka light emitting diodes (LED), lama tirhisiwaka eka swilo swa elektroniki ma vangamaka ha yona? Leswaku van’wasayense va kumisisa mhaka yoleyo, va funengete mavoni ya LED hi xifunengeto lexi yelanaka ni xa rivoni ra xitsayitsayi. Xana ku endleke yini? Mavoni ya LED ma humese ku vonakala loku tlulakanyana ka xitsayitsayi xexo! Annick Bay, mutivi wa sayense ya swilo swa ntumbuluko u ri: “Nchumu wa nkoka ngopfu wa ntirho lowu hileswaku wu kombisa leswaku hi nga dyondza swo tala hi ku langutisisa ntumbuluko.”

U anakanya yini? Xana rivoni leri tsayitelaka ra switsayitsayi leswi vuriwaka Photuris ri lo tiendlekela kumbe ri lo endliwa?