LESWI VANHU VA SWI VULAKA

Van’wana va ehleketa leswaku mhaka ya Paradeyisi ko va ntsheketo ntsena. Kasi van’wana va pfumela leswaku Paradeyisi i ndhawu leyi fanaka ni ntanga wo saseka laha vanhu lavanene va nga ta tshama kona hilaha ku nga heriki va tlhela va endla mintirho leyi tsakisaka ni leyi vuyerisaka.

LESWI BIBELE YI SWI VULAKA

Rito leri nge “paradeyisi” ri tirhiseriwa ku kombetela eka kaya ro sungula ra vanhu, ku nga ntanga wa Edeni. (Genesa 2:7-15) Bibele yi hlamusela ntanga wolowo tanihi ndhawu ya xiviri laha mpatswa wo sungula a wu tshama kona handle ko xungetiwa hi mavabyi ni rifu. (Genesa 1:27, 28) Kambe leswi mpatswa wolowo wu nga xi yingisangiki Xikwembu, wu hlongoriwile ekaya rero leri nga paradeyisi. Hambiswiritano, vuprofeta byo tala bya Bibele byi vula leswaku enkarhini lowu taka vanhu va ta tiphina eParadeyisini leyi vuyeteriweke.

HA YINI YI FANELE YI VA YA NKOKA EKA WENA?

Loko Xikwembu xi hi rhandza, swa twala leswaku xi ta katekisa vagandzeri va xona vo tshembeka hi vutomi lebyi tsakisaka endhawini yo tano leyi nga Paradeyisi. Nakambe swa twala leswaku xi ta tivisa vanhu malunghana ni leswi va faneleke va swi endla leswaku va amukeleka eka xona. Bibele yi vula leswaku u nga amukeleka eka Xikwembu loko u dyondza ha xona naswona u yingisa swileriso swa xona.—Yohane 17:3; 1 Yohane 5:3.

“Yehovha Xikwembu a rima ntanga aEdeni . . . kutani a veka kona munhu loyi a n’wi vumbeke.”—Genesa 2:8.

LESWI VANHU VA SWI VULAKA

Van’wana va tshemba leswaku Paradeyisi yi le tilweni, kasi van’wanyana va vula leswaku yi ta va laha misaveni enkarhini lowu taka.

LESWI BIBELE YI SWI VULAKA

Paradeyisi yo sungula ya vanhu a yi ri laha misaveni. Xikwembu xi swi veke erivaleni leswaku misava i kaya ra vanhu hilaha ku nga heriki. Bibele yi vula leswaku Xikwembu xi vumbe pulanete ya hina leswaku yi tshama hilaha ku nga riki na makumu. (Pisalema 104:5) Nakambe yi ri: “Loko ku ri matilo, i matilo ya Yehovha, kambe misava u yi nyike vana va vanhu.”—Pisalema 115:16.

Kutani a swi hlamarisi leswi Bibele yi vulavulaka hi xitshembiso xa misava leyi nga Paradeyisi. Eka yona Xikwembu xi ta katekisa vanhu hi vutomi lebyi nga heriki naswona ku ta va ni ku rhula lokukulu. Switlhavi ni ku xaniseka swi ta va swi nga ha ri kona. Nakambe vanhu va ta kota ku tiphina hi ku helela hi swilo swo saseka leswi nga laha misaveni.—Esaya 65:21-23.

“Ntsonga wa Xikwembu wu le vanhwini, . . . rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:3, 4.

LESWI VANHU VA SWI VULAKA

Vukhongeri byo tala byi dyondzisa leswaku i vanhu lavanene ntsena lava nga ta tshama eParadeyisini. Kambe vo tala a va swi twisisi leswaku i yini leswi va faneleke va swi endla leswaku va tekiwa tanihi vanhu lavanene. Van’wana va ehleketa leswaku swi ringene ku ya ekerekeni loko ku ri ni minkhuvo ni ku vula swikhongelo leswi phindha-phindhiwaka.

LESWI BIBELE YI SWI VULAKA

Bibele yi dyondzisa leswaku “lavo lulama” va ta tshama eParadeyisini. Kambe i mani munhu wo lulama ematihlweni ya Xikwembu? A hi munhu loyi a endlaka mihivahivana ya vukhongeri byakwe kambe a ri karhi a honisa milawu ya Xikwembu. Bibele yi ri: “Xana Yehovha u tsakisiwa hi magandzelo yo hisiwa ni switlhavelo ku fana ni ku yingisa rito ra Yehovha? Waswivo! Ku yingisa swa antswa ku ri ni xitlhavelo.” (1 Samuwele 15:22) Kutani hi ku kongoma, vanhu “lavo lulama” lava nga ta tshama hilaha ku nga heriki eParadeyisini hi lava yingisaka milawu ya Xikwembu leyi tsariweke eBibeleni.

LESWI U NGA SWI ENDLAKA

Ku yingisa milawu ya Xikwembu swi katsa swo tala ku tlula ku hlanganyela eminkhubyeni ya vukhongeri. Mahanyelo ya wena ya siku ni siku ma nga ha tsakisa Xikwembu kumbe ma xi hlundzukisa. U nga dyondza ku tsakisa Xikwembu hi ku kambisisa Bibele hi vukheta. Nakambe swa olova ku xi tsakisa. Bibele yi vula leswaku “swileriso swa xona a swi tiki.” (1 Yohane 5:3) Xikwembu xi swi lava swinene ku ku katekisa hi ku ku nyika lunghelo ro hanya eParadeyisini hileswi u xi yingisaka.

“Lavo lulama va ta dya ndzhaka ya misava, va ta tshama eka yona hi masiku.”—Pisalema 37:29.