Timbhoni ta Yehovha ti endla ntirho wa nkoka wo pfuna vanhu ematikweni yo tlula 200. Kambe i matiko ya 35 ntsena eka matiko wolawo lama kumaka minyikelo leyi eneleke leswaku ma hakelela swikoxo swa wona. Xana swikoxo swi hakeleriwa njhani ematikweni lama nga evuswetini?

 Huvo leyi Fumaka yi kambisisa xiyimo xa Timbhoni ta Yehovha emisaveni hinkwayo leswaku ti ta gandzela Yehovha ni ku chumayela mahungu lamanene. Mali yi hleriwa hi vukheta ni ku tlhela yi tirhisiwa kahle. Loko rhavi ri kuma mali yo tala ku tlula leyi ri yi lavaka leswaku ri khathalela mitirho yo karhi, ri tirhisa mali yoleyo ku pfuna matiko lama nga riki na mali. Endlelo leri ri fambisana kahle ni xikombiso xa Vakreste vo sungula, lava pfunaneke leswaku “ku va ni ku ringana.” (2 Vakorinto 8:14) Va tirhise mali ya vona ku pfuna Vakreste lava a va nga ri na mali.

 Xana vamakwerhu lava kumeke mali ku suka emarhavini man’wana va titwa njhani? Hi xikombiso eTanzania, laha hafu ya vaakatiko va hanyaka hi mali ya le hansi ka tidolara timbirhi hi siku, mali yoleyo yi tirhisiwe ku pfuxeta Holo ya Mfumo leyi a yi tirhisiwa hi Vandlha ra le Mafinga. Vandlha rero ri tsale ri ku: “Ku sukela loko yi pfuxetiwile, ku ni vanhu vo tala lava taka etinhlengeletanweni ta hina! Ha wu khensa swinene nhlangano wa Yehovha ni vamakwerhu emisaveni hinkwayo hikwalaho ka malwandla ya vona, lava endleke leswaku hi tiphina hi ndhawu leyo saseka yo gandzela eka yona.”

 Vamakwerhu van’wana eSri Lanka a va pfumala swakudya hikwalaho ka ntungu wa COVID-19. Imara Fernando ni n’wana wakwe wa jaha Enosh, hi van’wana va vona. Kambe hikwalaho ka minyikelo leyi humaka ematikweni man’wana, va kume mpfuno lowu a va wu lava. Eka khadi leri va tiendleleke rona va tsale va ku: “Hi khensa vamakwerhu lava hi kombeke rirhandzu hi nkarhi lowu wo tika. Ha tsaka swinene ku va xiphemu xa ndyangu lowu naswona hi ya emahlweni hi khongela leswaku Yehovha a pfuna vamakwerhu hinkwavo enkarhini lowu wo tika.”

 Ku nga khathariseki laha vamakwerhu va tshamaka kona, va susumeteleke ku tsemelana nhloko ya njiya. Hi xikombiso, Enosh u endle u tiendlele xibokisana xitsongo xa minyikelo leswaku a ta pfuna mindyangu leyi nga evuswetini. Guadalupe Álvarez na yena u endla leswi fanaka. U tshama exiphen’wini xa Mexico laha vanhu va nga ri vangani va kumaka muholo wutsongo kumbe va nga kumiki nchumu hi ku helela. Kambe, u nyikela leswi a nga na swona eka nhlangano. U tsale a ku: “Ndza n’wi khensa Yehovha hikwalaho ka tintswalo ni rirhandzu rakwe. Ndza swi tiva leswaku minyikelo ya mina yi ta hlanganisiwa ni ya van’wana naswona yi ta tirhisiwa ku pfuna vamakwerhu lava pfumalaka.”

 Marhavi lama rhumelaka mali etindhawini leti nga evuswetini ma tsaka ku endla tano. Anthony Carvalho, xirho xa Komiti ya Rhavi eBrazil u ri: “Ku ringana malembe yo tala ntirho wa le tikweni ra ka hina a wu lava ku seketeriwa hi swa timali hi matiko man’wana. Hikwalaho ka nseketelo lowu, hi vone ku andza lokukulu. Sweswi, xiyimo xa hina xa timali xi cincile naswona se hi kota ku pfuna matiko man’wana. Vamakwerhu eBrazil va languta eka ntirho wo chumayela emisaveni hinkwayo kutani va vona leswaku va nga endla yini leswaku va pfuna.”

 Xana Timbhoni ta Yehovha ti nga va pfuna njhani vamakwerhu lava pfumalaka? Ti nga va pfuna hi nyikela eka ntirho wa misava hinkwayo, ku nga ri ku rhumela mali erhavini leri nga etikweni ro karhi. Leswi swi nga endliwa hi ku nyikela ebokisini leri nga evandlheni leri tsariweke leswaku “Ntirho Wa Misava Hinkwayo” kumbe ku nyikela hi ku tirhisa xiyenge lexi nge donate.isa4310.com. Minyikelo yoleyo hinkwayo ya tlangeriwa swinene.