Hi ku ya hi xiviko xa misava xa sweswinyana, a kwalomu ka munhu un’we eka vanhu va mune u na xivundza.

•   “Ku tihambanisa ni vanhu swi nga khumba munhu un’wana ni un’wana, swi nga ri na mhaka leswaku u ni malembe mangani kumbe u tshama kwihi.”​—Chido Mpemba, un’wana wa vatshamaxitulu va Commission on Social Connection va Nhlangano Wa Rihanyo Wa Misava Hinkwayo.

 Ku hambana ni leswi van’wana va swi ehleketaka, xivundza a xi hlaseli vanhu lava dyuhaleke kumbe lava tshamaka va ri voxe ntsena, kambe xi hlasela ni vantshwa, lava hanyeke kahle, lava humelelaka ni lava tekeke kumbe ku tekiwa. Ku tihambanisa ni vanhu ni xivundza swi nga onha rihanyo emirini ni le mitlhavekweni eka vanhu.

•   Dokodela Vivek Murthy, ku nga dokodela jenerala wa U.S. u ri: “Xivundza a ko va ku titwa hi ndlela yo biha ntsena.” U engetela a ku: “Vuyelo lebyikulu bya ku titwa u hambanisiwe ni vanhu bya fana ni vuyelo lebyi vangiwaka hi ku dzaha tisigarete ta 15 hi siku.”

 Muvumbi wa hina a nga swi lavi leswaku hi tihambanisa ni vanhu van’wana. Mikarhi hinkwayo xikongomelo xa Xikwembu hi vanhu a ku ri leswaku va tiphina hi vunghana lebyinene ni lebyi enerisaka.

•   Nawu wa Bibele: “Yehovha Xikwembu a ku: ‘A hi swinene leswaku munhu a tshama a ri yexe.’”​—Genesa 2:18.

 Xikwembu xi lava leswaku hi aka vuxaka na xona. Xi tshembisa leswaku xi ta tshinela eka hina loko hi tikarhatela ku tshinela eka xona.​—Yakobo 4:8.

•   Nawu wa Bibele: “Va tsaka lava tikarhatelaka ku va ni vuxaka ni Xikwembu, hikuva Mfumo wa matilo i wa vona.”​—Matewu 5:3.

 Xikwembu xi lava leswaku hi xi gandzela swin’we hi ri ni van’wana. Loko hi endla sweswo swa hi pfuna emitlhavekweni.

•   Nawu wa Bibele: “A hi khathalelaneni hi khutazana ku rhandzana ni ku endla mitirho leyinene, hi nga tshiki ku hlengeletana, . . . kambe hi khutazana.”​—Vaheveru 10:24, 25.

 Leswaku u kuma rungula leri engetelekeke ra lexi endlaka swi va swa nkoka ku lwisana ni xivundza, hlaya nhlokomhaka leyi nge, “Loneliness in a World of Mass Connection.”