Eka mavhiki ma nga ri mangani lama taka, vanhu va ta va va ri karhi va vhota ematikweni yo hambanahambana. Vanhu va le ku endleni ka xiboho xa nkoka swinene xa leswaku hi wihi murhangeri loyi va nga ta n’wi hlawula.

 Xana Bibele yi ri yini hi mhaka leyi?

 Bibele yi hlamusela swilo leswi varhangeri va namuntlha va nga kotiki ku swi endla.

•   “Mi nga tshembeli eka tihosana, kumbe eka munhu, hikuva a nge swi koti ku mi ponisa. Loko ku hefemula kakwe ku hela, u tlhelela entshurini; hi siku rero miehleketo yakwe ya lova.”—Pisalema 146:3, 4, nhlamuselo ya le hansi.

 Hambi ku ri varhangeri lava nga ni vuswikoti byo rhangela va fa. Ku engetela kwalaho, a va swi tivi loko mitirho ya vona leyinene yi ta sala yi endliwa hi vanhu lava nga ta va siva loko va nga ha ri kona.—Eklesiasta 2:18, 19.

 Bibele yi boxa ntiyiso lowu nga lo tlangandla erivaleni wa leswaku vanhu a va nga endleriwanga ku tifuma.

•   “Munhu la fambaka a nga ka a nga ma kongomisi magoza yakwe.”—Yeremiya 10:23.

 Xana u kona munhu loyi a nga vaka murhangeri lonene namuntlha?

 Bibele yi vula leswaku Xikwembu xi hlawule murhangeri loyi a nga ni vuswikoti swinene naswona a tshembekaka: Yesu Kreste. (Pisalema 2:6) Yesu i Hosi ya Mfumo wa Xikwembu lowu fumaka wu ri etilweni.—Matewu 6:10.

 Xana u ta hlawula ku amukela vurhangeri bya Yesu? Bibele yi hi byela lexi endlaka xivutiso lexi xi va xa nkoka:

•   “Xiximani n’wana leswaku Xikwembu xi nga hlundzuki kutani mi lovisiwa, hikuva xi hatla xi hlundzuka. Va tsaka hinkwavo lava tumbelaka eka xona.”—Pisalema 2:12.

 Lowu i nkarhi wa leswaku u endla xiboho. Vuprofeta bya le Bibeleni byi kombisa leswaku Yesu u sungule ku fuma hi lembe ra 1914 naswona ku nga ri khale, Mfumo wa Xikwembu wu ta herisa mifumo hinkwayo ya vanhu kutani ku fuma wona ntsena.—Daniyele 2:44.

 Leswaku u dyondza ndlela leyi u nga seketelaka vurhangeri bya Yesu hayona, hlaya nhlokomhaka leyi nge “Hlawula Ku Yima Ni Mfumo Wa Xikwembu Sweswi!”