Swirilo 3:1-66
-
Yeremiya a phofula matitwelo ni ntshembo wakwe
א [Aleph]
3 Ndzi munhu loyi a voneke vanhu va xaniseka hikwalaho ka nhonga ya ku hlundzuka kakwe.
2 U ndzi hlongorile kutani a ndzi fambisa emunyameni ku nga ri eku vonakaleni.+
3 Voko rakwe ri lwa na mina siku hinkwaro.+
ב [Beth]
4 U tsanise miri wa mina a hlakata nyama ya mina;U tshove marhambu ya mina.
5 U ake khumbi ri ndzi rhendzela; u ndzi rhendzele hi chefu yo bava+ ni hi maxangu.
6 U ndzi sindzise ku tshama etindhawini leti nga ni munyama, ku fana ni vanhu lava feke khale koloko.
ג [Gimel]
7 U ndzi rhendzerile hi makhumbi leswaku ndzi nga baleki;U ndzi bohe hi tinketana ta koporo to tika.+
8 Loko ndzi kombela mpfuno ndzi ri emaxangwini, a nga xi yingisi xikhongelo xa mina.+
9 U sive tindlela ta mina hi maribye lama vatliweke;U endle leswaku swi tika ku famba etindleleni ta mina.+
ד [Daleth]
10 U ndzi tumbelerile ku fana ni bere leswaku a ndzi hlasela, ku fana ni nghala leyi tumbeleke.+
11 U ndzi sindzise ku suka etindleleni ta mina a tlhela a ndzi phatlulela;U ndzi endle ndzi nga ha pfuni nchumu.+
12 U kunge vurha byakwe, a ndzi yimisa leswaku ndzi copiwa hi nseve.
ה [He]
13 U tlhave tinso ta mina hi miseve ya nkotloto* wakwe.
14 Ndzi hundzuke xihlekiso eka vanhu hinkwavo, va ndzi hlekula hi tinsimu ta vona siku hinkwaro.
15 U ndzi dyise swo bava, a ndzi endla ndzi tshamela ku nwa xibaha.+
ו [Waw]
16 U tshova matino ya mina hi swiribyana;U ndzi kasisa enkumeni.+
17 U ndzi tsona ku rhula; ndzi rivale leswi nga swinene.
18 Kutani ndzi ri: “Ku vangama ka mina ku herile ni ku langutela ka mina eka Yehovha.”
ז [Zayin]
19 Tsundzuka ku xaniseka ka mina ni leswaku a ndzi na kaya,+ tsundzuka leswaku ndzi dya xibaha ni chefu yo bava.+
20 U ta tsundzuka kutani u ta u ta ndzi pfuna.+
21 Ndzi tsundzuka mhaka leyi; hi yona yi endlaka ndzi rindza.+
ח [Heth]
22 A hi herisiwanga hikwalaho ka rirhandzu ra Yehovha,+Hikuva tintswalo takwe a ti heli.+
23 I tintshwa mixo wun’wana ni wun’wana;+ wa tshembeka mikarhi hinkwayo.+
24 Ndzi te: “Yehovha i ndzhaka ya mina,+ hi swona swi endlaka ndzi n’wi rindza.”+
ט [Teth]
25 Yehovha hi lonene eka loyi a n’wi tshembaka,+ eka loyi a tshamaka a ri karhi a n’wi lava.+
26 I swinene leswaku munhu a rindzela+ ku ponisiwa hi Yehovha a miyerile.+
27 I swinene ku va munhu a langutana ni maxangu loko a ha ri muntshwa.+
י [Yod]
28 A a tshame a ri yexe a miyela loko Xikwembu xi ma pfumelela.+
29 A a titsongahate swinene xikandza xakwe xi khumba ntshuri;+ kumbexana ku nga ha va ku ri ni ntshembo.+
30 A a n’wi nyike rhama loyi a n’wi baka; a a khomiwe hi tingana swinene.
כ [Kaph]
31 Hikuva Yehovha a nge hi cukumeti hilaha ku nga heriki.+
32 Hambileswi a hi vangeleke gome, u ta tlhela a kombisa tintswalo ku ya hi rirhandzu rakwe lerikulu.+
33 Hikuva a nga swi tsakeli ku xanisa vanhu kumbe ku va twisa ku vava.+
ל [Lamed]
34 Ku kandziyela vabohiwa hinkwavo va laha misaveni hi milenge yakwe,+
35 Ku ka a nga kombisi munhu vululami emahlweni ka La Nge Henhlahenhla,+
36 Ku kanganyisa munhu loko ku tengiwa nandzu wakwe,Yehovha a nga swi pfumeleli swilo swo tano.
מ [Mem]
37 I mani loyi a vuleke swo karhi kutani swi humelela loko ku nga ri Yehovha a leriseke leswaku swi humelela?
38 Enon’wini wa La Nge HenhlahenhlaA ku humi swilo swo biha ni leswinene hi nkarhi wun’we.
39 Hikwalaho ka yini munhu* a fanele a vilela hi vuyelo bya xidyoho xakwe?+
נ [Nun]
40 A hi kambisiseni tindlela ta hina hi ti lavisisa,+ hi tlhelela eka Yehovha.+
41 A hi kombeleni eka Xikwembu ematilweni hi timbilu ta hina hinkwato, a hi tlakuseni mavoko ya hina hi ku:+
42 “Hi dyohile hi tlhela hi xandzuka,+ wena a wu hi rivalelanga.+
ס [Samekh]
43 U sive ndlela yo tshinela eka wena u hlundzukile;+U hi hlongorisile u hi dlaya a wu hi twelanga vusiwana.+
44 U sive ndlela yo tshinela eka wena hi papa, leswaku xikhongelo xa hina xi nga fiki eka wena.+
45 U hi endle nchumu wo hlekuriwa ni thyaka exikarhi ka vanhu.”
פ [Pe]
46 Valala va hina hinkwavo va hi hleka.+
47 Hi tshama hi ri karhi hi chava naswona hi phasekile,+ a ha ha ri na ntshembo naswona hi tshikilelekile.+
48 Ematihlweni ya mina ku khuluka swinambyana swa mati hikwalaho ka ku wa ka nhwanyana wa vanhu va mina.+
ע [Ayin]
49 Ndzi tshama ndzi ri karhi ndzi rila,+
50 Kukondza Yehovha a languta a ri etilweni a swi vona.+
51 Ndzi karhatekile hileswi matihlo ya mina ma swi voneke eka vanhwanyana hinkwavo va muti wa mina.+
צ [Tsade]
52 Valala va mina va ndzi hlotile ku fana ni xinyenyana, ku nga ri na xivangelo.
53 Va herise vutomi bya mina emugodini; va ndzi hoxetele hi maribye.
54 Mati ma khulukele enhlokweni ya mina kutani ndzi te: “Ndzi lovile!”
ק [Qoph]
55 Yehovha Xikwembu xanga, ndzi vitane vito ra wena, ndzi ri emugodini lowu enteke ngopfu.+
56 Twana rito ra mina; pfula ndleve ya wena leswaku yi ndzi twa loko ndzi kombela ku pfuniwa.
57 U tshinerile hi siku leri ndzi ku vitaneke ha rona. U te: “U nga chavi.”
ר [Resh]
58 Yehovha u ndzi lwerile ehubyeni, u ponise vutomi bya mina.+
59 Yehovha Xikwembu xanga, u vone swilo swo biha leswi ndzi endliweke swona; ndzi kombela u ndzi avanyisela hi ndlela yo lulama.+
60 U vone ku rihisela ka vona hinkwako ni leswi va kunguhataka ku ndzi endla swona.
ש [Sin] kumbe [Shin]
61 Yehovha u va twile loko va ndzi hlekula ni leswi va kunguhataka ku ndzi endla swona,+
62 Marito ya milomu ya vakaneti va mina ni ku ndzi hleva ka vona siku hinkwaro.
63 Va langute; loko va tshamile kumbe va yimile va ndzi hlekula hi tinsimu ta vona!
ת [Taw]
64 Yehovha, u ta va hakela hi ku ya hi swiendlo swa vona.
65 U ta va rhukana hi ku endla leswaku va va ni timbilu to nonon’hwa.
66 U ta va hlongorisa u hlundzukile, u va herisa ehansi ka matilo ya Yehovha.
