Mavidiyo Aamu Bbaibbele Aajisi Njiisyo Ziyandika Kapati
Mavidiyo mafwaafwi aaya alaingula mibuzyo yamu Bbaibbele iiyandika kapati, mbuli yakuti: Nkaambo nzi Leza ncaakailengela nyika? Ino bafwide bali muciimo nzi? alimwi awakuti Nkaambo nzi Leza ncalekelede kupenga?
Sena Leza Nkwali Ncobeni?
Amubone ibumboni bwakuti kusyoma muli Leza ncintu camaano.
Sena Leza Ulijisi Zina?
Leza ulijisi mazina aabulemu manji, kubikkilizya aakuti Singuzuzyoonse, Mulengi, alimwi a Mwami. Pele zina lya Leza limugeme lilajanika mu Bbaibbele ziindi ziinda ku 7,000.
Sena Cilakonzyeka Kuba Acilongwe a Leza?
Kwamyaka minji, ibantu balikulimvwa kuti bayelede kumuzyiba Mulengi wabo. Bbaibbele lilakonzya kutugwasya kuba mulongwe wa Leza. Cilongwe eeco cilatalika kwiinda mukwiiya zina lya Leza.
Ino Sikwaanza Bbaibbele Nguni?
Ikuti naa lyakalembwa abantu, sena cileelela kuliita kuti ndi Jwi lya Leza? Ino mizeezo yani iili mu Bbaibbele?
Ino Inga Twasinizya Buti Kuti Bbaibbele Ndyamasimpe?
Ikuti naa Bbaibbele lyakalembwa a Leza, lyeelede kwiindana amabbuku aambi.
Ino Leza Wakailengela Nzi Nyika?
Nyika nimbotu kapati. Ibikkidwe abusena buli kabotu kapati kuzwa kuzuba, taisendekede kapati, alimwi taibaliki kapati ciindi noizinguluka. Nkaambo nzi Leza ncaakabikkila kapati maano ciindi naakali kupanga nyika?
Ino Buumi Bujisi Mpindu Nzi?
Amubone ncomweelede kucita kutegwa mujane lukkomano lwini-lwini ampindu mubuumi.
Ino Bafwide Bali Muciimo Nzi?
Bbaibbele lisyomezya ciindi bantu banji bafwide nobayoobusyigwa, mbubwenya mbwaakabusyigwa Lazaro.
Ino Jesu Wakafwida Nzi?
Bbaibbele lyaamba kuti lufwu lwa Jesu lulayandika kapati. Sena lufwu lwakwe kuli ncolwakazuzikizya?
Ino Bwami bwa Leza Ninzi?
Mumulimo wakwe woonse, Jesu wakayiisya kapati kujatikizya Bwami bwa Leza kwiinda makani aambi. Kwamyaka minji, basikumutobela balikubupailila Bwami oobo kuti buboole.
Bwami bwa Leza Bwakatalika Kulela mu 1914
Myaka 2,600 yainda, Leza wakasololela mwami ulaanguzu kulota ciloto icili mukuzuzikizyigwa lino.
Nyika Yakacinca Kuzwa mu 1914
Bukkale bwamunyika alimwi amuuya wabantu kuzwa mu 1914 zitondezya kuti businsimi bwamu Bbaibbele kujatikizya “mazuba aamamanino” buli mukuzuzikizyigwa.
Sena Leza Nguupa Kuti Ntenda Zilicitikila Kazicitika?
Bantu bobilo bakacitikilwa ntenda balapandulula ncobaiya mu Bbaibbele.
Nkaambo Nzi Leza Ncalekelede Kupenga?
Bantu banji balabuzya kaambo nyika ncoizwide kusulaikana akupenga. Bbaibbele lilapa bwiinguzi bukkazika moyo alimwi buumbulizya.
Sena Leza Ulabukkomanina Bukombi Boonse?
Bantu banji basyoma kuti tacikwe makani acikombelo muntu nkwazulilwa.
Sena Leza Ulakuzumizya Kubelesya Zikozyanyo Mubukombi?
Sena inga zyatugwasya kuba acilongwe a Leza ngotutakonzyi kubona?
Sena Leza Ulaiswiilila Mipailo Yoonse?
Ino mbuti kuti muntu wapailila buyo zintu zigwasya nguwe alikke? Ino mwaalumi uupenzya mukaintu wakwe mpoonya amana wapaila kulomba zileleko kuli Leza?
Ino Leza Ucibona Buti Cikwati?
Leza uyanda kuti cikwati canu cizwidilile. Lulayo lubotu lwamu Bbaibbele lwabagwasya banabukwetene banji.
Sena Kweebelela Zintu Ziletela Muzeezo Wakoonana Nkubisizya Leza?
Sena bbala lyakuti “ziletela muzeezo wakoonana” nkolili mu Bbaibbele? Mbuti mbotukonzya kuzyiba Leza mbwalimvwa kujatikizya zintu ziletela muzeezo wakoonana?