Ibbaibbele cakusalazya litondezya kuti Jesu tanaakakwete, nokuba kuti talyaambi cacigaminina kuti wakalikwete naa pe. a Amulange-lange makani aaya aatobela.

1.   Ibbaibbele cakwiinduluka-induluka lilawaamba mukwasyi wa Jesu alimwi abamakaintu ibakali kumusangana naakali kucita mulimo wakwe alimwi ibakaimvwi munsi-munsi ciindi naakali kujaigwa, pele kunyina nolyaamba kuti wakalijisi mukaintu. (Matayo 12:46, 47; Marko 3:​31, 32; 15:40; Luka 8:​2, 3, 19, 20; Johane 19:25) Ikaambo kapati Bbaibbele ncolitaambi cili coonse mumakani aaya nkakuti tanaakakwete.

2.   Kujatikizya baabo ibazumanana kukkala kabatakwete naa kukwatwa kutegwa bacite zinji mumulimo wa Leza, Jesu wakaambila basikwiiya bakwe kuti: “Ooyo uukonzya kuzumanana kakunyina kukwata, akkale mbubonya oobo.” (Matayo 19:10-​12) Wakapa cikozyanyo kuli baabo basala kutakwata naa kutakwatwa kutegwa babelekele Leza cakumaninina.​—Johane 13:15; 1 Bakorinto 7:​32-​38.

3.   Katanafwa Jesu, wakabikka bubambe bwakulanganya banyina. (Johane 19:25-​27) Ikuti Jesu naakalikwete naa naakalijisi bana, naakabikka bubambe bwakuti banamukwasyi aabo abalo kabalanganizyigwa.

4.   Ibbaibbele lyaamba Jesu kuba cikozyanyo cabalumi, pele talyaambi kujatikizya mbwaakali kweendelezya mukaintu. Muciindi caboobo, lyaamba kuti: “Nobalumi, amuzumanane kubayanda bakaintu banu, mbubonya awalo Kristo mbwaakayanda mbungano akulyaaba akaambo kanjiyo.” (Baefeso 5:​25) Ikuti Jesu naakalikwete ciindi naakali anyika, sena cikozyanyo cakwe cilondokede cakuba mulumi nocatakabelesyegwa ncico mukapango aaka?

 Inzya, Jesu wakalijisi banabokwabo bali cisambomwe. Aaba bakali kubikkilizya banabokwabo basankwa ba Jakobo, Josefa, Simoni, alimwi a Juda, alimwi wakalijisi abanabokwabo basimbi bobilo. (Matayo 13:54-​56; Marko 6:3) Banabokwabo aaba bakali bana bakulizyalila ba Mariya, banyina Jesu, alimwi amulumi wakwe, Josefa. (Matayo 1:​25) Ibbaibbele lyaamba Jesu kuti ngowakali mwana wa Mariya “mutaanzi kuzyalwa,” calo icipandulula kuti Mariya wakalijisi bana bambi.​—Luka 2:7.

 Kutegwa bazuminizye muzeezo wakuti Mariya wakali nakalindu mubuumi bwakwe boonse, bamwi bapa bupanduluzi bwiindene-indene kubbala lyakuti “banabokwabo.” Mucikozyanyo, bamwi bayeeya kuti banabokwabo Jesu bakali bana ba Josefa mbaakazyala kumukaintu ngwaakakwete kaindi. Nokuba boobo, Bbaibbele litondezya kuti Jesu ngowakazumizyidwe amulawo kukona bweendelezi bwakasyomezyedwe kuli Davida. (2 Samuele 7:​12, 13; Luka 1:​32) Kuti Josefa naakalijisi bana basankwa bapati kuli Jesu, nkokuti mwana musankwa mupati kwiinda boonse wa Josefa ngowakali kuyoopegwa nguzu zyabweendelezi.

 Sena bupanduluzi oobu bwaamba basikwiiya ba Jesu, naa banabokwabo Jesu bakumuuya? Muzeezo ooyu ulakazyanya a Magwalo, mbwaanga Bbaibbele lyaamba kuti aciindi cimwi “banabokwabo tiibakali kumusyoma.” (Johane 7:5) Ibbaibbele lilabaandaanya banabokwabo Jesu kuli basikwiiya bakwe.​—Johane 2:​12.

 Njiisyo imwi yaamba kuti banabokwabo Jesu mubwini bakali beeninyina. Pele Magwalo aa Chigiliki abelesya mabala aaindene-indene kwaamba ‘mwanookwanu,’ ‘musazinyoko’ alimwi ‘amweeninyoko.’ (Luka 21:16; Bakolose 4:​10) Basikwiiya Bbaibbele banji balazumina kuti banabokwabo Jesu basankwa alimwi abasimbi bakali banabokwabo ncobeni. Mucikozyanyo, ibbuku lyakuti The Expositor’s Bible Commentary lyaamba kuti: “Inzila mbotu yakumvwisya bbala lyakuti ‘banabokwabo’ . . . njakuti bbala eeli lyaamba bana basankwa ba Mariya alimwi a Josefa nkokuti banabokwabo Jesu kulubazu lwabanyina.” b