Mwezi amwezi, tulalangila mapulogilamu aakumuuya alimwi amavidiyo a JW Broadcasting. Nokuba boobo, bakwesu banji mu Africa tabakonzyi kwaayebelele mapulogilamu aaya kubelesya intaneti. Nkaambo nzi?

 Bunji bwamasena mu Africa kunyina Intaneti. Kumasena nkoibede, ilakatazya kujata naa iladula kapati. Mucikozyanyo, mulangizi wabbazu ku Madagascar wakaunka kuyoodauniloda JW Broadcasting yaamwezi abusena mpobabbadelesya intaneti kubanamaleya. Wakabbadelesyegwa $16, mali ngakonzya kubelekela muntu munsondo yomwe! a

 Lino nokuba kuti kuli buyumuyumu oobu, bantu banji mu Africa balakonzya kweebelela JW Broadcasting kakunyina kubelesya intaneti. Munzila nzi?

 Kuzwa mu 2017, bantu bakkala mu sub-Saharan Africa balakonzya kweebelela JW Broadcasting kubelesya channel yaa TV iijanika a satellite. Channel eeyi taibbadelesyegwi, alimwi ilatambisya mawoola aali 24 mubuzuba, mazuba aali 7 mumvwiki, mumyaambo iili 16.

 Kutegwa cicitike eeci, Bakamboni ba Jehova balapa kkontirakiti kuli ba TV station imwi kutegwa batambisye JW broadcast kubelesya satellite yabo. Satellite njobabelesya ilatambisya mumasi aali 35 mu sub-Saharan Africa. Kumane kkontilakiti eeyi ibbadelelwa mali aasika ku $12,000 amwezi. Kuyungizya waawo, ciindi aciindi kulabbadelwa mali aamwi kutegwa batambisye mapulogilamu aamwi naacitika ku channel iimbi. Eeci cigwasya kuti bantu banji bacikonzye kweebelela miswaangano yacooko amapulogilamu aamwi aalubazu aajatikizya kuswaya kwamitabi.

 Bantu banji, kubikkilizya abaabo batali Bakamboni, baleebelela mapulogilamu aaya a TV yabo kuŋanda. Nokuba boobo, bakwesu bali mbobabede tabacikonzyi kuula zibelesyo ziyandika kutegwa beebelele mapulogilamu aa satellite channel. Kutegwa bali boobu bagwasyigwe, ku Maanda aa Bwami aayinda ku 3,670 kwabikkwa zibelesyo zikonzya kupa kuti bakwesu abacizyi kabeebelela JW Broadcasting a satellite channel. Mali aazibelesyo eezyi, kubikkilizya aakuzitola nkoziya alasika ku $70 ikuti naa Ŋanda ya Bwami kaijisi kale TV naa projector. Buyo-buyo, zyoonse ziyandika inga zyasika ku $530.

 Bakwesu abacizyi balalumba kapati akaambo kabubambe oobu. Mwaalu umwi ku Cameroon wakaamba kuti: “Bubambe oobu buli mbuli kuti mukwasyi wesu wapegwa mana mucimpayuma.” Ba Odebode, mukwesu umwi ku Nigeria, bakaamba kuti: “Tuleebelela ku channel eeyi ziindi zyotatwe mumvwiki mbuli mukwasyi. Bana bangu lyoonse balazilangila ziindi eezyi. Mane buya aziindi zimwi balalomba kuti tweebelele ku channel eeyi muciindi cakweebelela kuma channel aambi.” Ba Rose, abalo baku Nigeria, bakaamba kuti: “Ndilikkomene kwaamba kuti channel eeyi yapa kuti ndicesye-cesye kweebelela ma channel aanyuuzi. Ndanikweebelela nyuuzi, ndakali kunyema kapati anzyondakali kweebelela calo icakali kupa BP yangu kutanta. Pele JW Broadcasting ilayaka alimwi ipa luumuno lwamumizeezo! Ndilaikkomanina kapati. Ncilongezyo cipati kuzwa kuli Jehova.”

 Mulangizi wabbazu umwi ku Mozambique wakaamba kuti mubbazu lyakwe, mu Maanda aa Bwami kwakabikkwa zibelesyo ziyandika kutegwa kabeebelela ku channel eeyi. Bakwesu bali mumbungano eezyi balafwambaana kusika a Ŋanda ya Bwami, andiza woola lyomwe naa obilo kaitanatalika miswaangano kutegwa kabeebelela JW Broadcasting.

 Kumuswaangano wamasi ku Johannesburg, South Africa mu 2019, channel eeyi yakabelesyegwa kutambisya makani aakali kuyandika kapati, kubikkilizya ayaayo aakapegwa abamu Kabunga Keendelezya, kumasena aambi aali 9. Mukwesu Sphumelele, uubelekela ku Broadcasting Department kumutabi waku South Africa, wakaamba kuti: “Nikwali kuti mazuba aakaindi, nitwakatambisya makani aaya kubelesya intaneti. Pele eeci ciyandika intaneti iibeleka kabotu alimwi amali. Channel ya JW eeyi taiduli amana ilasyomeka.”

 Zyakusanga zyanu kumulimo wanyika yoonse zyapa kuti bakwesu abacizyi banji ku Africa kabeebelela JW Broadcasting kubelesya satellite. Tulamulumba kapati kuzyakusanga nzyomwakapa kwiinda mukubelesya nzila ziindene-indene zijanika a donate.isa4310.com.