Sena muli akati kamamiliyoni aabantu bajatikizyidwe akaambo kakunyongana kwamuwo? Ikuti muwo wanyongana cipa kuti kucitike zintu ziindene-indene. Mucikozyanyo, imvwula mpati ilakonzya kupa malundu kweenzemuka, alimwi maguwo apa kuti kube lulabo lukonzya kutalisya mulilo wamusyokwe. Cilanga alimwi akupya citaambiki azyalo zilakonzya kunyonyoona kapati.

 Mumasena manji, muwo uunyonganya uyaabwiindila alimwi wanyonyoona kapati kwiinda kaindi. Iba International Federation of Red Cross and Red Crescent Societies bakapa lipooti yakuti, “Mweelwe wabantu ibajatikizyigwa antenda zilicitikila uyaabukomena. Cili boobo akaambo kakuti kupaya kwamaanzi, maguwo alimwi acilanga zilacitika-citika kwiinda kaindi. Akaambo kazintu eezyi bantu banji balafwa, bamwi cilabakatazya kujana zintu ziyandika alimwi banji basweekelwa maanda aabo.”

 Ciindi zintu eezyi nozicitika, bantu balapenga kumubili alimwi amumizeezo. Balakonzya kupenga akaambo kakusweekelwa lubono, maanda aabo naa ambweni kufwidwa bayandwa babo.

 Ikuti naa mulijatikizyidwe akaambo kakunyongana kwamuwo, Bbaibbele lilakonzya kumugwasya. Lilapa luumbulizyo, bulangizi, alimwi alulayo lugwasya, lwalo lwagwasya bantu banji bajatikizyidwe antenda ziboola akaambo kakunyongana kwamuwo. (Baroma 15:4) Kuyungizya waawo, lilaingula mibuzyo iiyandika kapati yalo bantu banji njobalibuzya, mbuli yakuti: Nkaambo nzi Leza ncaazumizya eeci kucitika? Sena undisubula buya?

 Bbaibbele liyiisya kuti Leza talinguwe uupa kuti bantu kabapenga. Litusyomezya kuti “kunyina muntu uunga wasunka Leza azintu zibyaabi alimwi walo mwini tasunki muntu uuli woonse azintu zibyaabi.” (Jakobo 1:13) Eeci caamba kuti talinguwe uupa kuti muwo kaunyongana.

 Bbaibbele lilaamba ziindi Leza naakabelesya zilengwaleza kusubula basizibi. Pele izyakali kucitika aciindi eeco ziliindene antenda zicitika mazuba aano, zyalo ziboola kakunyina kucenjezya alimwi zinyonyoona basizibi antoomwe abacita zibotu. Mukwiimpana, Bbaibbele litondezya kuti lyoonse Leza wakali kubakwabilila bantu batakwe mulandu, kubacenjezya kakucili ciindi, alimwi akubaambila kaambo ncaakali kubwezela ntaamu. Mucikozyanyo, Leza wakaamba kaambo ncaakaletela Zambangulwe mumazuba aa Nowa, wakabacenjezya kakucili ciindi, alimwi wakamufwutula Nowa amukwasyi wakwe.—Matalikilo 6:13; 2 Petro 2:5.

 Kutegwa muzyibe zinji kujatikizya mbotuzyi kuti ntenda zyamazuba aano tacili cisubulo kuzwa kuli Leza, amubone cibalo cakuti “Ino Bbaibbele Lyaamba Nzi Kujatikizya Ntenda Zilicitikila?”

 Bbaibbele lyaamba kuti Jehova a Leza ulabikkila maano alimwi uleetezyegwa. Amubone tupango tuumbulizya itutobela.

•   Isaya 63:9: “Mumapenzi aabo oonse wakali kupenga mumoyo [Leza].”

   Bupanduluzi: Cilamucisa Jehova kubona bantu kabapenga.

•   1 Petro 5:7: “Ulamubikkila maano.”

   Bupanduluzi: Jehova ulabubikkila maano buumi bwesu.

 Kubikkila maano kwa Jehova alimwi alweetelelo zimupa kubweza ntaamu. Ulatuumbulizya kwiinda mukutupa lulayo lugwasya mu Bbaibbele alimwi abulangizi bwakumbele ikunoonyina ntenda ziboola akaambo kakunyongana kwamuwo.—2 Bakorinto 1:3, 4.

 Bbaibbele liyubununa cisyomezyo ca Jehova ‘cakumupa buumi bwakumbele bubotu alimwi abulangizi.’ (Jeremiya 29:11) Uyanda kuti bantu bakakkomane abuumi muparadaiso anyika, kakunyina kuyoowa kuti muwo ulabaletela ntenda.—Matalikilo 1:28; 2:15; Isaya 32:18.

 Leza uyakubelesya Bwami bwakwe, nkokuti mfwulumende yakujulu iinooyendelezyegwa a Jesu Kristo, kupa kuti bulangizi oobu bubotu bucitike. (Matayo 6:10) Jesu ulijisi busongo alimwi anguzu zyakulesya ntenda zilicitikila. Ciindi naakali anyika, wakazitondezya nguzu zyakwe kwiinda mukweendelezya muwo. (Marko 4:37-41) Uyakweendelezya cabusongo alimwi camaano, akuyiisya bantu mbobeelede kulanganya nyika munzila iitakonzyi kunyonganya zilengwaleza. (Isaya 11:2) Mubweendelezi bwakwe, bantu kunyina nobayakupenga alimwi akaambo kakunyongana kwamuwo.

 Mulakonzya kulibuzya kuti, ‘Ino ndilili Jesu nayakubelesya nguzu zyakwe ikweendelezya muwo?’ Kutegwa mujane bwiinguzi kumubuzyo ooyu, amubone cibalo cakuti “Ino Bwami bwa Leza Buyootalika Lili Kweendelezya Nyika?”

 Lulayo lwamu Bbaibbele lulakonzya kumugwasya noitanacitika ntenda, noyacitika, anoyainda.

•   Noitanacitika: Amulibambile kubweza ntaamu cakufwambaana.

   Ncolyaamba Bbaibbele: “Muntu uucenjede abona mapenzi ulayuba, pele aabo batakwe maano balaunka nkukonya ooko, aboobo balapenga.”—Tusimpi 22:3.

   Bupanduluzi: Amuzizyibe ntenda zikonzya kucitika kubusena nkomukkala kutegwa mukonzye kubweza ntaamu cakufwambaana akukwabilila mukwasyi wanu.

   Cakuluula: “Buzuba nokwakabbuka mulilo wamusyokwe, twakalilibambilide. Twakanyamuna mabbeeke ngotubelesya nokwacitika ntenda aajisi misamu alimwi azyakusama. Basimukoboma bakalilibilikide alimwi tiibakali kuyeeya kabotu. Pele swebo twakalijisi nzyotwakali kuyandika. Akaambo kaceeci ndilikkomene kapati!”—Ba Tamara, baku California, U.S.A.

•   Noyacitika: Amubikkile maano kuzintu ziyandika kapati.

   Ncolyaamba Bbaibbele: “Nokuba kuti muntu kajisi zintu zinji buti, ibuumi bwakwe tabuzwi kuzintu eezyo nzyajisi.”—Luka 12:15.

   Bupanduluzi: Buumi bulayandika kapati kwiinda zintu.

   Cakuluula: “Ciindi guwo mpati iitegwa Lawin b noyakanyonyoona ŋanda yesu, tiindakazyi cakucita. Pele comwe ncondakacita nkupaila camoyo woonse kuli Jehova Leza. Ndakayeeya kuti zyakali buyo zintu zyakumubili nzyotwakasweekelwa kutali maumi eesu.”—Ba Leslie, baku Philippines.

•   Noyainda: Amuyeeye zyabuzuba bwasunu, kutali kulibilika zyajuunza.

   Ncolyaamba Bbaibbele: “Mutanoolibiliki zyabuzuba butobela, nkaambo buzuba butobela bunoojisi zyakulibilika zyambubo.”—Matayo 6:34.

   Bupanduluzi: Tamweelede kuciindizya kulibilika kujatikizya zintu zikonzya kucitika kumbele.

   Cakuluula: “Imvwula yaguwo mpati iitegwa Hurricane Irma yakapa kuti maanzi apaye muŋanda yesu, aboobo ndakeelede kupanga zyakusala zinji alimwi ndakalikopene kapati mumizeezo. Ndakasola kutobela lulayo lwamu Bbaibbele lwakutalibilika kujatikizya zintu zyabuzuba butobela. Ndakabona kuti kwiinda mukugwasyigwa a Jehova, ndakali kukonzya kuliyumya muzintu zinji kwiinda mbondakali kuyeeyela.”—Ba Sally, baku Florida, U.S.A.

 Kutegwa muzyibe nzila izimbi zikonzya kumugwasya, amubone cibalo cakuti “Ciindi Nokwacitika Ntenda—Nzila Zikonzya Kugwasya Kufwutula Bantu.”