Ncuubauba kuyeeya kuti Saatani ngotubala mu Bbaibbele mbubi buyo mbotubona. Pele sena aayo masimpe ncobeni kujatikizya Bbaibbele ncoliyiisya? Ikuti naa mboobo, ino nkaambo nzi Bbaibbele ncolyaamba kuti Saatani wakali kwaambaula a Jesu Kristo alimwi a Leza Singuzuzyoonse lwakwe kumugama? Atwiilange-lange mibandi eeyo yobilo.

Ciindi Jesu naakatalika mulimo wakwe, Diabolosi wakasoleka kumuyunga kwiinda mukumusunka ziindi zyotatwe. Mumusunko wakusaanguna, Saatani wakakanzide kuyunga Jesu kuti abelesye nguzu nzyaakapegwa kuli Leza munzila iiteelede kutegwa amane nzala njaakajisi. Mpoonya, Diabolosi wakaambila Jesu kuti abikke buumi bwakwe muntenda acaali kutegwa alijanine mpuwo. Mumusunko wamamanino, Saatani wakatondezya Jesu bweendelezi bwamami oonse aamunyika kuti alakonzya kuba aakwe ikuti naa wamukomba kwakaindi kasyoonto buyo. Jesu wakaazunda masunko oonse otatwe aakaboola munzila yabucenjezu, alimwi lyoonse naakali kwiingula, wakali kubelesya Magwalo.—Matayo 4:1-11; Luka 4:1-13.

Ino Jesu wakali kwaambaula ani? Sena wakali kubandika abube bubi ibwakali mulinguwe? Kweelana a Magwalo, Jesu “wakasunkwa munzila zyoonse mbulindiswe, pele watakacita cibi.” (Bahebulayo 4:15) Alimwi Bbaibbele lyaamba kuti: “Tanaakacita cibi, alimwi kunyina lweeno lwakajanwa mukanwa lyakwe.” (1 Petro 2:22) Jesu wakazumanana kuba muntu uulondokede alimwi uusyomeka. Kunyina naakalekela bube bubi buli boonse kutalika mulinguwe. Cakusalazya, Jesu kunyina naakali kwaambaula abube bubi ibwakali mulinguwe; pele wakali kwaambaula amuntu mwini-mwini.

Mubandi nguwenya ooyu ulayubununa bumboni abumbi bwakuti Saatani muntu mwini-mwini.

• Amuyeeye kuti Diabolosi wakasyomezya kupa Jesu bweendelezi bwanyika yoonse ikuti naa wamukomba asyoonto. (Matayo 4:8, 9) Kukombwa ooku nokwakabula ncokwaamba ikuti Saatani naatakali muntu mwini-mwini. Kuyungizya waawo, Jesu kunyina naakazumbauzya kuti Saatani ngomweendelezi wanyika.

• Jesu naakamana kwaazunda masunko aaya, Diabolosi “wakamuleka kusikila aciindi cimbi ceelede.” (Luka 4:13) Kujatikizya makani aaya, sena Saatani ulibonya kuba bube buyo bubi naa sinkondo mwini-mwini uuzumanana?

• Amuyeeye kuti “bangelo bakaboola akutalika kumukutaukila” Jesu. (Matayo 4:11) Sena bangelo aabo bakali bantu bamuuya beni-beni ibakali kumukulwaizya alimwi akumugwasyilizya Jesu? Inzya! Ikuti kacili boobo, nkaambo nzi Saatani ncotunga twamuyeeyela kuba cintu cimwi buyo kutali cilenge camuuya cini-cini?

Lino atubandike makani aajatikizya mwaalumi uuyoowa Leza, Jobu. Cibalo eeci citondezya mibandi yobilo yakali akati ka Leza alimwi a Diabolosi. Mubukkale boonse bobilo, Leza wakamulumbaizya Jobu akaambo kakusyomeka kwakwe. Saatani wakaamba kuti Jobu wakali kubelekela Leza akaambo kazintu nzyaakajisi, icaamba kuti Leza wakali kukombelezya Jobu kuti kasyomeka kulinguwe. Mubwini, Diabolosi wakali kulitaminina kuti wakalimuzyi kabotu Jobu kwiinda Leza mbwaakamuzyi. Jehova wakazumizya Saatani kuti anyange Jobu lubono, bana bakwe, mane buya akupa kuti aciswe. * Mukuya kwaciindi, cakazoolibonya kuti Jehova wakaliluzi kumakani oonse ngaakaamba kujatikizya Jobu, pele Saatani wakalibonya kuti mubeji. Aboobo Leza wakamulongezya Jobu akaambo kakusyomeka kwakwe.—Jobu 1:6-12; 2:1-7.

Mumibandi yoonse yakali akati ka Leza alimwi a Saatani, sena Jehova wakali kubandika abube bubi ibuli mulinguwe? Ibbaibbele lyaamba kuti: “Inzila ya Leza mwini-mwini ililondokede.” (2 Samuele 22:31) Ijwi lya Leza alimwi lyaamba kuti: “Ulasalala, ulasalala, ulasalala Jehova Leza, Singuzuzyoonse.” (Ciyubunuzyo 4:8) Kusalala caamba kubula kampenda, kusetekana alimwi akutaba aacibi. Jehova ulilondokede alimwi talubizyi. Kunyina nakonzya kuba aabube bwacibi.

Nokuba boobo, bamwi balakonzya kwaamba kuti naba Jobu tanaakali muntu mwini-mwini, aboobo mubandi woonse nkaano buyo. Pele sena aayo masimpe? Makani amwi aamu Bbaibbele atondezya kuti Jobu wakali muntu mwini-mwini. Mucikozyanyo, mulugwalo lwa Jakobo 5:7-11, tujana kuti Jobu ulaambwa kali cikozyanyo cikulwaizya Banakristo kuliyumya muziindi zyamapenzi alimwi akutuumbulizya kwiinda mukutuyeekezya kuti Jehova ulapa bulumbu akaambo kakuliyumya kuli boobo. Ikuti Jobu naatakali muntu mwini-mwini alimwi ikuti masunko aa Saatani akali aakuyeeyela buyo, nkokuti nocitagwasyi cikozyanyo ca Jobu. Kuyungizya waawo, mulugwalo lwa Ezekieli 14:14, 20, Jobu ulibikkilizyidwe akati kamulongo wabaalumi basyomeka mbuli Nowa alimwi a Daniele. Mbubonya mbuli Nowa alimwi a Daniele, Jobu wakali muntu mwini-mwini, mwaalumi iwakajisi lusyomo luyumu kapati. Ikuti naa Jobu wakali muntu mwini-mwini, nkokuti sikumusunka, sikutalisya mapenzi aakwe awalo wakali muntu mwini-mwini.

Cakusalazya, Ibbaibbele lyaamba Saatani kuti muntu mwini-mwini wamuuya. Nokuba boobo, mulakonzya kulibuzya kuti, ‘Sena mazuba aano kuli ntenda iili yoonse Saatani njakonzya kuleta kulindime alimwi akumukwasyi wangu?’

Amweezyeezye kuti cakutayeeyela kabunga kazigwebenga kanjila mudolopo lyanu. Cakutadooneka, lukwabililo lwanu inga lwaceya alimwi akutalilemeka kwabantu inga kwavwula kapati. Lino amulange-lange bukkale bukozyenye aboobu: Saatani alimwi amadaimona aakwe—nkokuti myuuya iini-iini, iili mbuli Saatani—eeyo iyakazangila Leza, yoonse yakatandilwa anyika cakutayeeyela. Ino ncinzi cacitika? Amuyeeye buyo makani ngomumvwa muli sikapepele mucisi canu alimwi ayaayo aakuzisi zimbi.

• Sena mulikubwene kuvwula kwamicito yalunya nokuba kuti bantu balasola kwiilesya?

• Sena mulikubwene kuvwula kwazyakulikondelezya zijatikizya mizimo nokuba kuti bazyali banji balalibilika kujatikizya makani aaya?

• Sena mulizibwene zilawo mbozinyonyoonwa cakuzwa munzila nokuba kuti bantu balasolekesya kuzikwabilila?

• Sena kulibonya kuti kuli cilubide calo cipa kuti bantu kabacita zintu zitaluzi zyalo zikonzya kusololela kuntenda?

Amubone Bbaibbele ncolyaamba kujatikizya yooyo uupa kuti kube mapenzi aali boobu noliti: “Wakawaalwa ansi simwaaba ooyo mupati, imuzoka ooyo wakaindi, uutegwa Diabolosi a Saatani, ooyo weena nyika yoonse; wakawaalwa ansi, anyika, abalo bangelo bakwe bakawaalwa ansi antoomwe anguwe.  . . Maawe kunyika alimwi akulwizi, nkaambo Diabolosi wamuselukila abukali bupati, mbwaanga ulizyi kuti ujisi buyo kaindi kaniini.” (Ciyubunuzyo 12:9, 12) Twalanga-langa bumboni boonse oobu, bantu banji baamba kuti Saatani ncilenge camuuya cibyaabi kapati, calo iciyunga bantu munyika kuti kabacita zibi.

Mulakonzya kulibilika kujatikizya mbomukonzya kujana lukwabililo. Kulibilika kuli boobo kuleelela. Cibalo citobela cilabandika nzila zikonzya kumugwasya.