Amuumbulizyigwe—Alimwi Akuumbulizya Bamwi

Akaambo kakutalondoka, toonse twakalicisidwe kale, bamwi bakalicisidwe kapati. Ciindi notujana buyumuyumu buli boobu, mbuti mbotukonzya kuliyumya?

Cintu cimwi cikonzya kutugwasya kuliyumya, nkuumbulizyigwa abanamukwasyi, balongwe alimwi abasyomima.

Majwi aalubomba alimwi aaluyando kuzwa kumulongwe alakonzya kuba mbuli mafwuta aaponya alimwi aatukatalusya. (Tus. 16:24; 18:24; 25:11) Pele Banakristo bakasimpe tababikkili buyo maano nzyobayandika kutegwa baumbulizyigwe. Balabweza ntaamu yakusaanguna, “kuumbulizya bamwi ibali mumapenzi aali oonse [aaluumbulizyo ndobajana] kuli Leza.” (2 Ko. 1:4; Lk. 6:31) Ba Antonio, mulangizi wacooko ku Mexico, mbamwi babaabo bakacitikilwa cintu cili boobu.

Ciindi nobakajanwa abulwazi bwa lymphoma, kkansa yamubulowa, ba Antonio bakausa kapati. Nokuba boobo, bakasola kweendelezya mbobalimvwa. Munzila nzi? Bakasola kuyeeya nyimbo zya Bwami alimwi akuziimba kutegwa bamvwe akuzinzibala kuyeeya majwi aanyimbo eezyo. Kupaila cakupozya alimwi akubala Bbaibbele acalo cakabaumbulizya kapati.

Nokuba boobo, ba Antonio lino bakazyiba kuti ilugwasyo lwabo lupati lwakazwa kubasyominyina. Bakaamba kuti: “Ciindi mebo abakaintu bangu notwakali kulibilika kapati, twakali kulomba musazima walo uubeleka kali mwaalu mumbungano kutuswaya akupaila andiswe. Eeci cakali kutuumbulizya alimwi akutukkazyika moyo.” Kumane bakayungizya kuti: “Tulalumba kulugwasyo lwamukwasyi wesu alimwi abakwesu bakumuuya, muciindi buyo cisyoonto twakacikonzya kuleka kulimvwa bubi.” Eelo kaka wakakkomana kuba abalongwe bamuyanda alimwi babikkila maano bali boobu!

Acimbi citugwasya ciindi camapenzi ncisyomezyo camuuya uusalala. Mwaapostolo Petro wakaamba kuti muuya uusalala wa Leza “[n]cipego cabuyo.” (Mil. 2:38) Eeci cakabonwa kuti ncamasimpe ciindi bantu banji nobakananikwa amuuya uusalala lya Pentekoste 33 C.E. Nokuba kuti Petro wakali kwaamba bananike, muuya uusalala ncipego kulindiswe toonse. Cipego eeci camuuya uusalala cilapegwa kulindiswe cakutaleka, aboobo tweelede kulomba kuti tupegwe munji.—Is. 40:28-31.

AMUBABIKKILE MAANO KAPATI AABO BALI MUMAPENZI

Mwaapostolo Paulo wakaliyumya mumapenzi manji, nokuba kuyanda kujaigwa zimwi ziindi. (2 Ko. 1:8-10) Nokuba boobo, Paulo tanaakaciindizya kulibilika kujatikizya kufwa. Kuzyiba kuti Leza wakali kumugwasya kwakamuumbulizya. Wakalemba kuti: “Aatembaulwe Leza alimwi Usyi wa Mwami wesu Jesu Kilisito, Taata siluse a Leza siluumbulizyo loonse, uutuumbulizya mumapenzi eesu oonse.” (2 Ko. 1:3, 4) Paulo taakwe naakalekela mapenzi ngaakajisi kuti amutyompye. Muciindi caboobo, kuliyumya mumapenzi ngaakajisi kwakamugwasya kuba alweetelelo, cakuti wakalilibambilide kuumbulizya bamwi nobakali mumapenzi.

Ba Antonio nobakapona, bakazumanana amulimo wabo wakweendeenda. Lyoonse bakali kubabikkila maano basyominyina, pele lino balo abakaintu babo balasola kubaswaya alimwi akubakulwaizya aabo baciswa. Mucikozyanyo, nobakaswaya Munakristo umwi iwakajisi bulwazi bupati, ba Antonio bakazyiba kuti mukwesu ooyu tanaakali kuyanda kuunka kumiswaangano. Ba Antonio bapandulula kuti: “Takuli kuti tanaakali kumuyanda Jehova naa bakwesu pe, pele bulwazi bwakamujatikizya kapati mbwalimvwa cakuti wakali kulimvwa kubula mpindu.”

Cintu cimwi ba Antonio ncobakacita kutegwa baumbulizye mukwesu ooyu, ncakuti bakamulomba kuti apaile kupobwe lyakacitika caino-ino. Nokuba kuti mukwesu ooyu wakali kulimvwa kuti teeleli, wakazumina kupaila. Ba Antonio baamba kuti: “Wakapa mupailo mubotu kapati, kuzwa waawo wakacinca. Wakalimvwa kuti ulayandika alimwi.”

Inzya, toonse kuli ziindi notweelede kuliyumya kumapenzi mapati naa masyoonto. Pele mbubwenya mbwaakaamba Paulo, eeci cilakonzya kutugwasya kuumbulizya bamwi ciindi nobayandika lugwasyo. Aboobo, atubabikkile maano Banakristoma nobali mumapenzi alimwi atwiiye Leza, Jehova, kwiinda mukuumbulizya bamwi.