BUUMI mbobapona bantu mazuba aano tabuli mbobuumi mbwaakali kuyanda Leza kuti kabapona. Nyika yali kweelede kuti kaizwide bantu bayanda kweendelezyegwa a Mulengi wabo, ibatobela busolozi bwakwe alimwi akutondezya bube bwakwe bwaluyando. Leza wakali kuyanda kuti kabakkomene ciindi nobabelekela antoomwe amikwasyi yabo, nobaiya zintu zipya alimwi akupanga nyika yoonse kuba paradaiso.

• “Ulamanizya nkondo munyika yoonse mboizulwa.”—Intembauzyo 46:9.

• “Cakasika ciindi cibikkidwe . . . cakunyonyoona baabo banyonyoona nyika.”—Ciyubunuzyo 11:18.

• “Taakwe muntu naba omwe uukkala munyika uuyakwaamba kuti: ‘Ndaciswa.’”—Isaya 33:24.

• “Basale bangu bayakwiikkomanina kapati milimo yamaanza aabo.” —Isaya 65:22.

Ino businsimi oobu buyoozuzikizyigwa buti? Leza wakasala Mwanaakwe, Jesu, kuba Mwami wamfwulumende iilondokede yalo iiyakulela nyika kuzwa kujulu. Bbaibbele lyaamba bulelo oobu kuti Bwami bwa Leza. (Daniele 2:44) Bbaibbele lyaamba boobu kujatikizya Jesu: “Leza uyoomupa cuuno cabwami . . . , eelyo unooli Mwami uuyoolela.”—Luka 1:32, 33.

Ciindi naakali anyika, Jesu wakacita zintu zinji zigambya ikutondezya kuti buumi bwabantu buyooba kabotu aakutalika kulela anyika kali Mwami.

• Wakaponya malwazi aamisyobo yoonse, ikutondezya mbwayakwaamana malwazi aapenzya bantu. —Matayo 9:35.

• Wakaumuzya guwo mulwizi, ikutondezya mbwayoobakwabilila bantu kwiinda mukweendelezya zilengwaleza.—Marko 4:36-39.

• Wakasanina makamu aabantu, ikutondezya kuti uyoobapa zintu nzyobayandika bantu mubuumi. —Marko 6:41-44.

• Wakasandula maanzi kuba waini kupobwe lyabwiinga, ikutondezya kuti uyoopa bantu kukkomana mubuumi. —Johane 2:7-11.

Mbuti mbomukonzya kuba abuumi bwalo Leza mbwayanda kuti babe ambubo aabo bamuyanda? Kuli “nzila” njomweelede kutobela. Nzila eeyo mu Bbaibbele ipandululwa kuti “nzila iitola kubuumi, kumane mbasyoonto baijana.”—Matayo 7:14.

Ino nzila iitola kubuumi ninzi? Nzila iitola kubuumi yiiminina zintu zyoonse Leza nzyatwaambila kuti tucite. Leza wakaamba kuti: “Mebo,  nde Jehova ndime Leza wako, ndime ndikuyiisya kuti ugwasyigwe, uukusololela munzila moyelede kweendela.” (Isaya 48:17) Ikuti mwakutobela kukulwaizya ooku, buumi bwanu buyoobota kapati.

Jesu wakaamba kuti: “Ndime nzila, kasimpe alimwi abuumi.” (Johane 14:6) Ikuti katucita zintu nzyaakaamba Jesu alimwi akwiiya cikozyanyo cakwe tuyooba acilongwe a Leza mpoonya buumi bwesu buyoobota kapati.

Ino inga mwaijana buti nzila iitola kubuumi? Kuli zikombelo zinji, pele Jesu wakacenjezya kuti: “Tabali boonse bandiita kuti ‘Mwami, Mwami,’ ibayoonjila mu Bwami bwakujulu, pele buyo ooyo uucita kuyanda kwa Taata uuli kujulu.” (Matayo 7:21) Alimwi wakayungizya kuti: “Kwiinda mumicelo yabo muyoobazyiba.” (Matayo 7:16) Bbaibbele lilakonzya kumugwasya kuzyiba cikombelo cakasimpe.—Johane 17:17

Mbuti mbomukonzya kutalika kweenda munzila iitola kubuumi? Mweelede kumuzyiba muntu uubapa buumi bantu boonse: Ino nguni? Ino nguni zina? Ino ujisi bube buli buti? Ino ncinzi ncatucitila? Ino uyanda kuti swebo tucite nzi? *

Leza tayandi kuti bantu kabagolela buyo akubeleka, kulya, kusobana mpoonya akuba amukwasyi. Tulakonzya kumuzyiba Mulengi wesu alimwi akuba acilongwe anguwe. Tulakonzya kutondezya kuti tulamuyanda kwiinda mukucita kuyanda kwakwe. Jesu wakaamba kuti: “Eeci caamba buumi butamani, ikuti bakuzyiba yebo O Leza mwini-mwini ooli olikke.”—Johane 17:3.

Ciindi notuzyiba ncayanda Leza kuti tucite, ambweni inga twayandika kucinca mumbazu zimwi zyabuumi bwesu. Eeco inga calibonya mbuli kuti cilakatazya. Pele bwini mbwakuti, eeci inga catugwasya kuba abuumi buli kabotu ikuti twatalika kweenda munzila iitola kubuumi. Kutegwa mujane bwiinguzi bwamibuzyo iiyandika kapati kujatikizya Leza, Bakamboni ba Jehova balijisi bubambe bwakuyiisya Bbaibbele butabbadelelwi aciindi alimwi akubusena nkomuyanda. Mulakonzya kutulembela kwiinda mukubelesya webbusaiti yesu ya www.isa4310.com/toi.