ZISI ALIMWI ABANTU | NICARAGUA
Kuswaya ku Nicaragua
KANJI-KANJI bantu baamba cisi ca Nicaragua kuti ncisi cijisi maziba mapati aamaanzi alimwi amalundu aazwa mulilo. Eeci cisi cilalidunda akaambo kakuba aciziba camaanzi iciinda kukomena mu Central America—Lake Nicaragua. Basicisi baciita kuti Cocibolca, nkokuti “Lwizi Lulweela.” Cilijisi nsumbu zinji alimwi nceciziba cilikke icijisi maanzi mabotu alimwi azilenge zyamulwaanje mbuli ma sharks, swordfish alimwi a tarpon.
Cisi ca Nicaragua alimwi cilijisi masena aali kulamfwu kapati mu Central America—Mosquito Coast. Oobu mbusena bulampa makkilomita aali 65 ibuli mumbali-mbali aalwizi nkoluli kujwe akunjila mucisi ca Honduras. Ba Miskito (nzila iimbi mbolilembwa zina lya Mosquito) bali akati katukamu twabantu ibajanika mu Nicaragua balo ibaambwa kuti bakasika mucisi eeci mumwaanda wamyaka wa 16 bantu baku Europe kabatanasika.
Ba Miskito balikamantene kapati caboola kubukkale alimwi balijisi zilengwa izilibedelede. Mucikozyanyo, mwaambo waci Miskito taujisi mabala aabulemu mbuli aakuti “Mister” naa “Miss.” Muminzi, bana baita bantu bapati kuti “Acisya” naa “Auntie” taciko makani naa mbamukowa naa pe. Cilengwa cimwi cakaindi akati kabamakaintu ba Miskito nobaanzya balongwe mbobamvwana kapati naa babbululu, nkugumikana masaya. Mpoonya mukaintu iwatalisya kwaanzya ulayoya kwiinda mukunjizya muuya mumpemo zyakwe.
Mabbuku aamba zyamu Bbaibbele mumwaambo waci Mayangna alimwi aci Miskito, aakamwaigwa a Bakamboni ba Jehova