Leza Wakandigwasya Kuzunda Masukusyo

Akaluulwa aba Vazir Asanov

Ndakasotoka kuzwa abulo, ndimane ndakaanga Bbaibbele mucibuno akusama zisani cakufwaambana. Kanditanasotokela anze kwiinda ampulungwido, ndakavwunga zisani akuzibikka abulo ndimane ndakazivwumba ngubo kutegwa ziboneke mbuli kuti ndicilede. Mpoonya ndakabalikila ku Ŋanda ya Bwami kumwi kandipaila kutegwa Leza andigwasye. Eeci cakacitika mu 1991 nindakali amyaka iili 14.

NDAKAZYALILWA mumukwasyi wabana Kurdish mudolopo lili kumusanza acisi ca Kazakhstan kuciindi eeco cakali cimwi cazyooko zili 15 zyacisi ca Soviet Union. Bazyali alimwi abamukowa wangu bakali kundikulwaizya kuba alusyomo lwakuti ndilakonzya kuba musololi alimwi akubavwuna bana Kurdish. Basinkondoma ndakalibasulide kapati cakuti ndakalilibambide kubajaya kutegwa ndivwune bamusyobo wangu kukudyaamininwa.

Kumamanino aamyaka yakuma 1980, mebo, bamaama amusyoonto wangu musankwa twakatalika kwiiya Bbaibbele a Bakamboni ba Jehova. Pele Bataata bakali kutukasya kuyanzana a Banakristo. Nokuba boobo, ndakazumanana kwiiya Bbaibbele. Mumukwasyi wabana Kurdish, cilatonda kutamvwida mutwe wamukwasyi. Ndakali kubayanda bataata, pele alimwi ndakali kutuyanda twaambo twamu Bbaibbele ntondakali kwiiya.

Kukazyigwa Kuŋanda Akucikolo

Bumwi buzuba, ibayi bakabona magazini ya Ngazi Yamulindizi mucibbeeke cangu bamane bakaambila bazyali bangu. Aboobo, kabanyemede kapati, Bataata bakanduuma cakuti bulowa bwakazwa mumpemo. Bakandibwentela kuti: “Sena ucizumanana kucikombelo ciya?”

Kuzwa waawo, Bataata bakandisamba. Makani aaya akandityompya kapati! Aciindi nceena eeci, ibunji bwabasicikoloma bakaleka kusobana andime, alimwi bamwi bakali kundifwubaazya. Bamayi bakatalika kundipa mamaakisi masyoonto alimwi bunji bwaziindi mukkilasi bakali kusampaula nzyondakali kusyoma kutegwa ndileke kusyoma kuti Leza nkwali.

Nokuba kuti ndakali kukazyigwa, ndakazumanana kujanika kumiswaangano ya Banakristo akwaambila bamwi nzyondakali kusyoma. Mukuya kwaciindi, Bataata bakazyiba kuti ndakacili kuyanzana a Bakamboni alimwi akubala Bbaibbele. Bumwi buzuba, Munsondo, ndakayeeya mbondikonzya kwaambila Bataata kutegwa ndikajanike kumuswaangano. Mpoonya-mpoonya, Bataata bakandaambila kuunka kwaakoona. Cabukali bakati, “Kuzwa sunu, Munsondo lyoonse aciindi eeci weelede kuti kolede.” Bakandaambila kuti ikuti nditaatobeli malailile aaya ndiya kucibona cakasubizya kwale kumulomo, alimwi andime ndakalizyi kuti bakalisinizyide.

Kumwi kandilila, ndakapaila kuli Jehova, Leza wakasimpe, kutegwa Bataata baleke kuyuma moyo, pele tiibakacinca pe. Eeci cakandipa kuyeeya mbobakali kundyaamininwa bana Israyeli mu Egepita. Bataata bakandiyeekezya Farao,  iwakaka kuzumizya bana Israyeli kuti bakakombe Jehova.—Kulonga 5:1, 2.

Kusala Cakucita

Buzuba bumwi Munsondo, ndakayeeya kuunka kumuswaangano. Kandicilede ndakapaila cakaumuumu kuli Jehova alimwi moyo wangu wakali kubalika akaambo kakulibilika. Bazyali bangu nibakanjila muŋanda mondakali koona, ndakalicengeezya kuti ndicoona. Kabakkomene, Bataata bakati, “Ooyu ngomwana uundimvwida.” Bakandimyonta kumane bakazwa. Ndakazumanana kupaila camoyo woonse.

Kweelana ambondaamba kumatalikilo, mbobakazwida buyo ndakasotoka kuzwa abulo, ndimane ndakabweza mabbusu aangu mujungusi lyabulo akusotokela anze kwiinda ampulungwido. Muswaangano wamawoola obilo wakamana mukulaba kwaliso, eelyo ndakatalika kuyeeya cakali kuya kundicitikila kuŋanda. Cakandikkomanisya ncakuti nokuba kuti Bamaama bakabona kuti tandili ndime ndakalede abulo, tiibakandaamba kuli Bataata. Nokuba boobo, bakandicenjezya kuti ikuti ndikaciinduluke baya kundaamba.

Mu 1992, ndakaambila bazyali bangu kuti imweenzuma wakanditamba kupobwe. Masimpe ngakuti, ndakali kuyanda kujanika kumuswaangano wacooko wa Bakamboni ba Jehova mudolopo lya Taraz, ikulampa makkilomita aali 100 kuzwa kudolopo lya Karatau mutwakali kukkala. Okuya ndakali kuya kubbapatizyigwa ikutondezya kuti ndakalilyaabide kuli Jehova. Ndakalomba Bamaama kuti bandipe bbekete lyamalangazuba. Malangazuba aaya ndakaakanga akwaasambala kumusika, mali ngindakajana ngindakabelesya kuya kumuswaangano.

Nindakapiluka, Bataata bakandibuzya naa pobwe lyakali buti. Ndakabaambila kuti lyakali libotu. Ndakabona kuti Jehova wakali andime, akaambo kakuti Bataata taku cimbi ncibakabuzya. Eeci cakapa kuti kandaayanda kapati majwi aali ku Tusimpi 3:5, 6 aakuti: “Syoma Jehova amoyo wako woonse; utalifunkizyi kumaanu aako omwi. Umuzibye munzila zyako zyoonse, nkabela uyooenzya myeendelo yako.”

Ndakayaansi Kumuuya

Nokuba kuti ndakabbapatizyigwa, Bataata tiibakaleka kundikazya. Akaambo kakuzumanana kuyanzana a Bakamboni, Bataata bakali kunduuma ceetezya kabalangilila bamwi alimwi anotwakali buyo tobilo. Bunji bwaziindi bakali kundipenzya kutegwa ndicileke kuswaangana alimwi eeci cakali kundipa kulila lyoonse. Aciindi eeci, cooko ca Kazakhstan nicabweza lwaanguluko kuzwa kucisi ca Soviet Union, aboobo bazyali bangu abamukowa bakali kundikulwaizya kutola lubazu mutwaambo twacisi. Bakali kuyeeya kuti eeci ncicakali coolwe cangu cakutola lubazu mutwaambo twacisi.

Kuciindi eeci, mupati wangu musankwa wakali kuzwidilila muzisobano, aboobo bunji bwaziindi Bataata bakali kundikulwaizya kuba mbuli nguyo. Aboobo, kumamanino aamwaka wa 1994, andime ndakatalika kutola lubazu muzisobano. Akaambo kabube bwangu, tiilyakalampa pe, ndakatalika kuzunda mumizundano alimwi ndakali kutembaulwa kapati akaambo kakucizyiba kuuma bbola akusotooka. Kuyungizya waawo, ndakatalika kwiiya mulawo kutegwa ndigwasye bana Kurdish. Mane buya ndakatalika kutola lubazu mutwaambo twacisi cakunga ndakaba amuzeezo wakubamba kakamu kabakubusi bana Kurdish. Eeci cakapa kuti Bataata batalike kundilumbaizya.

“Mwacikonzya Taata”

Ndakaya ansi kumuuya alimwi ndakalilekede kubala Bbaibbele akujanika kumiswaangano ya Bakamboni ba Jehova. Nokuba boobo, ndakali kuyeeya kuti ndaakukomena ndiya kutalika alimwi kubelekela Jehova. Buzuba bumwi Bataata bakandibuzya naa ndakacili kuyanzana a Bakamboni ba Jehova. Ndakabaambila kuti: “Peepe. Mwacikonzya Taata. Ino mulimvwa buti lino?” Nobakamvwa boobu, Bataata bakakkomana kapati. Kabakkomene bakati: “Lino uli mwanaangu ncobeni!”

Kwamyaka yobilo tiindakali kujanika kumiswaangano nokuba kuti zimwi ziindi ndakali kuyanda kuunka. Pele akaambo kansoni,  ndakali kwaalilwa kuya kumiswaangano. Ndakali kuyeeya kuti bamumbungano tabakanditambuli kabotu.

Kulubazu lumwi, ndakalizyi kuti kubelekela Jehova kulagwasya kapati kwiinda zyoonse. Bunji bwaziindi ndakali kulyaambauzya kuti ‘mubwini ndilamuyanda Jehova!’ Mpoona, Bataata bakatalika kundikulwaizya kuunka kucikolo cipati. Ndakauzumina muzeezo wabo alimwi ndakabasyomezya kuti ndaakumanizya cikolo ndinoojisi pepa libotu. Nokuba boobo, mumoyo wangu ndakali kuyeeya kuti mbondiya kusikila buyo kucikolo cipati caku Almaty, idolopo mpati lili kumusanza kwa Kazakhstan, ndiyakubajana Bakamboni.

Bukkale Bupya Alimwi Bukkomanisya

Nokwakainda buyo mazuba masyoonto kuzwa nindakatalika kwiiya kucikolo cipati, ndakayaanya Bakamboni bobilo ibakali mumulimo wakukambauka mumugwagwa umwi wamudolopo lya Almaty. Bakandibuzya kuti: “Ino muyeeya kuti nguni uulela nyika?”

Ndakabavwiila kuti: “Ngu Saatani Diabolosi, sinkondonyina Jehova abantu boonse.” (2 Ba-Korinto 4:3, 4) Ndakabaambila kuti andime ndakali umwi wa Bakamboni ba Jehova nokuba kuti ndakayaansi kumuuya.

Kumamanino aa 1996, ndakatalika alimwi kwiiya Bbaibbele a Bakamboni. Nindakaiya ziiyo zili mbozibede, ndakaba aluyandisisyo alimwi lwakubelekela Jehova cakuti ndakatalika kutola lubazu mumilimo yoonse ya Bakamboni ku Almaty. Mu September 1997, ndakatalika mulimo wabupainiya naa bukambausi bwaciindi coonse.

Nikwakainda mwaka, Bataata bakandiswaya. Ndakababalikila akubakumbata. Bakandilomba kuti ndibalekelela kuzyintu zyoonse nzyobakali kucita. Bakandaambila kuti tiibakacizyi ncindakali kusyoma alimwi ancindakali kuzumananina. Ndakabaambila kuti: “Ndilamuyanda kapati, Taata.”

Eelyo kaka ndakakkomana Bataata nobakazumina kupegwa mabbuku aapandulula Bbaibbele anobakalomba Bbaibbele akwaamba kuti bakali kuyanda kulibala lyoonse! Nokwakainda mwaka, bakandiswaya alimwi, aciindi eeci bakaboola a Bamaama. Ku Ŋanda ya Bwami, bantu bazwa kuzisi zisiyene-siyene bakabatambula camaanza obilo. Eeci cakabakulwaizya kapati Bataata cakuti kuzwa buzuba oobu bakatalika kubala mabbuku aa Bakamboni.

Zilongezyo Zitalivwulili

Mu September 2001, ndakakwata musimbi mubotu waku Russia wazyina lya Yelena. Yelena wakabbapatizyigwa mu 1997 kumane wakatalika bupainiya mu May 2003. Buzuba bumwi twakakkomana kapati nitwakamvwa kuti bazyali bangu bakali kwiiya Bbaibbele a Bakamboni akuti bakali kuyaambele kumuuya. Ibwini mbwakuti tindakaasyoma makani aaya kusikila Bataata nobakandaambila mulomo mpande. Nindakali kubandika ambabo muluwaile bakandaambila kuti Jehova ngo Leza mwini-mwini alikke!

Ndilikkomene kapati kuti kuno ku Almaty ndili acoolwe cakusololela ziiyo zya Bbaibbele kubantu bazwa kumasi manji mbuli China, Iran, Pakistan, Syria a Turkey. Caino-ino, mupaizi umwi waku Iran wakandilomba kuti kandimuyiisya Bbaibbele mumusyobo wakwe waci Persian. Mudaala umwi iwakali mupati wabasikalumamba ku Afghanistan wakakondwa citaambiki naakaiya makani aajatikizya Jehova. Kunze lyaboobo, ndilikkomene kuti ndakaiya Bbaibbele amuntu uzwa ku Syria mumusyobo wangu wa Kurdish alimwi abantu baambaula misyobo yaku Kazakhstan a Russia njondakaiya kubwana.

Ciindi cino, mebo a Yelena tuli mumbungano imwi akati kambungano ziinda ku 35 zya Bakamboni ba Jehova mudolopo lya Almaty. Mumbungano eeyi tubelesya musyobo waku Kazakhstan. Imwakali, mebo a Yelena twakali acoolwe cakubelekela kuofesi yamutabi mpya ya Bakamboni ba Jehova iili kufwaafwi adolopo lya Almaty.

Kaindi ndakali kuyiisyigwa kusula basinkondoma, pele Jehova wakandiyiisya kubayanda bantu boonse. Ncondabona ncakuti tatweelede kujoka munsi caboola kukukkomanisya Jehova Leza noliba leelyo notusungilizyigwa abamukowa abalongwe ibajisi makanze aakutugwasya kweelana ambobayeeya balo. (Ba-Galatiya 6:9) Lino, ndilikkomene kapati kuti mebo amukaintu wangu tujisi zinji zyakucita “[m]umilimo ya-Mwami.”—1 Ba-Korinto 15:58.

[Majwi aakwelelezya sikubala aali apeeji 28]

Bamaama bakandicenjezya kuti ikuti ndikaciinduluke baya kundaamba kuli Bataata

 [Cifwanikiso icili apeeji 30]

Ŋanda ya Bwami yaku Karatau, nkondakaunka nindakacili mwana

[Cifwanikiso icili apeeji 30]

Bazyali bangu, lino balaukkomanina mulimo wesu

[Cifwanikiso icili apeeji 30]

Mebo a Yelena buzuba mbutwakakwatana

[Cifwanikiso icili apeeji 30]

Mebo a Yelena kumutabi mupya kufwaafwi aku Almaty