1, 2. (a) Ino mbusolozi bwani mbotweelede kutobela? (b) Ino mibuzyo nzi njotutiibandike mucibalo eeci?

CIINDI nomwakacili bana, ambweni kwakali kuba ziindi bazyali banu nobakali kumwaambila kucita cintu cimwi ncomwatakali kuyanda. Mwakali kubayanda bazyali banu alimwi mwakalizyi kuti mwakeelede kubamvwida. Nokuba boobo, ambweni talili lyoonse nomwakali kuyanda kubamvwida.

² Tulizyi kuti Jehova, Taateesu, ulatuyanda. Ulatubikkila maano alimwi akubona kuti tulijisi zyoonse nzyotuyandika kutegwa katukkomana mubuumi. Ulatupa busolozi mbotuyandika kutegwa tuzwidilile. Zimwi ziindi, ulabelesya bantu bamwi kutegwa batupe busolozi. Tweelede kubulemeka bweendelezi bwa Jehova. (Tusimpi 24:21) Pele ino nkaambo nzi zimwi ziindi ncocitukatazya kutobela busolozi? Nkaambo nzi Jehova ncatwaambila kutobela busolozi? Alimwi mbuti mbotukozya kutondezya kuti tulabulemeka bweendelezi bwakwe?—Amubone Bupanduluzi Buyungizyidwe 9.

3, 4. Ino kutalondoka kwakaboola buti kubantu? Nkaambo nzi ncocikonzya kutukatazya kutobela busolozi bwabamwi?

³ Swebo tobantu, tujisi cilengwa cakuzanga. Oobu  mbocibede kuzwa ciindi mwaalumi amukaintu wakusaanguna, Adamu a Eva, nobakabisya. Nokuba kuti bakalengwa kabalondokede, bakabuzangila bweendelezi bwa Leza. Kuzwa ciindi eeco, bantu boonse bali kuzyalwa kabatalondokede. Kutalondoka kwesu, nkaambo kamwi ikapa kuti kacikatazya kutobela busolozi kuzwa kuli Jehova alimwi akubantu. Kaambo akambi nkakuti, aabo Jehova mbabelesya kutupa busolozi abalo mbantu batalondokede.—Matalikilo 2:15-17; 3:1-7; Intembauzyo 51:5; Baroma 5:12.

⁴ Akaambo kakuti tatulondokede, kanji-kanji tulalisumpula. Kulisumpula kupa kuti citukatazye kutobela busolozi. Mucikozyanyo, mu Israyeli yansiku, Jehova wakasala Musa kuti asololele bantu bakwe. Imwaalumi wazina lya Kora, iwakabelekela Jehova kwamyaka minji, wakatalika kulisumpula alimwi wakatondezya kubula bulemu kuli Musa. Nokuba kuti Musa wakali kubasololela bantu ba Leza, tanaakali muntu uulisumpula. Alimwi buya, wakaambwa kuti ngowakali muntu mubombe kwiinda bantu boonse ibakali kupona aciindi eeco. Pele Kora tanaakabuzumina busolozi bwa Musa. Mane buya wakayunga nkamu mpati yabantu kumusangana akuzangila Musa. Ino ncinzi cakamucitikila Kora antoomwe abazangi? Bakajaigwa. (Myeelwe 12:3; 16:1-3, 31-35) Mu Bbaibbele, kuli zikozyanyo zinji izituyiisya kuti kulisumpula kunjizya muntenda.—2 Makani 26:16-21; amubone Bupanduluzi Buyungizyidwe 10.

5. Ino mbuti bantu bamwi mbobali kuzibelesya munzila iitali kabotu nguzu zyabo zyabweendelezi?

⁵ Ambweni mwakamvwa kale majwi aakuti “Nguzu zyabweendelezi zilanyonganya.” Kuzwa kaindi, bantu banji bali kuzibelesya munzila iitali kabotu nguzu zyabweendelezi. (Amubale Mukambausi 8:9.) Mucikozyanyo, Saulo wakali mwaalumi uuli kabotu alimwi uulicesya ciindi  Jehova naakamusala kuba mwami wa Israyeli. Pele wakalekela kulisumpula alimwi amunyono kuti zikomene mumoyo wakwe, alimwi cakapa kuti apenzye Davida, mwaalumi iwakanyina mulandu. (1 Samuele 9:20, 21; 10:20-22; 18:7-11) Mukuya kwaciindi, Davida wakaba mwami, alimwi wakali umwi wabami ibakali kabotu kapati ibakali kulela mu Israyeli. Nokuba boobo, mukuya kwaciindi naba Davida wakazibelesya munzila iitali kabotu nguzu zyakwe zyabweendelezi. Davida wakoonana a Bati-seba, mukaintu wa Uriya, mpoonya wakasola kusisa cibi cakwe kwiinda mukutuma Uriya kuti akajaigwe munkondo.—2 Samuele 11:1-17.

6, 7. (a) Ino luyando ndotujisi kuli Jehova lutukulwaizya kucita nzi? (b) Ino ncinzi ciyootugwasya kuba bantu bamvwida noliba leelyo nocitali cuuba-uba kucita boobo?

⁶ Tweelede kubulemeka busolozi bwa Jehova akaambo kakuti tulamuyanda. Akaambo kakuti tulamuyanda Jehova kwiinda cintu cili coonse naa muntu uuli woonse, tuyanda kumukkomanisya. (Amubale Tusimpi 27:11; Marko 12:29, 30.) Kuzwa ciindi banabukwetene bakusaanguna nobakali kukkala mumuunda wa Edeni, Saatani lyoonse wali kuyanda kuti bantu kababudooneka bweendelezi bwa Jehova. Diabolosi uyanda kuti katuyeeya kuti Jehova tajisi nguzu zyakutwaambila ncotweelede kucita. Pele tulizyi kuti ooku nkubeja. Tulazuminizya kuti ngamasimpe majwi aaya aakuti: “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zintu zyoonse.”—Ciyubunuzyo 4:11.

⁷ Ciindi nomwakali bana, ambweni bazyali banu bakamuyiisya kubamvwida. Pele zimwi ziindi ambweni cakali  kumukatazya kucita boobo. Mbubwenya buyo, mbotuli babelesi ba Jehova, kulakonzya kuba ziindi nocitali cuuba-uba kumvwida. Pele tulamuyanda akumulemeka Jehova, aboobo tulacita kufwumbwa ncotukonzya kutegwa tumumvwide. Jesu wakatusiila cikozyanyo. Wakamumvwida Jehova noliba leelyo nocakali ciyumu kucita boobo. Nkakaambo kaako wakali kukonzya kwaambila Bausyi kuti: “Kutabi kuyanda kwangu, pele akucitwe kuyanda kwako.”—Luka 22:42; amubone Bupanduluzi Buyungizyidwe 11.

8. Ino ninzila nzi zimwi Jehova nzyabelesya kutusololela? (Amubone kabbokesi kakuti “ Amuswiilile Kululayo.”)

⁸ Mazuba aano, Jehova ulatusololela munzila ziindene-indene. Mucikozyanyo, wakatupa Bbaibbele. Alimwi wakatupa baalu mumbungano. Tulatondezya kuti tulabulemeka bweendelezi bwa Jehova ciindi notubalemeka aabo mbabelesya kutusololela. Ikuti twalukaka lugwasyo lwabo, munzila iimwi nkokuti twamukaka Jehova. Ciindi bana Israyeli nobakamukaka Musa, ncobakacita Jehova wakacibona kuti makani mapati. Wakacibona kuti bakali kukaka nguwe.—Myeelwe 14:26, 27; amubone Bupanduluzi Buyungizyidwe 12.

9. Mbuti luyando mboluyootukulwaizya kutobela busolozi?

⁹ Ciindi notubulemeka bweendelezi, nkokuti tutondezya kuti tulabayanda bakwesu abacizyi. Amuciyeeyele munzila eeyi. Ciindi nokwacitika ntenda, kanji-kanji nkamu yabasikugwasyilizya babelekela antoomwe kutegwa basolekesye kufwutula bantu banji. Kutegwa nkamu eeyo izwidilile kapati, kweelede kuba muntu wakwiisololela alimwi umwi aumwi uuli cibeela cankamu eeyo weelede kutobela busolozi. Pele ino mbuti kuti umwi katatobeli busolozi akucita buyo ncayanda? Nokuba kuti ujisi makanze mabotu, ikukaka kuswiilila kulakonzya kubaletela mapenzi mbabeleka limwi, ambweni buya akubanjizya  muntenda mpati. Mbubwenya buyo, ikuti katutatobeli busolozi kuzwa kuli Jehova akuli baabo mbapede bweendelezi, ibamwi balakonzya kupenga. Pele ciindi notumumvwida Jehova, tutondezya kuti tulabayanda bakwesu alimwi tulabulemeka bubambe bwa Jehova.—1 Bakorinto 12:14, 25, 26.

10, 11. Ino ncinzi ncotutiilange-lange lino?

¹⁰ Kufwumbwa ncatwaambila Jehova kuti tucite cigwasya ndiswe. Ciindi notulemeka bweendelezi mumukwasyi, mumbungano, anotuli abeendelezi bamfwulumende, boonse bayoogwasyigwa.—Deuteronomo 5:16; Baroma 13:4; Baefeso 6:2, 3; Bahebrayo 13:17.

¹¹ Ikuzyiba kaambo Jehova ncayandila kuti katutondezya bulemu kuli bamwi kulakonzya kutugwasya kubalemeka. Atubandike twaambo atumbi mbotukonzya kutondezya bulemu mumbazu zyotatwe zyabuumi.

12. Ino mbuti mulumi mbwakonzya kutondezya kuti ulabulemeka bweendelezi?

¹² Jehova nguwakatalisya mukwasyi alimwi wakamupa aumwi mumukwasyi mukuli wakwe. Ciindi umwi aumwi mumukwasyi nazuzikizya ceeco Jehova ncayanda kulinguwe, bubambe bwamukwasyi bulabeleka kabotu alimwi mukwasyi woonse ulagwasyigwa. (1 Bakorinto 14:33) Jehova wakabikka mulumi kuba mutwe wamukwasyi. Eeci citondezya kuti Jehova uyanda kuti mulumi kalanganya mukaintu wakwe abana alimwi akubasololela munzila yaluyando. Aboobo mulumi weelede kulyaambilila kuli Jehova kujatikizya mbwabalanganya. Mulumi Munakristo ulijisi luzyalo, luyando alimwi ulaunganya mukwasyi wakwe mbubwenya Jesu mbwalanganya mbungano. Ciindi mulumi nacita boobu, utondezya kuti ulamulemeka  Jehova.—Baefeso 5:23; amubone Bupanduluzi Buyungizyidwe 13.

13. Mbuti mukaintu mbwakonzya kutondezya kuti ulabulemeka bweendelezi?

¹³ Mukaintu Munakristo awalo ulijisi mukuli uuyandika kapati alimwi uulemekwa. Ulamugwasyilizya mulumaakwe ciindi nabeleka canguzu kutegwa abe mutwe wamukwasyi uuli kabotu. Antoomwe amulumaakwe, ulijisi mukuli wakuyiisya bana. Nzila imwi njayiisya bana bakwe kuba abulemu nkwiinda mucikozyanyo cakwe. (Tusimpi 1:8) Ulamulemeka mulumaakwe alimwi akutobela nzyaamba. Noliba leelyo natazuminani ancaamba mulumaakwe kujatikizya cintu cimwi, ulapandulula mbwalimvwa caluzyalo alimwi munzila yabulemu. Ikuti mukaintu Munakristo kakwetwe kumwaalumi uutali Kamboni, inga ujisi buyumuyumu bulibedelede. Pele ciindi nazumanana kumuyanda alimwi akumulemeka mulumaakwe, ambweni bumwi buzuba awalo uyooyanda kumuzyiba Jehova alimwi akumukomba.—Amubale 1 Petro 3:1.

14. Ino mbuti bana mbobakonzya kutondezya bulemu kubweendelezi?

¹⁴ Jehova ulabayanda kapati bana, alimwi bayandika kukwabililwa akusololelwa. Ciindi bana nobamvwida bazyali babo, bapa kuti bazyali babo bakkomane. Alimwi ciyandika kapati ncakuti, nobamvwida inga batondezya bulemu kuli Jehova alimwi balamukkomanisya. (Tusimpi 10:1) Mumikwasyi minji, bana bakomezyegwa amuzyali omwe buyo. Eeci cilakonzya kuba cintu ciyumu kapati kumuzyali akubana. Pele ikuti bana kababamvwida alimwi akubagwasyilizya banyina naa bausyi, buumi bwamumukwasyi bunooli bubotu. Tacikwe makani naa bukkale buli buti, kunyina mukwasyi uulondokede. Pele mukwasyi uuli woonse ulakonzya kukkomana ikuti munamukwasyi umwi aumwi katobela malailile aa Jehova. Eeci ciletela  bulemu kuli Jehova, Sikutalisya mikwasyi yoonse.—Baefeso 3:14, 15.

15. Mbuti mbotukonzya kutondezya kuti tulabulemeka bweendelezi mumbungano?

¹⁵ Jehova ulatusololela kwiinda mumbungano ya Bunakristo, alimwi wakapa Jesu nguzu zyoonse zyakusololela mbungano. (Bakolose 1:18) Awalo Jesu wakapa “muzike uusyomeka alimwi uucenjede” mukuli wakulanganya bantu ba Leza anyika. (Matayo 24:45-47) Mazuba aano, Kabunga Keendelezya ‘ngomuzike uusyomeka alimwi uucenjede.’ Kabunga Keendelezya kalatupa nzyotuyandika aciindi ceelede kutegwa tuzumanane kuba alusyomo luyumu. Baalu, bakutausi abalangizi bamabazu balazigwasyilizya mbungano munyika yoonse alimwi batambula malailile kuzwa ku Kabunga Keendelezya. Bakwesu aaba boonse bajisi mukuli wakutulanganya. Balalyaambilila kuli Jehova kujatikizya mbobailanganya mikuli yabo. Aboobo ciindi notubalemeka baalumi aaba, nkokuti tulemeka Jehova.—Amubale 1 Batesalonika 5:12; Bahebrayo 13:17; amubone Bupanduluzi Buyungizyidwe 14.

16. Nkaambo nzi ncotukonzya kwaamba kuti baalu abakutausi balasalwa amuuya uusalala?

¹⁶ Baalu abakutausi bagwasya mbungano kusyomeka akukamantana lyoonse. Nokuba boobo, mbantu batalondokede mbubwenya mbuli ndiswe. Aboobo ino basalwa buti? Bakwesu aaba beelede kuzuzikizya zyeelelo izijanika mu Bbaibbele. (1 Timoteyo 3:1-7, 12; Tito 1:5-9) Jehova wakabelesya muuya uusalala kugwasya balembi ba Bbaibbele kupandulula zyeelelo eezyi. Baalu balapaila kuli Jehova kulomba muuya wakwe uusalala ciindi nobabandika kuti nguni weelede kusalwa kuba mwaalu naa  mukutausi. Cilasalala kuti mbungano zili mubweendelezi bwa Jesu a Jehova. (Milimo 20:28) Baalumi ibasalidwe kutugwasyilizya akutulanganya nzipego kuzwa kuli Leza.—Baefeso 4:8.

17. Kutegwa atondezye bulemu, ino ncinzi mucizyi nceelede kucita zimwi ziindi?

¹⁷ Zimwi ziindi kulakonzya kujanika kuti kunyina baalu naa bakutausi bakonzya kubeleka mulimo umwi mumbungano. Basikumwaya bamwi babbapatizyidwe balakonzya kugwasya, pele kuti kakunyina, mucizyi ulakonzya kuucita mulimo iwayelede kucitwa amukwesu uubbapatizyidwe. Kuti caba boobo, mucizyi weelede kusama cintu cimwi kuvwumba mutwe wakwe, ambweni citambala naa cisoti. (1 Bakorinto 11:3-10) Kwiinda mukucita boobo, utondezya kuti ulabulemeka bubambe bwa Jehova bwabusilutwe, mumukwasyi alimwi amumbungano.—Amubone Bupanduluzi Buyungizyidwe 15.

18, 19. (a) Ncinzi ncotwiiya kulugwalo lwa Baroma 13:1-7? (b) Mbuti mbotukonzya kutondezya bulemu kumfwulumende alimwi akubantu bamwi ibali mubweendelezi?

¹⁸ Mazuba aano, Jehova ulazizumizya mfwulumende kweendelezya alimwi ulazipa nguzu zimwi, aboobo tweelede kuzilemeka. Beendelezi bamfwulumende balacita milimo iiyandika mbuli kuleta luumuno mumasi alimwi amuzilawo mobakkala bantu alimwi akubapa zintu zimwi nzyobayandika. Banakristo balaatobela malailile aali kulugwalo lwa Baroma 13:1-7. (Amubale.) Tulabalemeka “beendelezi” alimwi akwiitobela milawo yamucisi naa cilawo motukkala. Milawo eeyi ilakonzya kuujatikizya mukwasyi wesu, makwebo naa zintu nzyotujisi. Mucikozyanyo, tulatela alimwi akulemba kabotu mafoomu naa  mapepa aali oonse mfwulumende ngoiyanda. Pele ino ncinzi ncotweelede kucita ikuti naa mfwulumende yatwaambila kucita cintu cimwi citeendelani amilawo ya Leza? Mwaapostolo Petro wakati: “Tweelede kumvwida Leza mbwali mweendelezi kutali bantu.”—Milimo 5:28, 29.

¹⁹ Ikuti kwayandika kubandika amweendelezi wamfwulumende, mbuli mubetesi naa mupulisa, lyoonse tweelede kucita oobo cabulemu. Banakristo basicikolo balabalemeka bamayi babo alimwi ababelesi baacikolo. Kumulimo, tweelede kubalemeka bapati bamulimo, nokuba kuti babelesi bamwi tabaciti oobo. Ciindi notucita boobu, twiiya mwaapostolo Paulo, ooyo iwakali kubalemeka beendelezi nokuba kuti zimwi ziindi cakali ciyumu. (Milimo 26:2, 25) Nokuba kuti bamwi tabatweendelezyi kabotu, tweelede kuzumanana kubalemeka.—Amubale Baroma 12:17, 18; 1 Petro 3:15.

20, 21. Ino nzintu nzi zibotu izikonzya kucitika ciindi notutondezya bulemu kuli bamwi?

²⁰ Munyika yoonse, bantu tabatondezyi bulemu kuli bamwi. Pele bantu ba Jehova baliindene. Makanze eesu lyoonse ngakulemeka bantu boonse. Tutobela malailile aamwaapostolo Petro aakuti: “Amubalemeke bantu bamisyobo yoonse.” (1 Petro 2:17) Ciindi notubalemeka bamwi, balazyiba. Jesu wakatwaambila kuti: “Aumunike mumuni wanu kubantu kutegwa babone milimo yanu mibotu akupa bulemu kuli Uso.”—Matayo 5:16.

²¹ Ciindi notutondezya bulemu mumukwasyi wesu, mumbungano yesu alimwi amumbazu zimwi zyabuumi, cikozyanyo cesu cibotu cilakonzya kupa kuti bamwi bayande kwiiya zinji kujatikizya Jehova. Alimwi kwiinda mukutondezya bulemu kuli bamwi, tutondezya bulemu kuli Jehova kumugama. Eeci cilamukkomanisya Jehova alimwi citondezya kuti tulamuyanda.