CIBALO 37

Sena Ndeelede Kubbapatizyigwa?

Amucconge kaambo kamasimpe naa kakubeja mutwaambo ootu tutobela:

Kubbapatizyigwa nceelelo ciyandika ku Banakristo.

□ Nkamasimpe

□ Nkakubeja

Kaambo kapati ncomweelede kubbapatizyigwa nkakuti mukwabililwe kukucita cibi.

□ Nkamasimpe

□ Nkakubeja

Kubbapatizyigwa kupa kuti mukafwutuke.

□ Nkamasimpe

□ Nkakubeja

Ikuti naa kamutabbapatizyidwe, nkokuti tamujisi mulandu kuli Leza kujatikizya nzyomucita.

□ Nkamasimpe

□ Nkakubeja

Ikuti naa beenzinyoko balabbapatizyigwa, nkokuti andinywe mulilibambilide kubbapatizyigwa.

□ Nkamasimpe

□ Nkakubeja

IKUTI kamupona kweelana azyeelelo zya Leza, kamujisi cilongwe a Leza alimwi kamwaambila bamwi kujatikizya nzyomusyoma, nkokuti cileelela kuti kamuyeeya kujatikizya kubbapatizyigwa. Pele ino inga mwazyiba buti kuti mulilibambilide kubbapatizyigwa? Kutegwa tujane bwiinguzi kumubuzyo ooyu, atulange-lange twaambo twamasimpe atwakubeja itwaambwa atala aawa.

● Kubbapatizyigwa nceelelo ciyandika ku Banakristo.

Nkamasimpe. Jesu wakalailila kuti basikwiiya bakwe beelede kubbapatizyigwa. (Matayo 28:19, 20) Alimwi buya, Jesu lwakwe wakabbapatizigwa. Kutegwa mumutobele Kristo, mweelede kubbapatizyigwa ciindi nomwasika aciimo cakucikonzya kupanga cakusala eeci alimwi akuba aluyandisisyo lwakucita boobo.

● Kaambo kapati ncomweelede kubbapatizyigwa nkakuti mukwabililwe kukucita cibi.

Nkakubeja. Lubbapatizyo ncitondezyo kubuleya cakulyaaba kwanu kuli Jehova. Kulyaaba kwanu tacili cintu cimwaangilila kuti mutaciti zintu nzyomunga mwayanda kucita ciindi nomuli nyolikke. Muciindi caboobo, mulalyaaba kuli Jehova akaambo kakuti muyanda kupona kweelana azyeelelo zyakwe.

● Kubbapatizyigwa kupa kuti mukafwutuke.

Nkamasimpe. Bbaibbele lyaamba kuti kubbapatizyigwa, nintaamu iiyandika kapati kutegwa tukafwutuke. (1 Petro 3:​21) Pele kubbapatizyigwa tacaambi kuti ziyume zitete muyoofwutuka. Tamweelede kubbapatizyigwa akaambo buyo kakuti muyanda kuyoofwutuka, pele mweelede kucita oobo akaambo kakuti mulamuyanda Jehova alimwi muyanda kumubelekela camoyo woonse mane kukabe kutamani.​—Marko 12:29, 30.

● Ikuti naa kamutabbapatizyidwe, nkokuti tamujisi mulandu kuli Leza kujatikizya nzyomucita.

Nkakubeja. Lugwalo lwa Jakobo 4:​17 lwaamba kuti: “Ikuti umwi kazyi mbokucitwa cintu cibotu pele taciciti, muntu ooyu ucita cibi,” tacikwe makani naa ulibbapatizyidwe naa pe. Aboobo, ikuti kamuzyi kucita ciluzi alimwi kamusikide aciimo cakucikonzya kusala kabotu mubuumi bwanu, ambweni eeci nceciindi cakubandika makani aaya abazyali banu naa Munakristo umwi uusimide. Kwiinda mukucita boobu, mulakonzya kuzyiba mbomukonzya kuyaambele kutegwa mweelele kubbapatizyigwa.

● Ikuti naa beenzinyoko balabbapatizyigwa, nkokuti andinywe mulilibambilide kubbapatizyigwa.

Nkakubeja. Kusala kuti mubbapatizyigwe ceelede kuzwa ansi aamoyo wanu. (Intembauzyo 110:3) Mweelede kubbapatizyigwa lilikke buyo nomwamvwisya ncocaamba kuba umwi wa Bakamboni ba Jehova alimwi anomwalimvwa kuti mulilibambilide ncobeni kuzuzikizya mukuli ooyu.​—Mukambausi 5:​4, 5.

Ntaamu Iicinca Buumi

Kubbapatizyigwa nintaamu iicinca buumi yalo iisololela kuzilongezyo zinji. Pele alimwi ibikkilizya mukuli uuyandika kapati, nkokuti kupona kweelana akulyaaba kwanu kuli Jehova.

Sena mulilibambilide kulyaaba? Ikuti naa mbocibede oobo, mulijisi kaambo kabotu ikeelede kumupa kukkomana. Muyooba acoolwe cipati kapati kwiinda zyoonse, nkokuti kubelekela Jehova camoyo woonse alimwi akupona munzila iitondezya kuti mwakalyaaba ncobeni kulinguwe.​—Matayo 22:36, 37.

MU CIBALO CITOBELA

Amwiiye mbomukonzya kulibikkila mbaakani kutegwa mububelesye cabusongo buumi bwanu.

LUGWALO LUYANDIKA

‘Amutuule mibili yanu kaili cipaizyo cuumi, cisalala, cizuminwa a Leza, nkokuti imulimo uusetekene ngomubeleka kwiinda mukubelesya maano.’​—Baroma 12:1.

INZILA IIGWASYA

Kwiinda mukugwasyigwa abazyali banu, amujane muntu umwi mumbungano uukonzya kumugwasya kuyaambele kumuuya kusikila kukubbapatizyigwa.—Milimo 16:1-3.

SENA MULIZYI . . . ?

Kubbapatizyigwa kulayandika kapati nkaambo ncibeela ‘cacitondezyo’ calufwutuko lwanu.—Ezekieli 9:4-6.

NZYONDIYANDA KUCITA!

Kutegwa ndisike akweelela kubbapatizyigwa, ndilasolekesya kumvwisya njiisyo zyamu Bbaibbele eezyi zitobela: ․․․․․

Nzyondiyanda kubuzya bazyali bangu kujatikizya makani aaya nzeezyi ․․․․․

INO MUYEEYA BUTI?

● Nkaambo nzi kubbapatizyigwa ncoili ntaamu iiyandika kukkala ansi kuyeeya?

● Ncinzi cikonzya kupa mwana musyoonto kufwambaana kuyanda kubbapatizyigwa?

● Ino nkaambo nzi kakonzya kupa mwana musyoonto kuwayawaya kulyaaba akubbapatizyigwa nokuba kuti uleelela?

[Majwi aakwelelezya sikubala]

“Kuzyiba kuti ndakabbapatizyigwa kwakandigwasya kusala kabotu mubuumi alimwi akutacita zintu zimwi izyakali kukonzya kundinjizya mumapenzi.”​—Holly

Kabbokesi/Cifwanikiso

Mibuzyo Iivwula Kubuzyigwa Kujatikizya Kubbapatizyigwa

Ino lubbapatizyo lwiiminina nzi? Kubbila cakumaninina mumaanzi akunuka caamba kuti mwafwa kubukkale bwanu mbomwakajisi kaindi, mpoonya akuba baumi baponena kucita kuyanda kwa Jehova.

Ino caamba nzi kwaaba buumi bwanu kuli Jehova? Caamba kumwaambila kuti mulibakwe, ikumusyomezya kuti kucita kuyanda kwakwe ncicentu cinooyandika kapati mubuumi bwanu kwiinda zintu zimbi zili zyoonse. (Matayo 16:24) Aboobo mweelede kulyaaba kuli Jehova kwiinda mumupailo kabutanasika buzuba bwakubbapatizyigwa.

Ino ncinzi ncomweelede kunoocita mubuumi bwanu kamutanabbapatizyigwa? Mweelede kuti kamupona kweelana ancolyaamba Jwi lya Leza alimwi aakwaambila bamwi kujatikizya zintu nzyomusyoma. Mweelede kunooyumya cilongwe canu a Leza kwiinda mukupaila alimwi akwiiya Jwi lyakwe. Alimwi mweelede kuti kamumubelekela Jehova akaambo kakuti mwasala kucita boobo, ikutali akaambo kakusikizyigwa abamwi.

Sena kuli myaka buya njomweelede kuba anjiyo kutegwa mweelele kubbapatizyigwa? Myaka yakuzyalwa tacili ncecintu ciyandika kapati. Nokuba boobo, mweelede kuti kamucikonzya kumvwisya ncocaamba kulyaaba.

Ino mbuti kuti muyanda kubbapatizyigwa pele bazyali banu baamba kuti mulindile? Ambweni balakonzya kwaamba boobo nkaambo bayanda kuti mube aluzyibo lunji mukupona buumi bwa Bunakristo. Amulubikkile maano lulayo lwabo, akubelesya ciindi eeco kuyumya cilongwe canu a Jehova.—1 Samuele 2:26.

[Kabbokesi]

Aakulembela

Sena Muyanda Kubbapatizyigwa?

Amubelesye mibuzyo atwaambo tuli ansi aawa kutegwa mubone naa mwayaambele akweelela kubbapatizyigwa. Amwaabale magwalo aabikkidwe kamutanalemba bwiinguzi bwanu.

Ino muunzila nzi lino momutondezya kuti mulamusyoma Jehova?​—Intembauzyo 71:5. ․․․․․

Ino mwatondezya buti kuti mulaamaano aayiisyidwe kwaandaanya ciluzi acitaluzi kwiinda mukwaabelesya?​—Bahebrayo 5:14. ․․․․․

Ino mupaila ziindi zinji buti? ․․․․․

Sena mupaila mipailo iigaminide, alimwi ino itondezya nzi kujatikizya luyando ndomujisi kuli Jehova?​—Intembauzyo 17:6. ․․․․․

Ansi aawa amulembe mbaakani zili zyoonse nzyomuyanda kulibikkila kujatikizya mipailo yanu. ․․․․․

Sena lyoonse mulacita ciiya canu ca Bbaibbele?​—Joshua 1:8. ․․․․․

Ino nzintu nzi nzyomubikkilizya muciiyo canu? ․․․․․

Ansi aawa amulembe mbaakani zili zyoonse nzyomuyanda kulibikkila kujatikizya ciiyo canu. ․․․․․

Sena muyaambele mumulimo wanu wakukambauka? (Mucikozyanyo: Sena mulakonzya kupandulwida bamwi njiisyo zyamu Bbaibbele zyatalisyo? Sena mulapilukila kubantu bakatondezya luyandisisyo? Sena mulasolekesya kusika ambaakani yakutalika kusololela ciiyo ca Bbaibbele caaŋanda?)

□ Inzya □ Peepe

Sena mulatola lubazu mumulimo wakukambauka nokuba kuti bazyali banu tabaciti oobo?—Milimo 5:42.

□ Inzya □ Peepe

Ansi aawa amulembe mbaakani zili zyoonse nzyomuyanda kulibikkila kujatikizya mulimo wanu wakukambauka.​—2 Timoteyo 2:15. ․․․․․

Sena mulajanika lyoonse kumiswaangano ya Bunakristo naa mulasotaukila?​—Bahebrayo 10:25. ․․․․․

Muunzila nzi momutola lubazu lyamiswaangano? ․․․․․

Sena mulaunka nokuba kuti bazyali banu tabaunki (ikuti naa bamuzumizya kucita boobo)?

□ Inzya □ Peepe

Sena mulakukkomanina ncobeni kucita kuyanda kwa Leza?—Intembauzyo 40:8.

□ Inzya □ Peepe

Sena inga mwaamba ziindi zigaminide nomwakakaka kuyungwa abeenzinyoko?​—Baroma 12:2. ․․․․․

Ino ncinzi ncomunoocita kutegwa luyando ndomujisi kuli Jehova luzumanane kuyuma?​—Juda 20, 21. ․․․․․

Sena muyoozumanana kumubelekela Jehova nokuba kuti bazyali banu alimwi abalongwe banu baleka kumubelekela?​—Matayo 10:36, 37.

□ Inzya □ Peepe

[Cifwanikiso]

Mbubwenya mbuli cikwati, kubbapatizyigwa nintaamu iicinca buumi, aboobo yeelede kubikkilwa maano kapati