Matayo 15:1-39
15 Lino ba Farisi abalembi+ bakasika kuli Jesu kuzwa ku Jerusalemu akwaamba kuti:
2 “Ino nkaambo nzi basikwiiya bako ncobasotoka tunsiyansiya twabasikale? Mucikozyanyo, tabasambi kumaanza* ciindi nobayanda kulya cakulya.”+
3 Mukuvwiila, wakabaambila kuti: “Ino nkaambo nzi ncomusotoka mulawo wa Leza akaambo katunsiyansiya twanu?+
4 Mucikozyanyo, Leza wakaamba kuti ‘Lemeka bauso abanyoko,’+ alimwi akuti, ‘Ooyo uusampaula* bausyi naa banyina ajaigwe.’+
5 Pele nywebo mwaamba kuti, ‘Kufwumbwa waambila bausyi naa banyina kuti: “Kufwumbwa ncendijisi icikonzya kumugwasya ncipego caabidwe kuli Leza,”+
6 teelede kulemeka bausyi naaceya.’ Aboobo mwapa kuti jwi lya Leza libe lyabuyo akaambo katunsiyansiya twanu.+
7 Nobasikuupaupa ameso, Isaya wakaliluzi naakasinsima kwaamba ndinywe kuti:+
8 ‘Aaba bantu balandilemeka amilomo yabo, pele myoyo yabo ili kule andime.
9 Kundikomba kwabo nkwabuyo, nkaambo bayiisya milawo yabantu kuba njiisyo zya Leza.’”+
10 Aboobo wakaita nkamu yabantu afwaafwi akubaambila kuti: “Amuswiilile akumvwisya caambwa:+
11 Tacili cintu cinjila mukanwa lyamuntu cimusofwaazya pe, pele nceeco cizwa mukanwa lyakwe icimusofwaazya.”+
12 Mpoonya basikwiiya bakaboola kulinguwe akumwaambila kuti: “Sena ulizyi kuti ba Farisi bacimwa nobamvwa nzyowaamba?”+
13 Wakaingula kuti: “Cisyango cili coonse ncaatakasyanga Taata wakujulu ciyoozyulwa.
14 Amubaleke buyo. Mbasololi boofwu. Ikuti moofwu keenzya moofwunyina, boonse bobilo bayoowida mumulindi.”+
15 Petro wakavwiila kuti: “Kotupandulwida cikozyanyo eeci.”
16 Aboobo wakabuzya kuti: “Sena andinywe tamunamvwisya?+
17 Sena tamuzyi kuti kufwumbwa cintu cinjila mukanwa cilainda mwida camana cilazwa anze?
18 Pele kufwumbwa zintu zizwa mukanwa zizwa mumoyo, eelyo zintu eezyo zilamusofwaazya muntu.+
19 Mucikozyanyo, mumoyo mulazwa mizeezo mibi,+ bujayi, bumambe, bwaamu,* bubbi, bumboni bwakubeja akusampaula.
20 Eezyi nzyezintu zisofwaazya muntu; pele kulya cakulya kakunyina kusamba kumaanza* takusofwaazyi muntu pe.”
21 Lino naakazwa ooko, Jesu wakaunka mucooko ca Turo a Sidoni.+
22 Lino mukaintu muna Fonike iwakazwa kucooko eeco wakaboola akoompolola kuti: “Ndifwide luse Mwami, O Mwana wa Davida. Mwanaangu musimbi unjidwe daimona limupenzya kapati.”+
23 Pele kunyina naakaamba cili coonse kulinguwe. Aboobo basikwiiya bakwe bakaboola akumulomba kuti: “Komwaambila aunke nkaambo uzyaaboompolola musyule lyesu.”
24 Wakavwiila kuti: “Tiindakatumwa kubantu boonse pe, pele ndakatumwa buyo kumbelele zisweekede zyamuŋanda ya Israyeli.”+
25 Nokuba boobo mukaintu ooyo wakaswena munsi-munsi akumufwugamina* kaamba kuti: “Mwami, ndigwasye!”
26 Jesu wakaingula kuti: “Tacili cibotu kubweza cinkwa cabana akuciwaalila tubwa.”
27 Mukaintu wakati: “Inzya Mwami, pele tubwa tulalya bufwefwelenga buloka kutebulu lyabasimalelo.”+
28 Mpoonya Jesu wakamuvwiila kuti: “Omukaintu, lusyomo lwako ndupati; acicitike kulinduwe mbuli mboyanda.” Aboobo mwanaakwe musimbi wakapona aciindi nciconya eeco.
29 Lino Jesu naakazwa kooko, wakasika afwaafwi a Lwizi lwa Galilaya,+ eelyo naakatanta acilundu wakakkala aawo.
30 Mpoonya makamu aabantu akamusikila, akaletelezya bantu balema, bapuutide, boofwu, basyaataambi abamwi banji akubabikka kumaulu aakwe, eelyo wakabaponya.+
31 Aboobo makamu aabantu akagambwa naakabona basyaataambi kabaambaula, bapuutide kabaponesyegwa, balema kabeenda aboofwu kababona, aboobo akalemeka Leza wa Israyeli.+
32 Pele Jesu wakaita basikwiiya bakwe akubaambila kuti: “Yandeetezya nkamu yabantu eeyi,+ nkaambo aba kale mazuba otatwe ngobakkala andime alimwi kunyina ncibalya. Tandiyandi kubaleka kuti baunke anzala,* nkaambo inga baile kunetuka munzila.”+
33 Nokuba boobo, basikwiiya bakamwaambila kuti: “Ino musyokwe omuno nkuli nkotutiijane zinkwa zikonzya kukkwana nkamu iili boobu?”+
34 Lino Jesu wakabaambila kuti: “Ino mujisi zinkwa zyongaye?” Bakati: “Zili ciloba atuswi tusyoonto.”
35 Aboobo naakamana kulailila nkamu yabantu kuti bakkale ansi,
36 wakabweza zinkwa zili ciloba atuswi, eelyo naakamana kulumba Leza, wakazikomauna akutalika kupa basikwiiya, mpoonya basikwiiya bakapa makamu aabantu.+
37 Eelyo boonse bakalya akukkuta, alimwi bakabweza zisuwo zipati* zili ciloba zizwide bufwefwelenga ibwakacaala.+
38 Lino akati kabaabo ibakali kulya, kwakali baalumi bali 4,000, ikutabalilizya abamakaintu abana.
39 Naakamana kwaambila makamu aabantu kuti aunke, wakatanta mubwato akuunka kucooko ca Magada.+
Bupanduluzi buyungizyidwe
^ Nkokuti, kulisalazya kweelana acilengwa.
^ Naa “uutukila.”
^ Mu Chigiriki bbala lyakuti por·neiʹa ilyaamba koonana ikutali kwamumulawo lyaamba zintu zinji. Amubone Bupanduluzi Bwamabala.
^ Nkokuti, kakunyina kulisalazya kweelana acilengwa.
^ Naa “akumukotamina.”
^ Naa “kakunyina ncibalya.”
^ Naa “zisuwo zyakunyamwida zyakulya.”
