Luka 7:1-50
7 Naakamanizya kwaambila bantu makani aakwe oonse, wakanjila mu Kapernauma.
2 Lino muzike umwi wasilutwe wabasikalumamba, ooyo ngwaakali kuyandisya wakali kufwumba bulamfwu.+
3 Naakamvwa mpuwo ya Jesu, wakatuma baalu bamwi baba Juda kulinguwe kuyoomulomba kuti aboole azooponye muzike wakwe.
4 Eelyo bakasika kuli Jesu akutalika kumukombelezya kabati: “Uleelede kumugwasya,
5 nkaambo ulaciyanda cisi cesu alimwi nguwakayaka cikombelo cesu.”
6 Aboobo Jesu wakaunka ambabo. Pele naakali afwaafwi kusika kuŋanda, silutwe wabasikalumamba wakatumide kale balongwe bakwe kuyoomwaambila kuti: “O Mwami, utalipenzyi pe, nkaambo tandeeleli kuti unjile muŋanda yangu.+
7 Nkakaambo kaako ncindatakalibona kuti ndileelela kuboola kulinduwe. Pele koile kwaamba buyo jwi, eelyo mubelesi wangu ulapona.
8 Nkaambo andime ndili muntu weendelezyegwa, ndilijisi basikalumamba mbondeendelezya alimwi naa ndaambila yooyu kuti, ‘Koya!’ ulaunka, alimwi naa ndaambila umbi kuti, ‘Boola!’ ulaboola, amuzike wangu ndamwaambila kuti, ‘Cita ceeci!’ ulacicita.”
9 Jesu naakamvwa majwi aaya wakagambwa, eelyo wakacengulukila kumakamu aabantu aakali kumutobela akubaambila kuti: “Ndimwaambile, nomuba mu Israyeli tandinajene muntu uulaalusyomo lupati luli boobu.”+
10 Eelyo aabo bakatumidwe nobakapiluka kuŋanda, bakajana muzike wapona.+
11 Nozyakainda buyo eezyi, wakaunka kumunzi uutegwa Naini, eelyo basikwiiya bakwe ankamu yabantu mpati bakali kweenda anguwe.
12 Naakasika afwaafwi amanjililo aamunzi, amubone! Kwakali mwaalumi uufwide wakatembedwe kuzwa mumunzi, walo wakali simuzyalwaalikke kuli banyina.+ Alimwi banyina bakali bamukamufwu. Kwakali ankamu mpati yabasimunzi yakali ambabo.
13 Eelyo Mwami naakamubona mukamufwu, wakamufwida luzyalo+ akumwaambila kuti: “Koleka kulila.”+
14 Mpoonya wakaswena afwaafwi akujata macila* eelyo basikumutemba bakaima. Kumane wakati: “Mulombwana, ndikwaambila kuti, buka!”+
15 Eelyo mwaalumi iwakafwide wakabuka akukkala akutalika kwaambaula, mpoonya Jesu wakamupa kuli banyina.+
16 Lino boonse bakayoowa alimwi bakatalika kulemeka Leza kabati: “Kwabusyigwa musinsimi mupati akati kesu,”+ akuti, “Leza wabacebuka bantu bakwe.”+
17 Alimwi mpuwo yakwe eeyi yakamwaika mu Judaya moonse amumasena oonse aazingulukide.
18 Lino basikwiiya ba Johane bakamulwiida makani aaya oonse.+
19 Aboobo Johane wakaita bobilo akati kabasikwiiya bakwe akubatuma ku Mwami kuyoobuzya kuti: “Sena ndonduwe ooyo uuboola+ naa tweelede kulangila uumbi?”
20 Baalumi aaba nobakasika kulinguwe, bakamwaambila kuti: “Johane Mubbapatizi watutuma kulinduwe kuti tukubuzye kuti, ‘Sena ndonduwe Ooyo Uuboola naa tweelede kulangila uumbi?’”
21 Aciindi eeco nciconya wakaponya bantu banji ibakali kuciswa+ abaabo ibakajisi malwazi mapati alimwi akutanda myuuya mibi, alimwi boofwu banji wakabapa kuti batalike kubona.
22 Mukwiingula wakabaambila kuti: “Kamuya mukamulwiide Johane nzyomwabona akumvwa, mukaambe kuti: Boofwu lino balabona,+ balema baleenda, basicinsenda balasalazyigwa, basinkematwi balamvwa,+ bafwide balabusyigwa abalo bacete baambilwa makani mabotu.+
23 Ulikkomene ooyo uutajani cilebyo mulindime.”+
24 Aabo mbaakatumide Johane nobakaunka, Jesu wakatalika kwaambila makamu aabantu kujatikizya Johane kuti: “Ino mwakaunkide kuyoobona nzi munkanda? Sena nditete liyuunwa amuwo?+
25 Ino kayi, ncinzi ncomwakaunkide kuyoobona? Sena muntu uusamide zisani ziteteete?*+ Aabo basama zisani zyeebeka akupona buumi bwakulikondelezya bali mumaanda aabwami.
26 Mubwini, ino mwakaunka kuyoobona nzi? Sena musinsimi? Inzya, alimwi ndimwaambila kuti mupati kwiinda musinsimi.+
27 Ooyu ngonguwe uulembedwe mumajwi aakuti: ‘Bona! Mebo ndatuma mutumwa wangu kumbele lyako,* ooyo uuyookubambila nzila.’+
28 Ndimwaambila kuti, akati kabaabo ibakazyalwa kubakaintu taakwe mupati kwiinda Johane, pele muntu muniini mu Bwami bwa Leza mupati kwiinda nguwe.”+
29 (Bantu boonse abasimutelo nibakamvwa makani aaya, bakaamba kuti Leza uliluleme mbwaanga bakabbapatizyidwe lubbapatizyo lwa Johane.+
30 Pele ba Farisi abaabo bakazyi Mulawo bakaunduluzya malailile* aa Leza ngobakapegwa+ mbwaanga tiibakabbapatizyigwa a Johane.)
31 “Aboobo ino bantu aaba bazyalani eeli ndibakozyanisye abani, alimwi ino bali mbuli bani?+
32 Bali mbuli bana baniini bakkede kumusika ibaitana kuti: ‘Twakamulizyila muntolilo pele tiimwakazyana; twakoomoka pele tiimwakalila.’
33 Mbubonya buyo, Johane Mubbapatizi waboola katalyi cinkwa alimwi katanywi waini,+ pele mwaamba kuti: ‘Ulaadaimona.’
34 Mwanaamuntu waboola kalya akunywa, pele mwaamba kuti: ‘Amubone! Imuntu mulyato alimwi uuyandisya kunywa waini, mweenzinyina wabasimutelo abasizibi!’+
35 Nokuba boobo, busongo bulabonwa kuti buliluleme kwiinda mubana bambubo boonse.”*+
36 Lino umwi waba Farisi wakazumanana kumulomba Jesu kuti akalye anguwe. Aboobo wakanjila muŋanda yamu Farisi ooyo akuyookkala kutebulu lyakulida.
37 Mpoonya amubone! Imukaintu umwi wamumunzi ooyo iwakazyibidwe kuti ngusizibi wakamvwa kuti Jesu wakali kulya* muŋanda yamu Farisi, aboobo wakaleta nsazi yamafwuta aanunkilila.+
38 Naakasika wakafwugama kusyule kumaulu aa Jesu akutalika kulila cakuti wakatesya maulu aa Jesu amisozi yakwe alimwi wakaapukuta amasusu aakwe. Kumane wakaamyonta maulu aa Jesu akwaananika mafwuta aayo aanunkilila.
39 Lino mu Farisi iwakatambide Jesu naakabona boobo, wakalyaambauzya mumoyo ulaamba: “Ikuti muntu ooyu naali musinsimi naazyiba kuti nguni alimwi ambwabede mukaintu ooyu uumuguma, ikuti ngusizibi.”+
40 Pele Jesu wakamwiingula kuti: “Simoni, kuli nceyanda kukwaambila.” Wakati: “Omwiiyi, kondaambila!”
41 “Kwakali bantu bobilo bakakweletede mali kumuntu umwi; umwi wakakweletede madinari* aali 500, pele umwi aali 50.
42 Nibakabula cintu cakubbadela cikwelete eeco, boonse bobilo wakabalekelela amoyo woonse. Aboobo nguni akati kabo uuyoomuyanda kapati?”
43 Mukwiingula Simoni wakati: “Ndasyoma ngooyo ngwaakalekelela mali manji.” Wakati: “Waingula kabotu.”
44 Mpoonya wakalanga mukaintu akwaambila Simoni kuti: “Sena wamubona mukaintu ooyu? Ndanjila muŋanda yako pele tonoondipa maanzi aakusamba kumaulu aangu. Pele mukaintu ooyu watesya maulu aangu amisozi yakwe akwaapukuta amasusu aakwe.
45 Yebo tonoondimyonta pe, pele mukaintu ooyu kuzwa ciindi ncaanjila tanaaleka kumyonta maulu aangu.
46 Yebo tonoondinanika mafwuta kumutwe, pele mukaintu ooyu wandinanika kumaulu mafwuta aanunkilila.
47 Akaambo kaceeci, ndikwaambila kuti zibi zyakwe zyalekelelwa+ nokuba kuti nzinji,* nkaambo watondezya luyando lupati. Pele ooyo uulekelelwa kusyoonto utondezya luyando lusyoonto.”
48 Mpoonya wakaambila mukaintu ooyo kuti: “Zibi zyako zyalekelelwa.”+
49 Aabo mbaakakkede limwi kutebulu lyakulida bakatalika kulyaambauzya mulicabo kuti: “Ino nguni muntu ooyu uulekelela noziba zibi?”+
50 Pele wakaambila mukaintu ooyo kuti: “Lusyomo lwako lwakufwutula;+ koya muluumuno.”
Bupanduluzi buyungizyidwe
^ Naa “kalo kakunyamwida muntu uufwide.”
^ Naa “zisani zibotu?”
^ Mu Chigiriki, “kumbele lyabusyu bwako.”
^ Naa “busolozi.”
^ Naa “mumilimo yambubo yoonse.”
^ Naa “wakalikkede kutebulu.”
^ Amubone Makani Aayungizyidwe B14.
^ Naa “nzipati.”
