Kuyeeyelwa kuti bantu bayanda kusika kumabbiliyoni aali 5 balangililwa kweebela musobano wabbola utegwa FIFA World Cup uzoochitwa kuzwa muNovember 20 kusika muDecember 18, 2022. Bamwi bayeeya kuti misobano iili boobu ipa kuti bantu bamvwe kabajisini kwiinda kuba basikweebela musobano luzutu.

•   “Misobano ilaanguzu zyakuchincha nyika yoonse. Ilaanguzu zyakusungwaazya bantu kuchita zimwi zintu. Misobano ilaanguzu zyakujatanizya bantu munzila iisiyene loko kwiinda zimwi nzila zyoonse.”—Nelson Mandela wakali purezidendi waSouth Africa.

•   “Bbola . . . lipa kuti bantu babe abulangilizi bumwi, babotelwaamwi, bayande zintu zifenene, bayande bamwi bantu, akuti babone kuti balakonzya kuyanda zintu zikozyenie.”—Gianni Infantino purezidendi waFIFA. a

 World Cup ayimwi misobano zilakonzya na kuzuzikizya zintu eezi? Kuli bulangilizi na bwakuti kuzooba luumuno akujatana?

 Munyaka uuno World Cup yali chimwi chintu chiinda kuba bbola biyo. Misobano yapa kuti kube kukazyania atala amakkalilo aabantu azyapolitikisi, kuswaanizya amakani atala azyeelelo zyabantu, kusaaluulana alukanda, akuba aazintu zyakuponaazyo.

 Nikuba oobo bayingi balazumina kuti misobano iili mbuli World Cup ipa kuti bantu babotelwe. Nikuba oobo, kweendelana anzibayanda bantu, misobano eeyi tiipi kuti bantu bakkale kabajisini pe. Muchiindi chakuchita oobo, ipa kuti bantu bachite tubunga akuti bachite zintu zyakaambwa aaBbayibbili kuti chizooba chitondeezyo chakuti tuli kupona “kumazuba aakumamanino.”—2 Timoti 3:1-5.

 Bbayibbili lipa bulangilizi bwachoonzyo bwakuti nyika yoonse izoojatana. Litubuzya kuti bantu boonse bazoojatana kabeendelezegwa aamfulumende yakujulu iitegwa “Bwaami bwaLeza.”—Lukka 4:43; Mateyo 6:10.

 Mwaami waBwaami oobu, Jesu Kkristu uzooba aachoonzyo chakuti kuzooba luumuno munyika yoonse. Bbayibbili lyaamba kuti:

•   “Balulami bayoozwidilila, alwalo luumuno luyoovwula.”—Intembauzyo 72:7

•   “Uyoovwuna mucete uukwiilila lugwasyo. . . Uyoobavwuna kukudyaamininwa akunkondo.”—Intembauzyo 72:12, 14.

 Nikuba mazubaano, makani akayiisigwa aaJesu akajatanizya kale mamiliyoni aabantu munyika zili 239. Bakayiya kutazonda bamwi. Kuti wiiye zyiingi, bala nkani zitobelana zilaamutwe utii “Ulakonzya Kuzunda Penzi Lyakuzondana.”