Kwaminyaka iili 30 yayinda, bantu biingi bakali kuyeeya kuti munyika mulikuba luumuno akuti zintu zilayinkilila kunembo kazili oobo. Pesi zintu zilikuchitika mazubaano zitondeezya kuti makani aaya teengachoonzyo pe.

•   “Bantu balikukataazikana kuti nkondo ilikuchitika kuGaza ilakonzya kuzoochitika akulizimwi nyika zili aafwiifwi mbukunga Israel ilikulwana aa-Hezbollah mugaanu wa-Lebanon.”—Reuters, January 6, 2024.

•   “Tubunga tulikweendelezegwa aa-lran tulikulwana muli zimwi ndawu. Alubo lran yakatalika lubo kupanga mabbomba aanyukkiliya. Mukuyungizya, lino lran yakajatana aRussia a-China. Zyoonse eezi zilikweeta mapenzi munyika zili mu-Europe kuswaanizya America.”—The New York Times, January 7, 2024.

•   “Russia ilikwiinkilila kunembo kubbomba Ukraine.”—UN News, January 11, 2024.

•   “China ilikusumpuka munkani zyabunoti azyankondo, Taiwan ilikuyanda lwaangunuko lwakulyeendelezya alubo kutamvwanana kulikuchitwa aChina a-United States kutondeezya kuti kulakonzya kubuka nkondo lino-lino.”—The Japan Times, January 9, 2024.

 Bbayibbili lityeni atala azintu zilikuchitika munyika mazubaano? Zilikuchitika eezi zilapa kuti kube nkondo na munyika?

 Bbayibbili taakwe nilyakaamba kuti nyika zilikulwana mazubaano zyakali kuzoolwana. Pesi lyakaamba kuti munyika zyiingi mwakali kuzooba nkondo akutondeezya kuti tulikupona muchiindi chili akuti kulwana ooku ‘kwakali kuzoogwisya luumuno aanyika.’—Chiyubunuzyo 6:4.

 Bbuku lyaDaniyele lyakaamba kuti “kuciindi cakumamanino,” nyika zili aanguzu kwiinda zimwi zyakali ‘kuyoontokana,’ naakuti kuyanda kutondeezyania manguzu. Bakali kuzoolwana kababelesya zibelesyo zyankondo zili aanguzu naakuti kababelesya “lubono,” naakuti mali.—Daniele 11:40, 42, 43.

 Bbayibbili litondeezya kuti zintu zizooyindilila biya kubija pesi zizoobota kumamanino. Jesu wakaamba kuti “kuzooba mapenzi mapati aatanaba aabuzuba achitika kuzwa kumatalikilo aanyika.” (Mateyo 24:21) “Mapenzi mapati” aaya azoozulwida nkondo iitegwa Amagedoni, eeyo yaambwa kuti “[nkondo] yabuzuba bupati bwaLeza Singuzuzyoonse.”—Chiyubunuzyo 16:14, 16.

 Nikuba oobo, Amagedoni izoofutula bantu kutali kubanyonyoona pe. Kabelesya nkondo eeyi yaAmagedoni, Leza uzoogwisya mfulumende zyabantu zilikweeta nkondo. Kuti ubone Amagedoni mbitazooyete luumuno kubantu, bala zyiiyo zitobela:

•   “Ino Nkondo ya Amagedoni Ninzi?”

•   “Armagedoni Iyooyeta Mpindu Mbotu!”