Jesu wakabuzya basikwiiya bakwe kuti: “Muyooba bakamboni bangu . . . kumasena aakulamfwu kapati aanyika.” (Milimo 1:8) Mazubaano, Bakamboni baJehova balikubeleka changuzu kuti bachite mulimu ooyu. Pesi kulaamwi masena kuswaanizya akumasena kukkala bantu biingi tabanaamvwa pe makani mabotu. Alubo muli zimwi nyika Bakamboni mbache. (Matayo 9:37, 38) Niinzi zilikuchitwa kuti bantu biingi bakambawukilwe makani mabotu?

 Kuti baswiilile malayilile aakaambwa aaJesu bakwesu bali muKkomiti yaMulimu yaKabunga Keendelezya kaBakamboni baJehova bakumbila mamishinali kuti bayinke kubusena kuyandikana basikupupulula biingi. Lino kuli mamishinali aali 3 090 munyika yoonse. * Biingi babo bakanjila zikolo zyambunga mbuli Chikolo chaBakambawusi baBwaami. Mamishinali aaba balalipeda kusiya myuunzi yabo akuya kuli zimwi nyika. Akaambo kakuti balisimide mubukombi, bakajana lwiiyo lwamuBbayibbele alubo bali aaluzibo lwakuchita milimu, mamishinali aaba balikukambawuka makani mabotu alubo balikusiila basikwiiya bapya chikozyano chibotu.

 Kumutabi umwi awumwi bakwesu bali mudipatimenti yaKkomiti yaMulimu iigwasya mamishinali babelekaamwi abakwesu bali muKkomiti yaMutabi kuti bagwasye mamishinali kuti bajane zintu ziyandikana zili mbuli aakukkala, busilisi amali iibagwasya kuti bajane zintu ziyandikana. Mumunyaka wamulimu wamu2020, Bakamboni baJehova bakabelesya mali iisika ku27 miliyoni kuti bagwasilizye mamishinali. Zintu eezi zilikugwasya mamishinali kuti babeleke changuzu mumulimu wakukambawuka akuti bakonzye kusimya mbungano.

 Mamishinali balikugwasya biyeni mumulimu wakukambawuka? Frank Madsen waKkomiti yaMutabi yakuMalawi, wakaamba kuti: “Akaambo kakuti mamishinali balikutondeezya chibindi akubelesya luzibo ndubakajana, balikugwasya bakwesu abachizi bamumbungano zyabo kuti bakambawuke mumasena aakali kukataazya kusika mbuli mumaanda aakwabilidwe akubusena kwaambuulwa umwi mulaka. Alubo kubeleka changuzu nkubalikuchita mamishinali kuti bayiye mulaka uuwambuulwa kubusena nkubabede aziyanza zyankuko kuli kusungwaazya bamwi. Alubo mamishinali aaba, balikugwasya bakwesu abachizi bachiniini kuti banjile mumulimu wachiindi choonse. Tulamulumba Jehova akaambo kamamishinali aaba.”

 Mukwesu uuli muKkomiti yaMutabi kuliimwi nyika wakaamba kuti: “Mamishinali batondeezya kuti bakombi baJehova bali munyika yoonse balijisini. Bantu batali Bakamboni balazibona kuti tulijisini nikuba kuti tuli aaziyanza zisiyene. Twakagwasigwa aanjiisyo zili muBbayibbele kuti tujatane.”

 Mamishinali bali kubagwasya biyeni basikupupulula bali mumbungano njibanjilaayo? Paulo wakuTimor-Leste, ubalumba loko mamishinali banjila aambungano njanjilaayo. Wakaamba kuti: “Ookuno kulapya. Pesi mamishinali aaba babeleka changuzu mumulimu wakukambawuka nikuba kuti bakazwa kundawu zitontola. Balafwambaana kusika kumuswaangano wamulimu wakukambawuka. Chiindi chiingi ngandababona kababweedela bantu mbibayiyaabo sikati zuba nilinga ligwisya twaande mumaanzi agoko. Bakagwasya bantu biingi kuti bayiye Bbayibbele kuswaanizya andime. Balalipeda kubelesya buumi bwabo kuti babelekele Jehova alubo eezi zilikupa kuti bamwi bamumbungano batobelezye chikozyano chabo.”

 Umwi payona wachiindi choonse uutegwa Ketti wakuMalawi, wakaamba atala ampuli yakwe mbiyakagwasigwa amamishinali. Wakati: “Chiindi mamishinali nibakasika kumbungano yesu ndime ndakali Kamboni andikke mumpuli yesu. Mamishinali aaba bakandigwasya loko alubo bakasaanguna kumvwanana aampuli yangu. Bakaba chikozyano chilikabotu kubana bangu alubo bakabagwasya kubona kuti kubelekela Jehova kupa kuti ubotelwe. Chikozyano chamamishinali aaba chakagwasya bana bangu basimbi batatu kuti babe mapayona aachiindi choonse alubo mulumaangu wakasaanguna kunjila miswaangano yambungano.”

 Mali iigwasilizya mamishinali izwa kuli? Izwa kumali iisangwa kuti igwasilizye mulimu uuchitwa munyika yoonse alubo imwi isangwa kakubelesegwa donate.isa4310.com. Tumulumba loko akaambo kazipo nzimusanga.