Nchibi na kuba aachiyandisyo chakupona kukabe kutamani? Peepe! Bbayibbele lyaamba kuti Leza wakatulenga katuli aachiyandisyo eechi. (Mukambausi 3:11) Alubo lyaamba kuti “Leza nduyando.” (1 Johane 4:8) Zilachita na kuti Leza ulaaluyando atulenge katuli aachiyandisyo chakupona kukabe kutamani kazi kuti tazikoochitika pe?

Takwe muntu uuyanda kufwa pe. Bbayibbele lyaamba kuti lufu ‘ngusinkondoma.’ (1 Bakorinto 15:26) Toonse tulafwa nikuba kuti bamwi bafwa kabachili baniini alubo bamwi bafwa kabali bakomena. Bantu biingi balayoowa nibayeeya kuti limwi zuba bazoofwa. Pesi lufu luzoomana na? Kujana lwamana biyeni?

Walizi na kuti teekuyanda kwaLeza pe kuti bantu kabafwa? Bbayibbele litondeezya kuti Leza uyanda kuti bantu bapone aanyika kukabe kutamani. Jehova Leza wakalenga nyika kayili azintu zyoonse nzibayanda bantu kuti kababotelwa. Alubo wakalenga muntu wakusaanguna Adamu, akumubikka mumuunda wamuEdeni wakali paradayizi. Kuzwa waawo, “Leza wakabona kuti zintu zyoonse nzyaakalenga, nzibotu kapati.”​—Matalikilo 1:26, 31.

Adamu wakalengwa muchikozyano chaLeza katakwe chibi pe. (Deuteronomo 32:4) Alakwe Eva, mukayintu waAdamu taakalikwe chibi pe, wakali kuyeeya zintu zili kabotu alubo taakali kuchiswa  pe. Jehova wakabaambila kuti: “Amuzyalane muvwule, muzuzye nyika akuyeendelezya, alimwi amweendelezye nswi zyamulwizi azilenge zyuuluka mujulu azilenge zyoonse zyeenda anyika.”​—Matalikilo 1:28.

Zyakali kunootola chiindi chilamfu kuti Adamu aEva bazuzye nyika abana babo. Bakeelede kuzyala bana mpawo bana babo bazyale bana kusikila nyika izule mbuuli mbaakali kuyanda Leza. (Isaya 45:18) Zyakali kuchita na kuti Leza ababuzye chisyomezyo eechi kali wakali kuyanda kuti bapone kwachiindi chifwiifwi chakuti bakonzye kubona bana abazukulu babo luzutu kabatazi pe ziyoochitika kunembo?

Yeeya atala amulimu wakweendelezya banyama Adamu ngwaakapedwe. Wakaambilwa kuti abawuzike mazina, eezi zyakali kunootola chiindi. (Matalikilo 2:19) Kuti akonzye kubeendelezya wakeelede kwiiya akuziba zyiingi atala ambabo. Kweendelezya banyama kwakali kunootola chiindi chilamfu loko.

Majwi aLeza akuti bazuzye nyika akuti beendelezye banyama atondeezya kuti bazyali besu bakusaanguna bakeelede kupona minyaka myiingi. Nisimpe, Adamu wakapona minyaka myiingi loko.

Bbayibbele lyaamba kuti kuli bantu bakapona kwaminyaka myiingi kwiinda njitupona mazubaano. Lyaamba kuti: “Myaka yoonse njaakapona Adamu yakali 930.” Alubo lyaamba bamwi baalumi bali 6 bakapona minyaka yiinda ku900! Baalumi aaba baswaanizya Seti, Enosi, Kkenani, Jaredi, Metusela aNowa. Baalumi aaba bakapona Zambangulwe lyamuchiindi chaNowa kalitanasika pesi Nowa wakapona kwaminyaka iili 600 Zambangulwe kalitanaasika. (Matalikilo 5:5-27; 7:6; 9:29) Niinzi chakali kupa kuti bapone kwachiindi chilamfu boobu?

Kulakonzeka kuti chakapa kuti baalumi aaba bapone minyaka myiingi, nkuti boonse bakapona chiindi chibi kachitanasimpa miyanda. Nkamboonzi muntu uutakwe chibi naakonzya kupona minyaka myiingi? Alubo lufu luzoogwisigwa biyeni? Kuti tujane nsandulo, tweelede kusaanguna kuziba kuti nkamboonzi nituchembaala akufwa.