Njiisyo Zitugwasya Kuti Tubotelwe Akukkutisikana Mubuumi
Toonse kazitakwe ndaba kuti tulikwete naakuti tatukwete, tuli baniini naakuti tuli bapati, tuyanda kubotelwa akukkutisikana mubuumi. Anguwe Mulengi wesu uyanda kuti tubotelwe akuti tukkutisikane. Nkinkaako, wakatupa njiisyo zitugwasya.
Beleka Changuzu
“Abeleke mulimo canguzu, acite mulimo mubotu amaanzaakwe, kutegwa abe acintu cakupa yooyo uubulide.”—BAEFESO 4:28.
Mulengi wesu uyanda kuti tube aamaboneno aalikabotu atala akubeleka. Nkamboonzi? Muntu uubeleka changuzu ulabotelwa nkaambo ulakonzya kujana zintu nzyayanda mubuumi alubo ulakonzya kusanina mpuli yakwe. Muntu ooyo ulakonzya kugwasya umwi uuyanda lugwasyo. Muntu ngwabelekela ulamuyanda. Nkache loko kuti muntu uubeleka changuzu aandwe mulimu. Bbayibbele lyaamba kuti zintu zibotu nzitujana kuti twabeleka changuzu, “ncipego ca Leza.”—Mukambausi 3:13.
Bamuntu Uusyomeka
“Tusyoma kuti tujisi manjezyeezya aasalala, mbwaanga tuyanda kuti katusyomeka muzintu zyoonse.”—BAHEBRAYO 13:18.
Kuti katusyomeka tulaba aabulemu, tatukataazikani pe alubo toona ng’onzi ndono. Alubo bamwi bayootusyoma akutulemeka. Pesi bantu batasyomeki bazilota biya eezi. Myoyo yabo ikkala kayibakataazya alubo nga bali kuyoowa kuti limwi zuba balakonzya kuzoojatwa akaambo kakutasyomeka kwabo.
Baamaboneno Aalikabotu Atala Amali
“Ibukkale bwanu butabi bwakuyandisya mali pe, pele amukkutile azintu nzyomujisi lino.”—BAHEBRAYO 13:5.
Tuyanda mali kuti tuule chakulya azimwi zintu ziyandikana mubuumi. Pesi ‘kuyandisya mali’ kulakonzya kutunjizya mumapenzi. Kuyandisya mali kulakonzya kupa kuti muntu abelesye chiindi chakwe amanguzu aakwe kuti ajane mali nyingi. Kuyandisya mali kulakonzya kupa kuti muntu atajani chiindi chakuba aamwi amuntu ngwakwetenaawe abana bakwe alubo kulakonzya kupa kuti ajatwe aamalwazi. (1 Timoteyo 6:9, 10) Muntu uuyandisya mali ulakonzya kusunkwa kuti atasyomeki. Mwaalumi musongo wakaamba kuti: “Muntu uusyomeka uyoojana zileleko zinji, pele ooyo uufwamvwaanya kujana buvwubi takoozumanana kubula mulandu.”—Tusimpi 28:20.
Sala Lwiiyo Lulikabotu
“Kobambilila busongo bugwasya alimwi akuyeeya kabotu.”—TUSIMPI 3:21.
Lwiiyo ndutujana kuzikolo lutugwasya kuti tube bantu basyomeka akuti tube bazyali balikabotu. Pesi lwiiyo oolu alulikke talupi kuti tujane zintu zyoonse nzituyanda akuti tujane kubotelwa kwachoonzyo. Kuti tuzwidilile muzintu zyoonse nzituchita mubuumi, tuyanda lwiiyo luzwa kuli Leza. Bbayibbele lyaamba kuti muntu uuswiilila Leza “zyoonse nzyacita ziyoozwidilila.”—Intembauzyo 1:1-3.
