Kutuwa pa 1 November 2023 mpaka pa 31 January 2024, Akaboni aku Yehova akujumpha 19,000 angugwiraku ntchitu ya upharazgi wapade yo yinguchitika ku Bolivia ndi ku Colombia. Pa nyengu ya upharazgi wapade yeniyi, uthenga wachilindizga wo we mu Bayibolu ungupharazgika mu Chisipanishi ndipuso muvineneru vinyaki 18 kusazgapu Chineneru Chamanja cha ku Bolivia kweniso cha ku Colombia.

Mubali yo walongoro Chipanishi wa ku Guadalupe ku Colombia wanguzizwa ukongwa wati wawona munthukazi wajula chisasa ndipu wangumutauzga mwakumukambiya kuti: “Talindizganga yimwi!” Munthukazi mwenuyu wangukonkhoska kuti mazuŵa ngamanavi kuvuli, iyu ndi mulumu waki akambiskananga asani mphakwenere kuti akondweriyeku maholidi nga chisopa. Mulumu waki wangukamba kuti wanguwona abali ŵidu achipharazga kufupi. Iyu wangugomezga kuti Akaboni afikengi kunyumba yawu ndipu azakuŵamuka mafumbu ngo ŵenangu. Abali ŵidu angukondwa kuti anguwovya banja ili kuziŵa vo Bayibolu likamba ndipu angunozga ndondomeku kuti munthu munyaki walutirizgi kuŵayende.

Pa nyengu yo azichi ŵaŵi apharazganga mutawuni ya Cuatro Cañadas ku Bolivia, angukambiskana ndi munthukazi munyaki zina laki Miguelina kubwalu kwa sitolu. Ŵati aziŵa kuti munthu yo wamuyanga wakutayika, azichi yaŵa anguŵerenga lemba la Chivumbuzi 21:3, 4. Miguelina wangukamba kuti wakhumba kuziŵa vinandi vakukwaskana ndi Bayibolu. Mwasoka, iyu wajanga kuchigaŵa chakusuzga kufikaku kweniso wengavi foni. Ndipu pati pajumpha mazuŵa, azichi ŵaŵi ŵenaŵa angupharazgiya musungwana yo wenga panyumba paki kubwalu kwa tawuni yeniyo. Mwamabuchibuchi, Miguelina wangutuliya pabwalu. Azichi wo, anguzizwa ukongwa kuwona kuti mwana yo akambiskananga nayu wenga mwana waku Miguelina. Wosi angukondwa ukongwa! Ndipu pangunozgeka ndondomeku kuti banja losi lenili liyambi kusambira Bayibolu.

Tigomezga kuti Yehova wawonga ukongwa phamphu la abali ndi azichi wo angugwiraku ntchitu yapade yeniyi. Iyu walutirizgengi kutumbika ŵanthu ŵaki po tipharazga uthenga wamampha “ku chakulengeka chechosi pacharu chapasi.”—Akolose 1:23.