Pa Akaboni aku Yehova mamiliyoni nganandi wo aja ku Latin America, pe ŵanthu anandi wo alongoro vineneru vakupambanapambana kweniso ŵe ndi midawuku yawu. Anandi mwa ŵanthu ŵenaŵa mbabali ndi azichi ŵidu ndipu atumbika midawuku ya kumalu ko aja. Kuti abali yaŵa awovyi ŵanthu kuziŵa uneneska wa mu Bayibolu, yiwu afwatuliya kweniso kugaŵiya mabuku nga Akaboni aku Yehova mu vineneru vimanavimana vakujumpha 130 vo ŵanthu ku Latin America alongoro. a Chinanga kuti veviyo, anyaki mwa ŵanthu yaŵa asuskika chifukwa chakuti akusankha kuteŵete Yehova kweniso kukana kuchitaku midawuku yo yileka kukoliyana ndi Malemba yo ŵanthu anandi mu vigaŵa vawu achita. Kumbi ndalama zo mupereka zigwira wuli ntchitu pakuwovya ŵanthu ŵenaŵa?

 Ku Mexico, abali ndi azichi ŵidu wo aja mumuzi wa Huichol wo we kumapiri nga Jalisco State, angukana mwaulemu kuchitaku chechosi cho chisuskana ndi vo Bayibolu lisambiza. b Kweni venivi vingukwiyiska ŵanthu anyaki mumuzi wenuwu. Pa 4 December 2017, gulu la ŵanthu achiwawa linguyukiya Akaboni aku Yehova mumuzi wenuwu kweniso ŵanthu anyaki wo ŵenga nawu limoza. Gulu lachiwawa lenili linguchichizga abali ŵidu kuti asami mumuzi uwu, lingunanga katundu wawu kweniso kuŵawofyeza kuti lazamubaya weyosi yo wazamuwere so mumuzi uwu.

 Akaboni aku Yehova wo aja mumatawuni ngapafupi ndi muzi uwu anguchitapu kanthu kuti awovyi abali ndi azichi ŵidu. Kweni kumbi ntchinthu wuli cho chakhumbikanga kuchitika kuti abali ndi azichi yaŵa awere so mumuzi uwu? Mubali munyaki zina laki Agustín wangukamba kuti: “Tengavi ndalama zakukwana kuti tidani loya kuti watimiyi pa nkhani iyi, ndipu taziŵanga so cha kuti tingaluta nayu pani nkhani iyi.”

 Pakuti abali ŵidu ŵengavi wanangwa wakusopa, ofesi ya nthambi ya ku Central America yinguchitapu kanthu mwaliŵi kuti yiŵawovyi. Chakwamba, ofesi iyi yingupempha ŵaraŵara a muchigaŵa ichi kuti ayifufuzi umamphaumampha milandu yeniyi. Chachiŵi, Komiti ya Akukumaniska ya Wupu Wakulongozga yinguzomereza kuti ofesi iyi yigwiri ntchitu limoza ndi abali a mu Dipatimenti yo Yiwona va Marangu ku malikulu ngidu ndipuso kuti nkhani iyi aluti nayu ku khoti. Mulandu uwu anguluta nawu ku Khoti Likulu Ukongwa ku Mexico.

 Maloya ngakutuliya mu vyaru vosi nganguwunozgeke umamphaumampha mulandu uwu ndipu angukonkhoska kuti nge mo ŵanthu akhumbikiya kutumbika midawuku ya ŵanthu wo aja mu mizi yo yilongoro vineneru vakupambanapambana, ndimu so ŵanthu mumizi yeniyo akhumbikiya kuvikiliya wanangwa wa ŵanthu ŵawu wosi. Ndipu kwali munthu waja pani, kweni weyosi we ndi wanangwa.

 Pa 8 July 2020, Khoti Likulu Ukongwa lingupereka cheruzgu chaki mwakumiya Akaboni aku Yehova. Khoti ili linguyeruzga kuti ŵanthu wosi wo angudikiskika awere so mumuzi wawu. Agustín yo tamuzumbuwapu kali, wangukonkhoska mo iyu kweniso anyaki wosi wo angudikiskika angukondwe ndi vo khoti lingukamba. Iyu wangukamba kuti: “Tiwonga ukongwa kweniso te akukondwa ukongwa pa vo abali atichitiya. Akalekengi kutiwovya, pengavi cho tatingi tichitengi.”

 Abali ndi azichi ŵidu wo aja mu muzi wa San Juan de Ilumán, ku Ecuador, nawu angukumana ndi suzgu yakuyanana ŵaka ndi yeniyi. Muzi uwu we ndi ŵanthu anandi wo aja ku Otavalo Valley. Mu 2014, abali ŵidu ŵati alondo ndondomeku yosi yakwenere, angwamba kuzenga Nyumba wa Ufumu muchigaŵa ichi. Kweni wasembi munyaki wangwambisa kagulu kachiwawa ka ŵanthu akujumpha 100 ndipu angukambiya abali ŵidu kuti aleki kuzenga Nyumba ya Ufumu. Pavuli paki, muzi wosi ungulamula Akaboni aku Yehova mu chigaŵa ichi kuti aleki kuwungana.

 Abali a mu dipatimenti yakuwona va marangu ku ofesi ya nthambi ku Ecuador ndipuso ku malikulu ngidu, angugwira ntchitu mwakukoliyana kuti avikiliyi wanangwa wakusopa wa abali ŵidu. Abali yaŵa anguluta nayu ku khoti nkhani yeniyi. Venivi vinguchitiska kuti ŵanthu a mumuzi uwu aleki kususka abali ŵidu ndipu anguŵazomereza kuti ayambi so kuwungana kweniso kuti amalizi kugwira ntchitu yawu yakuzenga Nyumba ya Ufumu. Kweni kuti abali ŵidu azileki so kusuzgika kunthazi, wo angumiya abali ŵidu mu khoti angupempha makhoti ngakulungakulu kuti po aŵanaŵaniya cheruzgu cho angazipereka pa nkhani iyi, aŵanaŵaniyengi so fumbu lakukhumbika ukongwa ili lakuti: Kumbi mizi yo ye ndi ŵanthu wo alongoro vineneru vakupambanapambana yikhumbika kutumbika wanangwa wa ŵanthu pacharu chosi?

 Pa 16 July 2020, Khoti Lakuwona va Marangu ku Ecuador, lo so ndi khoti likulu ukongwa mucharu ichi linguvwa mulandu uwu. Maloya ku Ecuador wo so mbali ŵidu angumiya abali ndi azichi. Kusazgiyapu yapa, anayi mwa abali ŵidu wo mbakaswiri pa va uloya pacharu chosi angukambiya khoti mulandu wosi. Chifukwa cha mulili wa COVID-19, maloya ngidu kutuliya mu vyaru vakupambanapambana kweniso a khoti, angukambiskana mulandu uwu kuziya pa vidiyokonferensi. Yaka nkhakwamba kuti khoti lizomerezi maloya ngakumiya Akaboni aku Yehova pacharu chosi kukambiskana mu nthowa iyi. c Abali yaŵa anguzumbuwa ŵaraŵara akuwona va marangu pacharu chosi kuti asimikiziyi kuti munthu yo wakutuliya kumalu nganyaki waguliska wanangwa waki cha chifukwa chakuti waja mu mizi yo ŵanthu alongoro vineneru vimanavimana.

 Abali ŵidu ku Otavalo Valley akhumbisiska kuzivwa vo Khoti Lakuwona va Marangu liyeruzgengi. Kweni pasonu panu, yiwu awonga ukongwa vo abali aŵachitiya. Mubali César, yo wateŵete nge mura mu mpingu wa Ilumán Quichua, wangukamba kuti: “Ndi Yehova pe yo kuziya mu gulu laki wangachita vikulu ku ŵanthu amanavi.”

 Maloya ngosi ngo ngayendesanga nkhani iyi mbakaboni aku Yehova, ndipu wosi akondwa chifukwa chakuwovyaku pa mulandu uwu kwambula kulipirika. Kweni kuluta ndi milandu iyi ku khoti, kunozgeke ndipuso kuma mu khoti kukhumba ndalama zinandi. Maloya ngidu kweniso abali anyaki angumaliya maola ngakujumpha 380 pakunozgeke vo angachimuka mu khoti ndipuso maola nganyaki 240 pakufwatuliya vimakalata vakuchigwiriskiya ntchitu pa mulandu wa ku Mexico. Maloya pafufupi 40 kutuwa pa charu chosi angumaliya maola nganandi pa mulandu wa ku Ecuador. Kumbi ndalama zakuwovye abali yaŵa kuti akavikiriyi wanangwa wa abali ŵidu, zingutuwa pani? Zingutuwa pa ndalama zo mupereka mwakugwiriskiya ntchitu nthowa zakupambanapambana zo zizumbulika pa donate.isa4310.com. Titikuwongani ukongwa chifukwa cha mtima winu wakupaska.