Chiuta ndi mzimu wambula kuwoneka. Iyu wakulenga kuchanya, charu chapasi ndi vinthu vosi vamoyu. Kweni palivi yo wakulenga Chiuta ndipu Iyu walivi chiyambi. (Sumu 90:2) Chiuta wakhumba kuti ŵanthu amuziŵi kweniso aziŵi uneneska wakukwaskana ndi Iyu.​—Ŵerengani Machitidu 17:24-27.

Tikhoza kuliziŵa zina laki. Tingaziŵa so mijalidu yaki yinyaki mwakuwona vinthu vo Iyu wakupanga. (Ŵaroma 1:20) Kweni kuti timuziŵi umampha Chiuta, tikhumbika kusambira Mazu ngaki, Bayibolo. Bayibolo lititiwovya kuti tije ndi mijalidu yaku Chiuta ya chanju.​—Ŵerengani Sumu 103:7-10.

Mulengi widu Yehova, watinkha vinthu vambula urunji. (Marangu 25:16) Iyu wakulenga ŵanthu muchikozgu chaki. Ndichu chifukwa chaki tanandi titinkha vinthu vambula urunji. Ndi Chiuta cha yo wachitiska vinthu vambula urunji vo tiwona. Chiuta wakupaska munthu wanangwa wakusankha vakuchita. Nchakuchitiska chitima kuti ŵanthu anandi atiwugwiriskiya nchitu umampha cha wanangwa wawu ndipu achita vinthu vambula urunji. Yiwu akwiyiska Yehova.​—Ŵerengani Chiyambo 6:5, 6; Marangu 32:4, 5.

Yehova watanja urunji ndipu wazomerezgengi cha kuti vinthu vambula urunji vichitikengi mpaka muyaya. (Sumu 37:28, 29) Bayibolo lilayizga kuti pambula kuswera yapa, Chiuta watuzgengepu vinthu vosi vambula urunji.​—Ŵerengani 2 Petro 3:7-9, 13.