KINGSLEY wangukamba nkhani yaki yakwamba mu Sukulu ya Uteŵeti Waku Chiuta. Iyu wazumbuwanga mazu umamphaumampha kwambula kujumphiska. Kweni nchifukwa wuli waŵerenganga kwambula kulereska pa Bayibolu?

Kingsley wawona cha ndipu waja ku Sri Lanka. Iyu wasuzgika so kuvwa ndipu wagwiriskiya ntchitu njinga ya ŵanthu akupunduka. Kumbi munthu mwenuyu wangusambira wuli vakukwaskana ndi Yehova, nanga wangusere wuli mu Sukulu ya Uteŵeti Waku Chiuta? Ankhani ndikukonkhoskiyeni.

Ndati ndakumana ndi Kingsley kakwamba, ndinguzizwa ukongwa kuwona mo wakhumbiyanga kusambira uneneska wa m’Bayibolu. Pa nyengu iyi ndipu wasambirapu kali Bayibolu ndi Akaboni aku Yehova anandi. Iyu wagwiriskiyanga ntchitu buku lakupelukapeluka la ŵanthu ambula kuwona la Chidziŵitso Chotsogolera ku Moyo Wosatha. a Ndipu wanguzomera kuti wayambi so kusambira Bayibolu, kweni penga masuzgu ngaŵi ngo tingukumana nangu.

Chakwamba, Kingsley wajanga ndi anyaki kunyumba yakusungiyaku ŵanthu akukota ndipuso akupunduka. Chifukwa chakuti kwajanga chiwawa ndipuso wasuzgikanga kuvwa, tichisambira ndakhumbikanga kukweza mazu. Ndipu weyosi yo wajanga pa nyumba yeniyi wavwanga vo tasambiranga.

 Chachiŵi, Kingsley waŵerenganga ndi kuvwisa vinthu vimanavi asani tisambira. Kuti wayanduwengi ndi vo wasambira, Kingsley wanozgekiyanga mwakukwana. Mwakuyeruzgiyapu, iyu waŵerenganga mwakuwerezgawerezga ndimi zo tatingi tisambirengi, waŵerenganga malemba ngosi ngo ngengapu m’Bayibolu laki la ŵanthu ambula kuwona kweniso wasaniyanga kwamuka kwa mafumbu. Ivi vinguwovya ukongwa. Asani tisambira, wajanga pasi mwakupinda malundi ngaki kweniso wakonkhoskanga mwalikondwa vo wasambirapu. Pavuli paki, tingwamba kusambira kaŵi pa sabata ndipu zuŵa lelosi tasambiranga kwa maora ngaŵi.

Kingsley wakhumbisiskanga kuluta ku Nyumba ya Ufumu kuti wakaungani, kweni ivi venga vakusuzga. Iyu wakhumbikanga munthu kuti wamuwovyi kuja pampandu, kukwera mugalimotu ndipuso kusere mu Nyumba ya Ufumu. Vakukondwesa ukongwa kuti abali ndi azichi anandi asinthananga kuti amuwovyi ndipu awonanga kuti uwu ndi mwaŵi ukulu. Asani maunganu ngayamba, Kingsley wajanga pafupi ndi sipika kuti wavwengi umampha kweniso kuti wamukengepu!

Kingsley wati wasambirapu kwa nyengu yitaliku, wanguŵanaŵana kuti wasere Sukulu ya Uteŵeti Waku Chiuta. Ndipu kwati kwaja masabata ngaŵi kuti wakakambi nkhani yaki yakwamba yakuŵerenga Bayibolu, ndingumufumba asani wayinozgeke. Iyu wangukamba ndi mtima wosi kuti, “Hinya M’bali, ndanozgeke ndipu ndayesere kwa maulendu pafupifupi 30.” Ndingumuwonga ukongwa chifukwa chakuyesesa kunozgeke, ndipu ndingumupempha kuti wandiŵerengiyepu. Iyu wangujula Bayibolu laki, wanguŵika vikumbu vaki pa nkhani yo wakhumbanga kuŵerenga, ndipu pavuli paki wangwamba kuŵerenga. Kweni ndinguwona kuti wayendeskanga vikumbu cha pakuŵerenga nge mo wachitiyanga nyengu zosi. Iyu wanguchita ivi chifukwa wanguloŵezga nkhani yosi!

Masozi ngangwamba kusika mumatakama ngangu, chifukwa chakuleka kuvwana ndi vo ndinguwona. Ndingufumba Kingsley kuti wafiska wuli kuloŵezga nkhani yosi chifukwa wanguyiyesere maulendu 30 pe. Iyu wangumuka kuti: “Ndayeseriyanga maulendu 30 pa zuŵa.” Kingsley wajanga pa salu yaki ndipu waŵerenganga nkhani yaki mwakuwerezgawerezga mpaka kuyiloŵezga yosi.

Zuŵa lingufika kuti Kingsley wakambi nkhani yaki mu Nyumba ya Ufumu. Iyu wati wamalizga, ŵanthu wosi mumpingu angumba manja chifukwa cha likondwa ndipu anandi anguliya kuwona mo iyu wangukambiya umampha nkhani yaki. Mwakuti, mupharazgi munyaki yo wanguleka kukamba nkhani mu sukulu chifukwa cha mantha, wangupempha kuti wayambi so. Chifukwa wuli? Iyu wangukamba kuti, “Asani Kingsley ndiyu wafiska, nani ndifiskengi!”

Kingsley wangusambira Bayibolu kwa vyaka vitatu, ndipu wangujipereka kwaku Yehova mwakubatizika pa 6, September 2008. Iyu wanguteŵete Yehova mwakugomezgeka mpaka po wangufwiya pa 13 May, 2014. Kingsley wagomezganga kuti wazamulutirizga kuteŵete Yehova kwambula kutama m’charu chifya. (Yes. 35:5, 6)​—Yikukambika ndi Paul McManus.