VO MUNGACHITA KUTI MULEKENGI KUSUZGIKA MAŴANAŴANU
Vingachitika Kuja ndi Umoyu Wambula Kusuzgika Maŵanaŵanu
Bayibolu lingatiwovya kuti tileki kusuzgika maŵanaŵanu ndi vinthu vambula kukhumbika. Kweni pakutija tingafiska cha kumalana ndi vinthu vo vingachitiska kuti tisuzgikengi maŵanaŵanu. Mulengi widu pe ndiyu wangachita ivi. Ndipu iyu wakusankha munthu munyaki kuti watiwovyi. Munthu mwenuyu ndi Yesu Khristu. Pambula kuswera yapa, Yesu wazamuchitiya ŵanthu vinthu vinandi vamampha kuphara vo wanguchita pa nyengu yo wenga pacharu chapasi. Mwakuyeruzgiyapu:
YESU WAZAMUCHIZGA ŴANTHU NGE MO WANGUCHITIYA.
“Ndipu ŵanthu azanga ndi wo atamanga matenda ngakupambanapambana . . . , ndipu iyu wanguŵachizga.”—MATEYU 4:24.
YESU WAZAMUPEREKA CHAKURYA NDIPUSO MALU NGAKUJA KU ŴANTHU WOSI.
“Yiwu [ŵanthu wo azamulamulika ndi Yesu] azamuzenga nyumba ndi kujamu, ndipuso azamulima minda ya mphereska ndi kurya vipasu vaki. Yiwu azamuzenga nyumba kuti wajemu munthu munyaki cha. Ndipuso azamulima kuti waryi munthu munyaki cha.”—YESAYA 65:21, 22.
MU ULAMULIRU WAKU YESU ŴANTHU AZAMUJA MWACHIMANGU NDIPUSO MWAKUVIKILIRIKA.
“Mu mazuŵa ngaki, ŵanthu arunji azamubiriŵira, ndipu chimangu chazamuja chikulu mpaka po mwezi wazamuleke kuŵapu. Iyu wazamulamuliya ŵanthu kutuwa kunyanja mpaka kunyanja kweniso kutuwa ku Msinji mpaka kuvigoti va charu. . . Ndipu arwani ŵaki azamunyanganga fuvu.”—SUMU 72:7-9.
YESU WAZAMUTUZGAPU VINTHU VAMBULA URUNJI.
“Iyu wazamuchitiya chitima ŵanthu akusika ndi akavu, ndipu wazamutaska maumoyu nga ŵanthu akavu. Wazakuŵataska ku ŵanthu ankhaza kweniso achiwawa.”—SUMU 72:13, 14.
YESU WAZAMUTUZGAPU MATENDA NDI NYIFWA.
“Nyifwa yiŵengepu so cha, chinanga nkhuliya pamwenga kukuta pamwenga urwirwi viŵengepu so cha.”—CHIVUMBUZI 21:4.
