Kumbi Ntchinthu Wuli Cho Chingatiwovya kuti Tizije ndi Umoyu Wamampha Kunthazi?
Nge mo nkhani zajumpha zakambiya, ŵanthu ayesesa kuti asaniyi umoyu wamampha mwakuthemba vinthu nge, nthazi yambula kuwoneka, masambiru, chuma kweniso kuja munthu wamampha. Kweni kuchita venivi, kungayanana waka ndi kugwiriskiya ntchitu mapu yakulandizga pakuluta kumalu ngachilendu. Kumbi venivi ving’anamuwa kuti palivi ulongozgi wakuthembeka wo ungawovya kuti tizije ndi umoyu wamampha? Awa!
ULONGOZGI WAKUTULIYA KU MUNTHU WAKUTHEMBEKA
Kanandi asani tisankha vakuti tichiti, tifumba munthu mura kweniso wazeru kuphara isi. Mwakuyanana ŵaka, tingasaniya ulongozgi wo ungatiwovya kuti tizije ndi umoyu wamampha kunthazi ku Munthu yo ndi mura ukongwa kweniso wazeru kuphara isi. Tingaŵerenga ulongozgi Waki mubuku lo lingwamba kulembeka vyaka pafufupi 3,500 vo vajumpha. Buku lenili lidanika kuti Bayibolu.
Ntchifukwa wuli mungalithemba Bayibolu? Chifukwa Munthu yo wakulilemba ndi mura kweniso ngwazeru ukongwa muchilengedu chosi. Bayibolu litimukonkhoska kuti “Wamazuŵa Nganandi” yo ‘ngwamuyaya mpaka muyaya.’ (Daniyeli 7:9; Salimo 90:2) Iyu ndi “Mlengi wa kuchanya, Chiuta wauneneska, Yo wakupanga charu chapasi.” (Yesaya 45:18) Iyu watitikambiya kuti zina laki ndi Yehova.—Salimo 83:18.
Chifukwa chakuti Bayibolu likutuliya ku Mlengi wa ŵanthu wosi, likambapu cha kuti mudawuku pamwenga mtundu unyaki wa ŵanthu ngwapachanya ukongwa kuluska unyaki. Ulongozgi waki utovya nyengu zosi ndipu ŵanthu pacharu chosi chapasi ayanduwa nawu. Lisanirika mu vineneru vinandi ndipu ndakuwanda ukongwa pacharu chosi chapasi kuluska buku linyaki lelosi. * Venivi ving’anamuwa kuti munthu weyosi wangaliŵerenga ndipuso kugwiriskiya ntchitu ulongozgi waki. Fundu zenizi zikoliyana ndi vo Bayibolu likamba kuti:
“Chiuta walivi sankhu, kweni iyu walondere munthu wakutuliya mu mtundu wewosi yo watimuwopa ndi kuchita urunji.”—MACHITIDU 10:34, 35.
Nge mo mpapi wachanju wapereke ulongozgi ku ŵana ŵaki, Yehova Chiuta Mbada achanju wo atitiwovya kuziya mu Mazu ngawu Bayibolu. (2 Timote 3:16) Mungagomezga Mazu ngaki chifukwa chakuti iyu ndiyu wakutilenga kweniso waziŵa vo vingatiwovya kuti tikondwengi pa umoyu.
Kumbi mukhumbika kuchitanji kuti muzisaniyi umoyu wenuwu? Ŵerengani nkhani yakulondopu.
^ ndimi 6 Kuti muziŵi vinandi pa nkhani yakufwatuliya Bayibolu kweniso mo likugaŵikiya ku ŵanthu, lutani pa www.isa4310.com/tog ndipu wonani po palembeka kuti VO BAYIBOLU LISAMBIZA > MBIRI NDIPUSO BAYIBOLU.
^ ndimi 16 Kuti muziŵi vinandi, wonani mutu 9 mu buku lakuti The Bible—God’s Word or Man’s? lo likulembeka ndi Akaboni aku Yehova. Lisanirika so pa www.isa4310.com. Wonani po palembeka kuti LIBRARY > BOOKS & BROCHURES.
Mungayanja Kuŵerenga so Nkhani Izi
CHIGONGWI CHA MLINDA
Uneneska Wakukwaskana ndi vo Vichitikengi Kunthazi
Kholeskani chivwanu chinu mu vinthu vo Chiuta wakulayizga vakukwaskana ndi charu chapasi kweniso ŵanthu wo azamuja pacharu ichi.
CHIGONGWI CHA MLINDA
Kumbi Ulongozgi wa M’Bayibolu Ngwakovya Mazuŵa Nganu?
Ŵanthu anyaki awona kuti angachita umampha kugwiriskiya ntchitu ulongozgi wo waperekeka sonu m’malu mwakugwiriskiya ntchitu ulongozgi wa m’Bayibolu wo ukulembeka vyaka pafufupi 2,000 kuvuli.
CHIGONGWI CHA MLINDA
Bayibolu Lingakuwovyani Kuzija ndi Umoyu Wamampha Kunthazi
Mazu Ngaku Chiuta ngatitiwovya kumalana ndi masuzgu ngo tikumana nangu zuŵa lelosi mu charu chiheni ichi. Bayibolu likamba so vinthu vamampha vo vazamuchitika kunthazi.
MAFUMBU NGO BAYIBOLU LIMUKA
Kumbi Bayibolu Lingukambiya Limu Vakukwaskana ndi Maŵanaŵanu Kweniso Vakuchita va Ŵanthu Mazuŵa Nganu?
Bayibolu lingukambiya limu kuti ŵanthu azamuhenekeheneke.
