Kumbi muwona kuti umoyu watingi uŵengi wuli pacharu chapasi asani kŵengavi lumwi? Lumwi litovya kuti vimiti vijengi ndi mani, maluŵa, vipasu, nje ndipuso mbewu. Lichitiska so kuti vimiti viwonkhengi maji pasi pa dongu mwakugwiriskiya ntchitu misisi. Ndipu maji ngenanga ngakwera mpaka kuchifika kumani pavuli paki ngasambuka mvuchi ndi kuyupukiya muchanya.

Vuwa ndi mphasu yapade yo Chiuta watitipaska yo yichitiska kuti pacharu chapasi pasanirikengi chakurya kuti tiryengi. Chiuta watitipaska vuwa kutuliya kuchanya ndipuso nyengu za vipasu. Watitipaska so vakurya vinandi ndipu wazaza mitima yidu ndi likondwa.

Apapi anandi anthulumi afipa mtima kuti asaniyengi wuli chakurya chakukwana cha mabanja ngawu kweniso vakuvwala. Wonani vo Malemba ngakamba: “Wonesesani tiyuni tamude timija mbewu cha pamwenga kuvuna pamwenga kusunga munkhokwi, kweni Awusemwi akuchanya atitiryisa. Asi yimwi mwe akuzirwa ukongwa kuluska tiyuni?”—Mateyu 6:25, 26.

“Sambirani ku maluŵa ngamudondu, wonani mo ngakuliya . . . kweni nditikukambiyani kuti chinanga ndi [Fumu] Solomoni mu unkhankhu waki wosi wakuvwalapu cha malaya ngakutowa nge maluŵa yanga. Sonu asani Chiuta wativivwalika viyo vakume vamudondu . . . , kumbi yimwi wangatondeka kukuvwalikani?”—Mateyu 6:28-30.

Chifukwa chakuti Chiuta watitipaska chakurya ndi vakuvwala, tikayika cha kuti wangatiwovya kusaniya so vinthu vinyaki vakukhumbika pa umoyu. Asani tiyesesa kuchita khumbu laku Chiuta, iyu watumbikengi phamphu lidu lo tichita kuti tisaniyi chakurya pamwenga wangatiwovya kuti tisaniyi ndalama zakuguliya vinthu vinyaki vakukhumbika.—Mateyu 6:32, 33.

Kukamba uneneska, te ndi vifukwa vakuvwika vakuyanjiya Chiuta asani tiwona lumwi, vuwa, viyuni ndipuso maluŵa. Mu nkhani yakulondopu, tiwonengi mo Mlengi widu wakambiskiyana ndi ŵanthu.