Yehova wakulayizga kuti: ‘Kwazamuŵavi kuliya, kuvwa kuŵaŵa, kutama pamwenga nyifwa. Ndazamulesa masozi ngosi mumasu mwawu. Vinthu vosi viheni vo vachitikanga vazamuluwika.’

Yehova wanguŵika Adamu ndi Eva mumunda wo wenga ku Edene kuti ajengi mwachimangu kweniso mwalikondwa. Yiwu akhumbikanga kusopa awisewu akuchanya ndipuso abali ŵana kuti aje pacharu chapasi. Adamu ndi Eva, angumuvwiya cha Yehova kweni iyu wakusintha cha vo wakhumbanga kuchita. Mubuku ili, tawona kuti chechosi cho Chiuta walayizga chifiskika. Ufumu waki uchitisengi kuti pacharu chapasi pazije vinthu vamampha nge mo wangulayizgiya Abrahamu.

Pambula kuswera yapa, Satana, angelu aheni kweniso ŵanthu wosi aheni, abayikengi. Weyosi yo wazamutaskika wazamusopanga Yehova. Tazamutamanga cha pamwenga kufwa. M’malu mwaki, zuŵa lelosi tazamuyukanga ndi nthazi ndipuso tazamukondwanga ndi umoyu.  Charu chazamuja paradayisu. Weyosi wazamuja ndi chakurya chamampha kweniso nyumba yamampha. Ŵanthu azamuyanjanga anyawu, azamuja ankhaza cha pamwenga andewu. Nyama zakudondu zazakutiwopa cha ndipu nasi tazakuziwopa cha.

Yazamuja nyengu yakukondwesa asani Yehova waziyamba kuyuska ŵanthu wo akufwa. Tazamulonde ŵanthu a munyengu yakali nge Abelu, Nowa, Abrahamu, Sara, Mozesi, Ruti, Estere ndi Davidi. Tazamugwiriya nawu limoza ntchitu yakupanga charu chapasi kuja paradayisu. Nyengu zosi, pazamuja ntchitu zinandi zakukondwesa zo tazamugwiranga.

Yehova wakhumba kuti iwi uzijemu muparadayisu. Wazakumuziŵa umampha Yehova kuluska mo utimuziŵiya sonu. Zuŵa lelosi tinderengi kufupi ndi Yehova, sonu mpaka muyaya!