Ŵanthu anandi mumatchalitchi agomezga kuti charu kweniso vinthu vosi vingulengeka mumazuŵa 6 nga maola 24, vyaka masauzandi ngamanavi vo vajumpha. Kweniso ŵanthu anyaki asuska kuti kwe Chiuta, akamba kuti Bayibolu ndi buku la nthanu waka kweniso atiti vamoyu vosi vikujaku waka mwamwaŵi.

Kweni ŵanthu anyaki anandi aziŵa umampha cha kuti uneneska ndi nuwu. Panyaki namwi mwe mugulu la ŵanthu ŵenaŵa ndipu muŵerenga kabuku yaka kuti muziŵi kuti uneneska ndi nuwu. Panyaki mugomezga kuti Chiuta waliku ndipu mugomezga vo Bayibolu likamba. Kweniso panyaki mugomezga fundu zo akaswiri anyaki a sayansi akamba kuti vamoyu vikujaku waka vija. Asani ndimwi mpapi, mungasuzgika kuti muŵamuki ŵana ŵinu asani akhumba kuziŵa kuti vamoyu vikuchita kusambuka pamwenga vikuchita kulengeka.

Kabuku yaka kakulembeka kuti kanyozengi fundu za ŵanthu a mumatchalitchi cha pamwenga wo aleka kugomezga Chiuta. M’malu mwaki, kabuku yaka kakuwovyeningi kuti mufufuzi so umampha asani vo mugomezga vauneneska. Vingachitika kuti muziŵa cha vo Bayibolu likamba pa nkhani ya mo vamoyu vikulengeke. Asani ndi viyo, kabuku yaka kakuwovyeningi so kuziŵa vo Bayibolu likamba. Kakuwovyeningi so kuziŵa asani vo mugomezga vauneneska nadi pa nkhani ya mo umoyu ukwambiya.

Kumbi mugomezgengi vo ŵanthu anyaki akamba kuti kulivi Mulengi wazeru ukongwa ndipuso kuti vo Bayibolu likamba vaboza? Pamwenga muyesesengi kufufuza vo Bayibolu likamba? Kumbi mugomezgengi vo Bayibolu lisambiza pamwenga vo ŵanthu anyaki akamba kuti vamoyu vikuchita kusambuka? (Aheberi 11:1) Mungachita umampha ukongwa asani mungayesesa kusaniya uneneska pa nkhani iyi.