Masoka ngachilengedu ngachitika ukongwa mazuŵa nganu. Asani kwachitika masoka, pakhumbika kulondo ndondomeku yakwenere kuti ŵanthu wo akwaskika alonde chovyu. Ndichu chifukwa chaki Wupu Wakulongozga ukuzomereza kuti papangiki Dipatimenti Yakovya pa Masoka mu maofesi nga nthambi ngosi.

Asani kwachitika masoka abali a mu dipatimenti iyi akambiskana ndi ŵara a mpingu a muchigaŵa cho kuti aziŵi chovyu cho chikhumbika. Asani ngozi yo yachitika njikulu ukongwa mwakuti apharazgi a muchigaŵa cho angakwanisa cha kuwovya, ofesi ya nthambi yisankha abali akwenere kuti alongozgi pa ntchitu yakupereka chovyu. Abali yaŵa angapempha abali wo angajipereka kuti aŵawovyeku ntchitu, kuti apereki vinthu vo vikhumbika pamwenga angagula vinthu kuti akapaski abali wo akhumbika chovyu.

Kuchita vinthu mu nthowa yeniyi kutovya mu nthowa zinandi. Asani abali a muchigaŵa cho kwachitika ngozi alongozgeka ndi Dipatimenti Yakovya pa Masoka, vitovya kuti ntchitu yileki kuŵa yikulu ukongwa, paleki kuŵa vakutimbanyizga vinyaki kweniso kuti paleki kuluzika ndalama ndipuso vinthu vinandi.

Abali wo asankhika ndi ofesi ya nthambi ndiwu asankha unandi wa ndalama zo zikhumbika kweniso ŵanthu wo akhumbika kuti awovyi ko kwachitika masoka. Yiwu akumana ndi ŵaraŵara ŵa boma kuti aŵawovyi kuti ntchitu yiyendi liŵi. Mwaviyo mukhumbika cha kusonkhesa ndalama, kutumiza vinthu pamwenga kuluta kumalu ko kwachitika ngozi kwambula kukukambiyani.

Asani kwachitika ngozi tikhumbika mbwenu kuwovyaku. (Ah 13:16) Titiŵayanja abali ndi azichi ŵidu. Kumbi tingalongo wuli kuti titiŵayanja? Chakukhumbika ukongwa nkhuŵapemphere wo akwaskika ndi masoka ndipuso wo apereka chovyu. Tingapereka so ndalama kuti ziwovyi pa ntchitu ya pacharu chosi. Mwakulongozgeka ndi Wupu Wakulongozga, maofesi nga nthambi ngasankha mo ndalama zenizi zingagwiriya ntchitu. Asani tikhumba kuti tikagwireku ntchitu yakovya ŵanthu wo akwaskika ndi ngozi, tingasayina fomu ya Wofuna Kutumikira Mongodzipereka M’dipatimenti Yoona za Mapulani ndi Zomangamanga (DC-50).

WONERIYANI VIDIYO YAKUTI MAJI NGAKUSAPALIYA NGAKUNANGA VINTHU KU BRAZIL, NDIPU MUKANI FUMBU ILI:

Kumbi ntchinthu wuli cho chakukondwesani ndi mo abali anguwovye ŵanthu wo angukumana ndi suzgu la kusapaliya kwa maji ku Brazil mu 2020?