Tawuni ya Cluj-Napoca, njimoza mwa matawuni ngakulungakulu ngo nge mucharu cha Romania ndipu yiziŵika kuti Treasure City. Pa chiwoneseru cha mabuku cho chinguchitika ku Gaudeamus kwambiya pa 20 mpaka pa 24 April, 2016, Akaboni aku Yehova anguwovya ŵanthu kuziŵa fundu za mijalidu yamampha zo zisanirika mu Bayibolu. Yiwu anguzenga nyumba yakuwonesiyamu mabuku ndipu angukambiskana ndi ŵanthu anandi wo akukhumbanga kuziŵa vinandi va mavidiyo ngidu, mabuku ngo ngakonkhoska Bayibolu ndipuso ma Bayibolu ngo ngenga pa kashelufu.

Ma sukulu nganandi nganguluta ko achitiyangaku viwoneseru ndipu asambizi anguza ndi ŵana ŵawu a sukulu kuti akawoni nyumba yo Akaboni anguŵikamu mabuku. Ŵana a sukulu angukondwa ukongwa ŵati awonere mavidiyo nga makatuni nga Jani Bwezi Laku Yehova, ndipu anandi mwaku yiwu akhumbanga mabuku ngakuti Buku Langu la Nkhani za m’Bayibolu ndi kabuku kakuti Sambizani Ŵana Ŵinu. Munthu munyaki yo wagwiranga ntchitu yakuphwere ŵana wati wawonere mavidiyo nga makatuni, wangukambiya munyaki yo wagwiranga nayu ntchitu kuti, “Tikhumbika kulemba adiresi ya [www.isa4310.com] kuti tikaŵalongo ŵana mavidiyo ngosi nga makatuni.”

Ŵana a sukulu angukondwa ukongwa ŵati awonere mavidiyo nga makatuni ngo ngawonesekanga pa matabuleti. Ndipu nganyaki mwa mavidiyo ngo anguwonere ngenga ngakuti, Kumbi watindiyanja nadi pamwenga watindipusisa waka?, Malu Ngakucheziyapu nga pa Intaneti, ndipuso yakuti Vo Mungachita Asani Ŵanthu Atikunenani.

Wasembi munyaki wa tchalitchi cha Orthodox ndi muwolu waki, azanga mwakuwerezawereza pa nyumba yo Akaboni aŵikangamu mabuku ndipu wanguto Bayibolu la Charu Chifya la Malemba nga Chigiriki Ngachikhristu ndi mabulocha. Iyu wangukamba kuti wangukondwa ukongwa ndi kachigaŵa kakuti,“Mazu nga mu Bayibolu Ndipuso po Ngasanirika” ko kasanirika kukumaliya kwa Bayibolu. Wangukondwa so kuti wo afwatuliyanga Bayibolu lenili, angufufuza mwakuphwere kutuliya mu vinthu vinandi vo venga vauneneska. Iyu wangupaska Akaboni nambala yaki ya foni kuti amumbiyengi kuti alutirizgi kukambiskana nayu nkhani za mu Bayibolu.

Muwolu wasembi wangufumba Akaboni malu ngo wangasaniya nkhani zakukwaskana ndi ŵana pa webusayiti ya jw.org. Yiwu angumuwovya mwa kumulongo po penga kachigaŵa ka “Ŵana.” Ŵati amaliza kumulongo kachigaŵa yaka, wanguwonere vidiyo yo yingumukondwesa ukongwa yakuti Mukambengi Uneneska. Wati wamaliza kuwonere vidiyo yeniyi ndi vinthu vinyaki vo visanirika pa webusayiti iyi, mulumu waki wangukamba kuti, webusayiti iyi ndi “Mphasu yakutuwa kwaku Chiuta.”