Akaboni aku Yehova ku Bulgaria achita phamphu pakusambiza anyawu uneneska wakukwaskana ndi Chiuta ndipuso Mazu ngaki, Bayibolu. Kuti achiti venivi, Akaboni anandi akutuliya muvyaru vinyaki asamiya ku Bulgaria kuti akawovyi pa ntchitu yakupharazga kwambiya mu chaka cha 2000. Kumbi ŵanthu wo aluta kuchipharazga kuvyaru vinyaki akumana ndi masuzgu wuli? Ntchifukwa wuli achita phamphu? Wonani vo ŵanthu anyaki wo angusamiya ku Bulgaria angukamba.

 Darren, wa ku England wangukamba kuti: “Takhumbisiskanga kuchiteŵete ko kukhumbika apharazgi anandi. Ndati ndatorana ndi Dawn, tingusamiya ku London kuti tikawovyi pakusambiza ŵanthu Bayibolu mu chineneru cha ku Russia. Kwakanyengu taja tichiyesa kuti tisamiyi kuvyaru vinyaki kweni tatondekanga kusama chifukwa cha vifukwa vinyaki. Taŵanaŵananga kuti tingafiska cha kusama, kweni mabwezi ngidu ngangutiwovya kuwona kuti masuzgu ngidu ngasintha ndipu tingafiska kusama.” Darren ndi Dawn angwamba kufufuza charu cho chakhumbikanga asambizi a Bayibolu ndipuso ko yiwu angafiska kusamiyaku. Mu 2011, angusamiya ku Bulgaria.

 Ŵanthu anyaki wo pakwamba ŵengavi vilatu vakuchiteŵete kuvyaru vinyaki, achiskika ukongwa ndi vakuwoniyapu vamampha va ŵanthu wo akusamiya kuvigaŵa vinyaki. Giada yo waja ku Italy ndi mulumu waki Luca. Iyu wangukamba kuti: “Ndingukumana ndi Akaboni wo ŵenga ndi phamphu ndipuso akondwanga kuteŵete ku South America ndi ku Africa. Ndinguchiskika ukongwa ndi likondwa lo ŵenga nalu kweniso vakukumana navu vamampha vo angundikambiya. Venivi vingundiwovya kuti ndisinthi vilatu vangu vauzimu.”

 Tomasz ndi Veronika akutuwa ku Czech Republic ndikuluta ku Bulgaria mu 2015, limoza ndi ŵana ŵawu ŵaŵi, Klara ndi Mathias. Ntchinthu wuli cho chinguŵachitiska kuti asami? Tomasz wangumuka kuti: “Tinguŵanaŵaniya vakuwoniyapu va abali ndi azichi wo angusama, kusazgapu abali ŵidu ndipuso kuŵanaŵaniya vinthu vinyaki vamampha vo angukumana navu. Tinguchiskika kuona kuti akondwanga, tingukambiskana venivi kunyumba te limoza nge banja.” Ŵanthu a mubanja lenili sonu akondwa kuteŵete muchigaŵa chifya cha ku Bulgaria mutawuni ya Montana.

 Linda njumoza mwa Akaboni wo akusamiya ku Bulgaria. Iyu wangukamba kuti: “Kwa vyaka vinandi vo vajumpha ndaja ndichiluta ku Ecuador ndipu ndakumananga ndi abali ndi azichi anyaki wo angusamiya kwenuku kuti apharazgengi. Venivi vingundichitiska kuŵanaŵana kuti zuŵa linyaki nani ndazamuluta kuchiteŵete ko kukhumbika apharazgi anandi.” Petteri ndi muwolu waki Nadja, wo aja ku Finland, nawu so anguŵanaŵaniya vakuwoniyapu vamampha va ŵanthu anyaki. Yiwu angukamba kuti: “Ku mpingu widu, te ndi vakuwoniyapu vamampha va apharazgi wo akusamiya ku malu nganyaki kuti akawovyi ŵanthu kuziŵa vo Bayibolu lisambiza. Pa vyaka vosi vo aja achichita uteŵeti wenuwu, yiwu akamba vinthu vakuchiska. Yiwu akamba so kuti vyaka venivi venga vakukondwesa ukongwa pa umoyu wawu.”

 Kunozgeke umamapha nkhwakukhumbika ukongwa ku ŵanthu wo akhumba kuchiteŵete ku vyaru vinyaki. (Luka 14:28-30) Nele wa ku Belgium wangukamba kuti: “Ndati ndayamba kuŵanaŵaniya ukongwa vakuchiteŵete kucharu chinyaki, ndingupemphera kweniso kupenja nkhani zakuchiska za mu mabuku ngidu zakukwaskana ndi kuchiteŵete kucharu chinyaki. Ndingwamba kuzisambira ndipuso kuona nkhani zo ndikhumbika kugwiriyapu ntchitu.”

 Kristian ndi Irmina, a ku Poland, aja ku Bulgaria kwa vyaka vakujumpha 9. Yiwu ŵechendasamiyi ku Bulgaria, anguziŵa kuti vingaŵa umampha asani angawungana ndi kagulu kachineneru cha Chibulgariya ko ke ku Poland. Gulu ili linguŵachiska ndipuso kuŵawovya kusambira chineneru. Kristian ndi Irmina angukamba kuti: “Tinguziŵa kuti asani tizomereza kuti Yehova watigwiriskiyengi ntchitu, iyu watiphweriyengi ndipu venivi vakukondwesa ukongwa. Asani mutimukambiya Yehova mwakukhumbisiska kuti, ‘Ndini panu! Nditumeni!’ ndikuti muchitengi vinthu vo mwaŵanaŵanangaku cha kuti mungafiska kuchita.”​—Yesaya 6:8.

 Kuti anozgeke umampha kweniso kusunga ndalama, Reto ndi muwolu waki Cornelia, a ku Switzerland, angusankha kuja umoyu wambula kukhumba vinandi. Yiwu angukamba kuti: “Kwati kwaja chaka chimoza kuti tisami, tinguluta ku Bulgaria ndipu tingujaku kwa sabata yimoza kuti tiziŵi mo umoyu ujaliya kumalu ko. Kwenuku tingukambiskana ndi amishonale wo angutipaska ulongozgi wakovya.” Reto ndi Cornelia angugwiriskiya ntchitu ulongozgi weniwo ndipu aja ku Bulgaria kwa vyaka vakujumpha 20.

 Ŵanthu wo aasamiya ku charu chinyaki aziŵiliya nyengu yifya ya kucharu cho ndipuso masuzgu nga ku malu ngo. (Machitidu 16:9, 10; 1 Akorinto 9:19-23) Suzgu yikulu yituŵa kusambira chineneru chifya. Luca, yo tamuzumbuwa pakwamba wangukamba kuti: “Nyengu zosi takondwanga kupereka ndemanga zakutuliya pasi pamtima ku maunganu. Kwakanyengu ini ndi muwolu wangu vatisuzganga kunozgeke chinanga ndi ndemanga yipusu mu chineneru cha Chibulgariya! Venga nge tawere so kuwana. Kweni ndemanga za ŵana zenga zamampha ukongwa kuphara zidu.”

 Ravil wa ku Germany, wangukamba kuti: “Kusambira chineneru kwenga kwakusuzga. Kweni ndajikambiyanga kuti, ‘Ukondwengi asani unangisa mazu nganyaki.’ Masuzgu ngo ndakumananga nangu ndangawonanga nge suzgu cha, kweni kuti ntchigaŵa cha uteŵeti wakupatulika kwaku Yehova.”

 Linda, yo wazumbulika pakwamba wangukamba kuti: “Ndisuzgika kusambira chineneru chifya. Kusambira Chibulgariya nkhupusu cha ndipu nyengu zinandi ndaja ndichikhumba kuleka waka kusambira chineneru chenichi. Utijivwa kuti we wija asani utondeka kukambiskana ndi ŵanthu ndipuso asani aleka kuvwisa vo ukamba. Kuti ndilutirizgi kuja paubwezi wakukho ndi Yehova, ndisambira chechosi mu chineneru cha Chiswidishi. Pakumaliya, abali ndi azichi ŵangu akwanjiwa angundiwovya ndipu ndingufiska kusambira chineneru.”

 Suzgu yinyaki so nkhusoŵana ndi achibali. Ŵanthu wo asama, alekana ndi abali ndipuso mabwezi ngawu ngakwanjiwa. Eva, yo wakusamiya ku Bulgaria ndi mulumu waki Yannis wangukamba kuti: “Pakwamba ndajiwonanga kuti nde ndija. Kuti ndimalani ndi suzgu yeniyi, nyengu zosi takambiskananga ndi mabwezi ngidu kweniso ŵanthu a mubanja lidu ndipu kunu tingusaniya mabwezi nganyaki ngafya.”

 Pe masuzgu so nganyaki. Robert ndi Liana, wo akutuliya ku Switzerland, angukamba kuti: “Kusambira chineneru ndipuso midawuku ya kumalu ko, yenga suzgu yikulu kwaku isi. Ndipuso tingunozgeke cha nyengu yakuzizira ukongwa yakunu. Kweni kuja ndi maŵanaŵanu ngakwenere ndipuso kukondwa vawovya banja ili kuteŵete Yehova mwakugomezgeka kwa vyaka 14 ku Bulgaria.

 Lilly wawonga ukongwa kupharazga kumalu ko kukhumbika apharazgi anandi. Iyu wangukamba kuti: “Yehova ndamuziŵa umampha munthowa yo ndatingi ndimuziŵengi cha nkhaŵengi kwidu. Nditangwamika kovya ŵanthu anyaki ndipu venivi vitindiwovya kuja paubwezi wakukho ndi Yehova, kuti ndikondwengi kweniso ndikhorwengi.” Mulumu waki Ravil wanguzomereza vo muwolu waki wangukamba. Iyu wanguti: “Uwu mbumoyu wamampha ukongwa, kuja ndi mwaŵi wapade wakuziŵa Akhristu aphamphu akutuliya muvyaru vakupambanapambana wo ŵe ndi lusu pakusambiza uneneska wa mu Bayibolu. Ndasambira vinandi kutuliya kwaku yiwu.”

 Mtima wakukhumbisiska wo abali ndi azichi anandi ŵenawu wachitiska kuti ntchitu yakupharazga “uthenga wamampha uwu wa Ufumu. . . ku ŵanthu amitundu yosi” yije ndi vakutuwapu vamampha. (Mateyu 24:14) Chifukwa chakuti ŵe ndi mtima wakukhumbisiska kusamiya ku vyaru vinyaki kuti akawovyi ŵanthu anyaki, abali ndi azichi wo asamiya ku Bulgaria awona mo Yehova watiŵapaskiya vo mtima wawu ukhumba kweniso mo watiŵawovye kufiska vosi vo akhumba kuchita.​—Salimo 20:1-4.