Ndingumupweteka ukongwa munyangu yo ndachitanga nayu masaza nga ndewu ndipu ndaziŵanga cha kuti ndingamupweteka viyo. Ndingumutchaya ku mphunu mwangozi. Ndingujimba mulandu ndipu ndingwamba kukayikiya asani ndingalutirizga kuchita masaza ngenanga. Kweni, ntchifukwa wuli ngozi iyi yingundichitiska kuŵanaŵana viyo penipo masaza yanga ndangayanjanga ukongwa? Chakwamba, agani ndikukonkhoskiyeni mo ndingwambiya kuchita masaza nga ndewu.

Ndikukuliya kufupi ndi tawuni ya Buffalo ku New York, U.S.A. Tosi mu banja lidu tenga Akatolika ndipu tajanga mwachimangu ukongwa. Ndeche mwana ndasambiranga sukulu ya Katolika ndipu ndawovyanga wasembi asani tichita miyambu yinyaki ya tchalitchi. Apapi ŵangu akhumbanga kuti ini ndi mzichi wangu tikondwengi ndi umoyu. Mwaviyo, andizomerezanga kuluta kuchiseŵe asani ndawe ku masaza ngakusukulu, chikulu ndikwera umampha kusukulu mbwenu. Venivi vingundichitiska kuti ndiyambi kuja ndi umoyu wakujithemba ndeche munamana.

Ndati ndafika vyaka 17 ndingwamba kusambira kuchita masaza nga ndewu. Kwa vyaka vinandi, ndasambiranga kwa maora ngatatu pazuŵa, kwa mazuŵa 6 pa sabata. Sabata yeyosi, ndamaliyanga so maora nganandi kuyesere pakundija kweniso kuwonere mavidiyo ngakuti ngandiwovyi kuti ndipumengi umampha. Pakuyesere, ndayanjanga kujijala kumasu ndi chisalu, chinanga ndipo ndiyesere nde ndi vidya. Ndaswanga njerwa ndi fayiti yimoza pe. Ndinguja yumoza wa ŵanthu wo achitanga umampha ukongwa masaza nga ndewu ndipu pa maphara nganyaki ngo ngachitikanga ini ndini ndapharanga. Kuchita masaza nga ndewu chinguja chinthu chakukhumbika ukongwa pa umoyu wangu.

Ndingufiska kuchita chechosi cho ndaŵanaŵananga kuti chingandiwovya kuja ndi umoyu walikondwa. Ndati ndamaliza masambiru ngangu pa yunivesite yinyaki, ŵanthu angwamba kundipasa ulemu. Ndagwiranga ntchitu nge injiniya wa ma kompyuta ku makampani ngakulungakulu. Ndakondwanga kusaniya phindu lo ndapasikanga, ndenga ndi nyumba yangu ndi yangu ndipuso ndenga ndi chibwezi. Kumasu kwa ŵanthu, ndawonekanga nge kuti vitindiyende kweniso kuti ndikondwa, kweni ndakondwanga cha chifukwa penga mafumbu nganyaki ngakukwaskana ndi umoyu ngo ngandizwetesanga mutu.

Kuti ndisaniyi kwamuka kwa mafumbu ngangu, ndingwamba kuluta ku tchalitchi kaŵi pa sabata ndipuso kupemphera kuti Chiuta wandiwovyi. Kweni zuŵa linyaki, vo tingukambiskana ndi munyangu munyaki yo, vingusintha umoyu wangu. Ndingumufumba kuti: “Kumbi ukuŵanaŵaniyapu kuti ntchifukwa wuli te ndi umoyu?” Ndingumukambiya so kuti: “Pacharu pe masuzgu nganandi ukongwa ndipuso pachitika vinthu vinandi vambula urunji!” Iyu wangundikambiya kuti pakwamba nayu wajifumbanga viyo kweni wakusaniya kwamuka mu Bayibolu. Wangundipaska buku lakuti Mungathe Kukhala ndi Moyo Kosatha M’Paradaiso pa Dziko Lapansi. * Iyu wangundikonkhoske kuti waja wachisambira Bayibolu ndi Akaboni aku Yehova. Pakwamba, ndakhumbanga cha kuŵerenga buku ili chifukwa ndaŵanaŵananga kuti ndikhumbika kuŵerenga waka mabuku ngaku tchalitchi kwidu mbwenu. Kweni chifukwa chakuti ndakhumbisiskanga kusaniya kwamuka kwa mafumbu ngo ndenga nangu, ndingwamba kuliŵerenga buku ili kuti ndiwoni asani vo Akaboni asambiza vakuvwika nadi.

Ndingukondwa ukongwa kusaniya vo Bayibolu lisambiza. Ndingusambira kuti khumbu laku Chiuta pakwamba lenga lakuti ŵanthu aje ndi umoyu wamuyaya mu paradayisu pacharu chapasi, ndipu khumbu lenili lechendasinthi. (Genezesi 1:28) Ndinguzizwa kuwona zina laku Chiuta lakuti Yehova mu Bayibolu langu la King James version ndipuso kuti ndaja ndichizumbuwa zina lenili asani ndipemphera Pempheru la Ambuya. (Salimo 83:18; Mateyu 6:9) Ndipu pakumaliya paki, ndinguvwisa chifukwa cho Chiuta wazomereze kuti ŵanthu asuzgiki kwa nyengu yimanavi. Chechosi cho ndingusambira chingundifika pa mtima ukongwa, ndipu ndingukondwa kawana cha!

Ndazamuluwapu cha mo ndinguvwiya pa zuŵa lakwamba lo ndingwamba kusanirika pa maunganu nga Akaboni aku Yehova. Weyosi wenga waubwezi ndipu wakhumbanga kuziŵa zina langu. Pa zuŵa lakwamba lenili, pangukambika nkhani yapade yakukwaskana ndi mapempheru ngo Chiuta watuvwa. Mutu wenuwu ungundikondwesa ukongwa chifukwa ndaja ndichipemphera kwaku Chiuta kuti wandiwovyi. Pavuli paki, ndingusanirika pa Mwambu Wakukumbukiya nyifwa yaku Yesu. Pa vakuchitika vosi venivi, ndingupukunya mutu wambula masengwi, kuwona chinanga mbana anamana ajula Malemba ngo ngaŵerengekanga. Ini ndaziŵanga cha mo ndingasaniriya lemba, kweni Akaboni angundiwovya ukongwa ndipu angundisambiza mo nani ndingasaniriya Malemba.

Asani ndisanirika pa maunganu, ndipu ndawonanga kuzirwa kwa vo Akaboni asambizanga. Pa unganu wewosi ndasambirangapu kanthu kanyaki ndipu nyengu zosi ndachiskikanga kweniso kusisipulika. Pavuli paki angundipempha kuti ayambi kusambira nani Bayibolu.

Vo ndinguwona kwa Akaboni aku Yehova venga vakupambana ukongwa ndi vo ndinguwona kutchalitchi kwidu. Ndinguwona kuti Akaboni mbakukoliyana ukongwa ndipu ndi gulu la ŵanthu wo atesesa kukondwesa Chiuta. Ndingwamba kukhorwa kuti alongorana chanju cho chiziŵikisa Akhristu auneneska.—Yohane 13:35.

Ndichisambira Bayibolu ndingwamba kusintha umoyu wangu kuti ndikoliyani ndi fundu za mu Bayibolu. Kweni ndawonanga kuti ndikhumbika kulutirizga mbwenu kuchita masaza nga ndewu. Ndangayanjanga masaza yanga kweniso ndayanjanga kupharizana ndi anyangu. Ndati ndamukambiya venivi munthu yo wandisambizanga Bayibolu, iyu wangukambiya mwachanju kuti: “Lutirizga waka kusambira, ndiziŵa kuti usankhengi mwakwenere.” Mazu ngaviyo yanga ndingu ndakhumbikiyanga nadi. Ndichilutirizga kusambira ndingwamba kukhumbisiska kukondwesa Yehova Chiuta.

Pa ngozi yiya ndayizumbuwa pakwamba pa, po ndingutchaya munyangu ku mphunu mwangozi, ndipu ndingusinthiya umoyu wangu. Ngozi yeniyi yingundichitiska kuŵanaŵaniyapu kuti ndingaja cha wakusambira wachimangu waku Khristu asani ndilutirizgengi kuchita masaza nga ndewu. Ndingusambira kuti lemba la Yesaya 2:3, 4 lingukambiya limu kuti ŵanthu wosi wo alondo ulongozgi waku Yehova “azamusambira so nkhondu cha.” Ndipu Yesu wangusambiza kuti tingajanga ankhaza cha pamwenga a chiwawa chinanga ndi po ŵanthu anyaki atichitiya vinthu vambula urunji. (Mateyu 26:52) Mwaviyo, ndinguwona kuti mbumampha kuti ndileki kuchita masaza ngo ndangayanjanga ukongwa.

Ndati ndachita venivi, ndingulondo ulongozgi wa mu Bayibolu wakuti “ujisambizengi wamweni ndipu uje ndi chilatu chakuti ulongo kuti ndiwi wakujipereka kwaku Chiuta.” (1 Timote 4:7) Nyengu yosi yo kali ndamaliyanga pakuchita masaza nga ndewu, sonu nditiyigwiriskiya ntchitu pakuchita vinthu vauzimu. Msungwana yo ndenga nayu pa chibwezi wangukoliyana navu cha kuti ndayamba kusambira Bayibolu, mwaviyo tingumalisa chibwezi. Ndingubatikiza kuja Kaboni waku Yehova pa 24 January, 1987. Pati pajumpha waka kanyengu kamanavi ndati ndabatizika, ndingwamba kuteŵete nge mpayiniya wa nyengu zosi, ndipu ndagwiriskiyanga ntchitu nyengu yangu kusambiza ŵanthu Bayibolu. Ndingulutirizga kuchita upayiniya wa nyengu zosi mpaka po ndingwambiya kuteŵete ku likulu la pacharu chosi la Akaboni aku Yehova ku New York, U.S.A.

Pakuti sonu nditiwuziŵa uneneska wakukwaskana ndi Chiuta, ndingakamba kuti chinthu cho ndapenjanga pa umoyu wangu ndikuchisaniya. Sonu ndipu ndikondwa ukongwa ndi umoyu, ndiziŵa chilatu cho Yehova wakutilenge ndipu nde ndi chilindizga chamampha cha munthazi. Chinanga kuti ndeche kuchita mbwenu ma ekisasayizi, kweni ndichu chinthu chakukhumbika ukongwa cha kwaku ini. Chinthu chakukhumbika ukongwa pa umoyu wangu nkhuteŵete Yehova Chiuta.

Pa nyengu yo ndachitanga masaza nga ndewu, nyengu zosi ndajanga masu ndi ŵanthu wo ŵe nani pafupi ndipu kanandi ndaŵanaŵaniyanga mo ndingamaliyana nawu asani angandiyukiya. Mazuŵa nganu ndija mbwenu masu ndi ŵanthu wo ŵe nani pafupi, kweni ndichita venivi kuti ndiwoni mo ndingaŵawovye. Bayibolu landiwovya ukongwa kuja munthu wakupaska ndipuso kuja mutu wabanja wamampha ku muwolu wangu wakutowa, Brenda.

Kuchita masaza nga ndewu ndiku kwenga kurya kwangu. Kweni sonu kurya kwangu nkhwamampha ukongwa kuphara masaza ngo ndayanjanga. Bayibolu likamba kuti: “Masaza ngatovya kamanavi, kweni kujipereka kwaku Chiuta kutovya pa vinthu vosi, chifukwa kwe ndi layizgu la umoyu wunu, kweniso umoyu wo utuza.”—1 Timote 4:8.