Tali ʻo e Ngaahi Fehuʻi Fakatohitapú
Ko e hā ʻa e taumuʻa ʻo e toe foki mai ʻa Kalaisí?
Ki muʻa ke hāʻele hake ʻa Sīsū Kalaisi ki hēvani ʻi he 33 T.S., naʻá ne talaʻofa ʻe toe foki mai. Naʻá ne fakatatau ʻa ia tonu ki ha ʻeiki naʻe fononga mamaʻo ʻi ha vahaʻa taimi lōloa pea toe foki mai fakataha mo e mafai ke pule ko ha tuʻi. Ko e taumuʻa ʻa e toe foki mai ʻa Sīsuú ke ʻomai ki he faʻahinga ʻo e tangatá ʻa e founga-pule leleí.—Lau ʻa e Luke 19:11, 12.
ʻE ʻomai ʻe Sīsū ʻa e founga-pule leleí ki he faʻahinga ʻo e tangatá
Ko e sino fēfē ʻe toe foki mai ʻaki ʻe Kalaisí? Naʻe fokotuʻu hake ia ko e tokotaha laumālie taʻehāmai. (1 Pita 3:18) Naʻe hāʻele leva ki hēvani ʻo nofo ʻi he nima toʻomataʻu ʻo e ʻOtuá. (Saame 110:1) ʻI ha taimi fuoloa ʻaupito ki mui ai, naʻe ʻomai ʻa Sīsū ki he ʻao ʻo Sihova ko e ʻOtuá ʻa “Talumeimuʻa” naʻá ne foaki kia Sīsū ʻa e mafai ke pule ki he faʻahinga ʻo e tangatá. Ko ia ʻi he toe foki mai ʻa Sīsuú, ʻe ʻikai ko ha tangata, ka ko ha Tuʻi taʻehāmai.—Lau ʻa e Taniela 7:13, 14.
Ko e hā ʻe fai ʻe Sīsū ʻi heʻene aʻu maí?
ʻI he taimi ʻe aʻu taʻehāmai ai ʻa Sīsū mo ʻene kau ʻāngeló te ne fakamāuʻi ʻa e faʻahinga ʻo e tangatá. Te ne fakaʻauha ʻa e kakai fulikivanú kae foaki ʻa e moʻui taʻengatá kia kinautolu ʻoku nau tali ia ko ha Tuʻi.—Lau ʻa e Mātiu 25:31-33, 46.
Ko e pule ʻa Sīsū ko ha Tuʻí te ne liliu ʻa e māmaní ki ha palataisi. Te ne toe fokotuʻu ʻa e maté koeʻuhi ke nau moʻui fiefia ʻi he māmani Palataisí.—Lau ʻa e Luke 23:42, 43.
Te Ke Fie Vakai Foki ki Heni
KO E TAUA LE‘O
Ko e Hā ʻE Hoko ʻi he ʻAho Fakamāú?
ʻOku ʻi ai ʻa e ngaahi tui kehekehe fekauʻaki mo e ʻAho Fakamāú. Ko ha meʻa ia ke tau ilifia ki ai? Ko e hā te ne fakahokó?
