‘OKU lahi mo kehekehe ‘a e ngaahi fakakaukau fekau‘aki mo e mo‘uí pea mo e maté. ‘Oku fakakaukau ‘a e ni‘ihi ‘e hokohoko atu pē ‘enau mo‘uí ‘i he hili ‘a e maté, ‘i ha sino ‘e taha pe ‘i ha feitu‘u ‘e taha. ‘Oku fakakaukau ‘a e ni‘ihi ‘e toe fanau‘i fo‘ou kinautolu ke nau mo‘ui ‘i ha mo‘ui ‘e taha. Lolotonga iá ‘oku fakakaukau ‘a e ni‘ihi ko e maté ‘oku ngata ai ‘a e me‘a kotoa.

‘Oku ‘i ai pē nai ho‘o tui ‘a‘au fekau‘aki mo e kaveingá ni, ‘o fakatu‘unga ‘i hono tauhi hake koé pe ‘i he puipuitu‘a fakafonuá. Koe‘uhi ‘oku mātu‘aki kehekehe ‘a e fakakaukau ki he me‘a ‘oku hoko ‘i he maté, ‘oku ‘i ai nai ha taha pe ko ha feitu‘u ‘e lava ke tau hanga ki ai ki ha ngaahi tali alafalala‘anga mo mo‘oni ki he fehu‘i fakatupu puputu‘u ko ení?

Kuo ako‘i ‘e he kau taki lotú ‘i he laui senituli ‘a e tokāteline fekau‘aki mo e ta‘efa‘amate ‘a e laumālie ‘o e tangatá. Ko e kau muimui ‘o e meimei ngaahi lotu lalahi kotoa pē—faka-Kalisitiané, faka-Hinituú, faka-Siú, Mosilemí, mo e ngaahi lotu kehe—‘oku nau tui ki he ‘i ai ha laumālie ta‘efa‘amate, ‘a ia ‘oku pehē tokua ‘oku hao mo‘ui ‘i he mate ‘a e sinó ‘o hokohoko atu ‘ene mo‘uí ‘i ha nofo‘anga laumālie. Ko e kau lotu Putá, ‘i he tafa‘aki ‘e tahá, ‘oku nau tui fakafou ‘i he toe fanau‘i fo‘ou ta‘efa‘alaua, ko e mālohi, pe ivi faka‘atamai ‘i loto ‘i ha taha ‘e lava ke a‘u ia ki ha tu‘unga fakafiefia ‘oku ui ko e Nevana.

Fakafou ‘i he ngaahi akonaki ko iá, kuo hoko ai ‘a e kakai tokolahi takatakai ‘i he māmaní ‘o tui ‘oku fakaava ‘i he maté ‘a e matapā ki he mo‘uí ‘i ha toe māmani ‘e taha. Ko ia ai, ki he tokolahi, ko e maté ko ha sitepu mahu‘inga ia ‘i he vilo takai ‘a e mo‘uí, pea ‘oku hā kiate kinautolu ko e maté ko ha konga ia ‘o e finangalo ‘o e ‘Otuá. Ka ko e hā ‘a e lau ‘a e Tohi Tapú fekau‘aki mo e me‘á ni? Kātaki ‘o lau ‘a e kupu hokó. Te ke ‘ohovale nai ‘i he tali ‘oku ‘omai aí.